বিহাৰত হোৱা ভোটাৰ তালিকাৰ বিশেষ পুনৰীক্ষণত ৰাজ্যখনৰ ২২.৭ লাখ মহিলা ভোটাৰৰ নাম আঁতৰোৱা হৈছে। ইয়াৰ ফলত বছৰৰ শেষৰ ফালে বিহাৰত হ’বলগীয়া বিধানসভা নিৰ্বাচনত প্ৰভাৱ পৰিব বুলি ৰাজনৈতিক বিশ্লেষকসকলে দাবী কৰিছে।
দ্য ট্ৰিবিউনত প্ৰকাশিত এক প্ৰতিবেদন অনুসৰি ৰাজ্যখনত ৩.৫ কোটি মহিলা ভোটাৰ আছে, আৰু ইয়াৰে ২২.৭ লাখ ভোটাৰৰ নাম আঁতৰাই পেলোৱা হৈছে। পুৰুষ ভোটাৰৰ মুঠ সংখ্যা ৩.৯২ কোটিৰ পৰা ১৫.৫ লাখৰ পুৰুষ ভোটাৰ নাম আঁতৰোৱা হয়, যাৰ ফলত লিংগভিত্তিক বৈষম্যৰ সৃষ্টি হয়। পুৰুষ ভোটাৰৰ সংখ্যা বেছি হোৱাৰ পিছতো মহিলা ভোটাৰৰ তুলনাত পুৰুষ ভোটাৰৰ কম নাম পৰিমাণে আঁতৰোৱা হ’ল।
নিৰ্বাচনী তালিকাৰ পৰা মহিলা ভোটাৰৰ নাম বাদ পৰাৰ সময়ত শাসকীয় বিজেপি-জেডিইউৰ মিত্ৰজোঁটে নিজৰ এজেণ্ডাত মহিলা কল্যাণক এক গুৰুত্বপূৰ্ণ নিৰ্বাচনী বিষয় হিচাপে চিহ্নিত কৰিছে।
স্মৰ্তব্য যে, শুকুৰবাৰে (৩ অক্টোবৰ) বিহাৰৰ মুখ্যমন্ত্ৰী নীতিশ কুমাৰে মুখ্যমন্ত্ৰী মহিলা ৰোজগাৰ যোজনাৰ অধীনত ২৫ লাখ মহিলা হিতাধিকাৰীৰ প্ৰতিগৰাকীক ১০ হাজাৰ টকা প্ৰদান কৰে। ঊনত্ৰিশ আগষ্টত ঘোষণা কৰা আৰু ২৬ ছেপ্টেম্বৰত প্ৰধানমন্ত্ৰী নৰেন্দ্ৰ মোদীয়ে আৰম্ভ কৰা এই আঁচনিখনত বৰ্তমান এক কোটি মহিলা হিতাধিকাৰী আছে।
মহিলা ভোটাৰৰ হাৰ সৰ্বাধিক হ্ৰাস পোৱা জিলাখন হ’ল গোপালগঞ্জ, য’ত মহিলা ভোটাৰৰ সংখ্যা ১৫.১% অৰ্থাৎ ১ লাখ ৫০ হাজাৰ মহিলা ভোটাৰ হ্ৰাস পাইছে, তাৰ পাছতে আছে মধুবনী জিলা, য’ ত ১ লাখ ৩০ হাজাৰ মহিলা ভোটাৰ আৰু পূব চম্পাৰণ জিলাৰ ১, ১০,০০০ মহিলা ভোটাৰৰ নাম আঁতৰোৱা হৈছে।
দ্য ট্ৰিবিউনৰ প্ৰতিবেদন অনুসৰি আন দুখন জিলা সাৰণ আৰু ভাগলপুৰতো প্ৰায় এক লাখ মহিলা ভোটাৰৰ নাম আঁতৰ কৰা হৈছে।
সৰ্বাধিক ভোটাৰ বাদ পৰা ছখন জিলা – গোপালগঞ্জ, মধুবনী, পূব চম্পাৰণ, সাৰণ, ভাগলপুৰ, আৰু পাটনাত মুঠ ৫৯ খন বিধানসভাৰ আসন আছে।
উল্লেখ্য যে ২০২০ চনৰ বিহাৰ বিধানসভা নিৰ্বাচনত বিৰোধী দলৰ মহাজোটে এই ৫৯ খন আসনৰ ভিতৰত ২৫খন আসন লাভ কৰাৰ বিপৰীতে এন ডি এয়ে ৩৪খন আসন লাভ কৰিছিল।
