বিহাৰত বৃহৎ ব্যৱধানত জয়লাভ কৰিছে এন ডি এ-ই। ২০০ৰো অধিক আসন লাভ কৰি তেওঁলোকে বিৰোধী শিবিৰ বিধ্বস্ত কৰিছে। নিৰ্বাচনৰ ফলাফল সন্দৰ্ভত চৰ্চা চলি আছে। জানিব পৰা মতে বিহাৰৰ ২৪৩ গৰাকী নৱনিৰ্বাচিত বিধায়কৰ ভিতৰত ৯০ শতাংশই কোটিপতি।
তথ্য অনুসৰি বিধানসভাত কোটিপতিৰ সংখ্যা পূৰ্বৰ তুলনাত ৯ শতাংশ বৃদ্ধি পাইছে। আটাইতকৈ তাৎপৰ্যপূৰ্ণ কথাটো হ’ল ১০২জন বিধায়কৰ বিৰুদ্ধে আছে অপৰাধমূলক গোচৰ। তালিকাৰ শীৰ্ষত বিজেপি।
শপতনামাৰ বিশ্লেষণত দেখা গৈছে যে ২১৮ জন বিধায়কৰ মুঠ সম্পত্তি এক কোটি টকাতকৈও অধিক। যোৱা বিধানসভাত এই সংখ্যা আছিল ১৯৪ (৮১ শতাংশ)। পূৰ্বৰ বিধানসভাৰ তুলনাত বিধায়কৰ গড় সম্পত্তি প্ৰায় দুগুণ বৃদ্ধি পাইছে।
এছ’চিয়েশ্যন অৱ ডেম’ক্ৰেটিক ৰিফৰ্মছ এণ্ড ইলেকচন ৱাচৰ বিশ্লেষণ অনুসৰি ২০২০ চনত বিজয়ী প্ৰাৰ্থীসকলৰ গড় সম্পত্তি আছিল ৪.৩২ কোটি টকা। এইবাৰ সেয়া ৯.২ কোটি টকালৈ বৃদ্ধি পাইছে।
পৰিসংখ্যা অনুসৰি, জেডিইউৰ ৮৫জন বিধায়কৰ ভিতৰত ৭৮জন কোটিপতি। বিজেপিৰ ৮৯জন বিধায়কৰ ভিতৰত ৭৭জন কোটিপতি। আৰজেডিৰ ২৫ জন বিধায়কৰ ভিতৰত ২৪ জন, এলজিপি (ৰাম বিলাস)ৰ ১৯ জন বিধায়কৰ ভিতৰত ১৬ জন আৰু হিন্দুস্তানী আৱাম মৰ্চা (ধৰ্মনিৰপেক্ষ)ৰ ৫ জন বিধায়কৰ ভিতৰত ৪ জন বিধায়কৰ সম্পত্তি ১ কোটি টকাৰ অধিক।
কংগ্ৰেছ (৬), এম আই এম (৫), ৰাষ্ট্ৰীয় লোক মৰ্চাৰ (৪) প্ৰতিজন বিধায়ক কোটিপতি। চিপিআইৰ একমাত্ৰ বিধায়ক তথা চিপিআইএমএলৰ দুজন বিজয়ী প্ৰাৰ্থীৰ ভিতৰতো এজন এই তালিকাত আছে।
এই নিৰ্বাচনত বিজয়ী প্ৰাৰ্থীৰ ভিতৰত আটাইতকৈ ধনী হৈছে মুংগেৰৰ পৰা নিৰ্বাচিত বিজেপিৰ মুংগেশ কুমাৰ। তেওঁৰ সম্পত্তি ১০৭ কোটিতকৈও অধিক। ইয়াৰ পিছতে আছে মকামাৰ পৰা জেডিইউৰ বিধায়ক অনন্ত সিং। তেওঁৰ মুঠ সম্পত্তি ১০০ কোটি টকা। তথ্য অনুসৰি বিহাৰৰ নৱনিৰ্বাচিত বিধায়কসকলৰ মুঠ সম্পত্তিৰ পৰিমাণ প্ৰায় ২১৯৩ কোটি টকা।
এইবাৰ নিৰ্বাচিত হোৱা বিধায়কৰ ভিতৰত ১০২জনৰ বিৰুদ্ধে গুৰুতৰ অপৰাধমূলক অভিযোগ আছে। ইয়াৰে ৬ জনৰ বিৰুদ্ধে আছে হত্যাৰ অভিযোগ। ১৯ জনৰ বিৰুদ্ধে আছে হত্যাৰ চেষ্টাৰ অভিযোগ। ৯ জনৰ বিৰুদ্ধে মহিলাৰ বিৰুদ্ধে অপৰাধৰ দৰে গুৰুতৰ অপৰাধৰ অভিযোগ আছে।
এই তালিকাৰ শীৰ্ষত আছে বিহাৰৰ পৰা ‘জংগলৰাজ’ নিৰ্মূল কৰাৰ প্ৰতিশ্ৰুতি দিয়া বিজেপি। ইয়াৰ ৪৩জন বিধায়কৰ বিৰুদ্ধে অপৰাধমূলক অভিযোগ আছে। ইয়াৰ পিছতে বিজেপিৰ মিত্ৰ দল জেডিইউ (২৩)। লালু প্ৰসাদ যাদৱৰ দল আৰজেডিৰ অভিযুক্ত বিধায়কৰ সংখ্যা ১৪ জন।
