সাৰথি এখন দ্ৰুতবেগী কে.টি.এম বাইক। বাইকখনৰ গতিৰ ভৰসাতে কৰি আহিছিল ইটোৰ পিছত সিটো ডকাইতি। পথৰ কাষেৰে গৈ থকা যাত্ৰীৰ পৰা কাঢ়ি নিছিল আ-অলংকাৰসহ মূল্যবান সম্পদ। এনেদৰে মুঠ ৬৫ টা ডকাইতি কৰাৰ অন্তত অৱশেষত আৰক্ষীৰ জালত পৰিল চিলনী চোৰ।
এই কে.টি.এম বাইক আৰোহী ডকাইত গৰাকী ধৰা পৰিছে উত্তৰ প্ৰদেশত। মঙলবাৰে ৩৯ নং ছেক্টৰত নয়ডা আৰক্ষীয়ে গ্ৰেপ্তাৰ কৰে নজাকত নামৰ দুষ্কৃতিকাৰীজনক। দিল্লী-এনচিআৰ এলেকাত এনকাউণ্টাৰৰ অন্তত আৰক্ষীয়ে গ্ৰেপ্তাৰ কৰিবলৈ সক্ষম হয় নজাকতক।
প্ৰকাশিত খবৰ অনুসৰি চোৰাংচোৱা দলে দিয়া তথ্যৰ ভিত্তিত আৰক্ষীয়ে তালাচী আৰম্ভ কৰিছিল। তালাচীৰ সময়ত নজাকতক দেখা পোৱাৰ পিছতে আৰক্ষীয়ে তেওঁক চাৰিওফালৰ পৰা ঘেৰি ধৰে।
এনে পৰিস্থিতিৰ পৰা ৰক্ষা পৰাৰ আশাত নজাকতে আৰক্ষীৰ ওপৰত প্ৰথমে গুলীচালনা কৰে আৰু আত্মৰক্ষাৰ্থে আৰক্ষীয়ে গুলীচালনা আৰম্ভ কৰে বুলি সদৰী কৰিছে এগৰাকী আৰক্ষী বিষয়াই। আৰক্ষীৰ গুলীচালনাত আহত নজাকতক আটক কৰি আৰক্ষীয়ে চিকিৎসাৰ বাবে চিকিৎসালয়লৈ লৈ যায়।
ঘটনা সন্দৰ্ভত নয়ডাৰ এগৰাকী শীৰ্ষ আৰক্ষী বিষয়াই দিয়া ভাষ্য মতে দীৰ্ঘদিন ধৰি আৰক্ষীয়ে নজাকতক ধৰিবলৈ চেষ্টা চলাই আছিল। দিল্লী-এনচিআৰৰ অন্যতম আতংকস্বৰূপ দুষ্কৃতিকাৰী নজাকতক গ্ৰেপ্তাৰ কৰাৰ বাবে ডকাইতিৰ গোচৰ হ্ৰাস পাব বুলি আশা প্ৰকাশ কৰিছে বিষয়াগৰাকীয়ে।
আৰক্ষীয়ে ধৃত নজাকতৰ পৰা ডকাইতিত ব্যৱহৃত কে.টি.এম বাইকখনৰ লগতে অবৈধ পিষ্টল আৰু মোবাইল ফোন জব্দ কৰে। নজাকতৰ বিৰুদ্ধে ডকাইতি, চিলনী চুৰিৰ ৬৫ টাতকৈও অধিক গোচৰ পঞ্জীয়ন হৈ আছে বুলি আৰক্ষীয়ে জানিবলৈ দিছে।