পাকিস্তান পিপলছ পাৰ্টিৰ অধ্যক্ষ বিলাৱাল ভুট্টো জাৰ্দাৰী পাকিস্তানৰ পৰৱৰ্তী বৈদেশিক মন্ত্ৰী হিচাপে মনোনীত হৈছে। দুইদিনৰ ভিতৰত তেওঁ বৈদেশিক মন্ত্ৰী হিচাপে শপত লোৱাৰ সম্ভাৱনা আছে।
পাকিস্তানৰ প্ৰধানমন্ত্ৰীৰ উপদেষ্টা কামাৰ জামান কাইৰাই লণ্ডনৰ সংবাদ মাধ্যমৰ আগত এই কথা সদৰি কৰে।
তেওঁ কয় যে এই সন্দৰ্ভত ইতিমধ্যে সিদ্ধান্ত লোৱা হৈছে। বিলাৱাল ভুট্টো জাৰ্দাৰীয়ে কাৰ্যভাৰ গ্ৰহণ কৰাত কোনো বাধা নাই।
পাকিস্তান পিপলছ পাৰ্টি প্ৰধানমন্ত্ৰী শ্বেহবাজ শ্বৰীফৰ নেতৃত্বত পাকিস্তানৰ বৰ্তমানৰ মিত্ৰজোঁট চৰকাৰৰ দ্বিতীয় সৰ্ববৃহৎ দল।
শেহতীয়া ৰাজনৈতিক অস্থিৰতাৰ ফলশ্ৰুতিত ইমৰান খান চৰকাৰৰ উৎখাতৰ পিছত যোৱা ১১ এপ্ৰিলত পাকিস্তান মুছলিম লীগৰ (এন) প্ৰধান শ্বেহবাজ শ্বৰীফ পাকিস্তানৰ প্ৰধানমন্ত্ৰী হিচাপে নিৰ্বাচিত হৈছিল।
প্ৰাক্তন প্ৰধানমন্ত্ৰী নৱাজ শ্বৰীফৰ ভাতৃ শ্বেহবাজে নেচনেল এচেম্বলীত ইমৰান খানৰ বিৰুদ্ধে বিৰোধীৰ অনাস্থা অভিযোগৰ নেতৃত্ব দিছিল।
