দেশৰ ইতিহাসৰ এক কলংকিত অধ্যায় গুজৰাটৰ নৃশংস গোধৰা কাণ্ডৰ সময়ত সংঘটিত হোৱা বিলকিছ বানো দলবদ্ধ ধৰ্ষণ কাণ্ড তথা তেওঁৰ পৰিয়ালক হত্যা কৰাৰ অপৰাধত দোষী সাব্যস্ত হোৱা ১১ গৰাকী অপৰাধীৰ মুক্তিক প্ৰত্যাহ্বান জনাই উচ্চতম ন্যায়ালয়ত বিলকিছ বানোৱে দাখিল কৰা আবেদনৰ শুনানি আজি বাতিল হয়।
বিলকিছ বানোৰ আবেদনৰ শুনানি গ্ৰহণ কৰিবলগীয়া উচ্চতম ন্যায়ালয়ৰ বিচাৰপীঠৰ অংশ ন্যায়াধীশ বেলা এম ত্ৰিবেদীয়ে নিজকে বিচাৰপীঠৰ পৰা আঁতৰাই ৰখাৰ বাবে আজি শুনানি স্থগিত ৰাখিবলগীয়া হয়।
ন্যায়াধীশ অজয় ৰাস্তোগীৰ এজনীয়া বিচাৰপীঠৰ সন্মুখত এই আবেদন তালিকাভুক্ত কৰা হৈছিল। বিলকিছ বানোৱে দুখন পৃথক আবেদন যোগে গুজৰাট চৰকাৰে ১৫ আগষ্টত দোষীক ক্ষমাদান কৰি মুকলি কৰি দিয়াৰ সিদ্ধান্তক প্ৰত্যাহ্বান জনাইছিল।
“আকৌ এবাৰ ন্যায়ৰ দুৱাৰত টুকুৰিয়াই লোৱাৰ সিদ্ধান্ত গ্ৰহণ মোৰ বাবে সহজ নাছিল। মোৰ সমগ্ৰ পৰিয়াল আৰু মোৰ জীৱন ধ্বংস কৰা মানুহবোৰ মুকলি হোৱাৰ পিছত বহুদিনলৈকে মই কেৱল অবাক হৈ পৰিছিলো।”- আবেদন দাখিল কৰাৰ সময়ত বানোৱে সাংবাদিকৰ আগত এই মন্তব্য কৰিছিল।
উল্লেখ্য যে ২০০২ চনৰ গুজৰাটৰ নৃশংস গোধৰা সাম্প্ৰদায়িক সংঘৰ্ষৰ সময়ত সেই সময়ৰ ২১ বৰ্ষীয় বিলকিছ বানোক দলবদ্ধ ধৰ্ষণ কৰা হৈছিল। সেই সময়ত বানো আছিল ৫ মহীয়া গৰ্ভৱতী। তদুপৰি বানোৰ তিনি বছৰীয়া কন্যাকে ধৰি পৰিয়ালৰ ৯ জন সদস্যক হত্যা কৰিছিল দুৰ্বৃত্তৰ দলটোৱে।
২০০৮ চনত আদালতে বিলকিছ বানো ধৰ্ষণ তথা হত্যাৰ এই গোচৰত ১১ গৰাকী অভিযুক্তক দোষী সাব্যস্ত কৰি আজীৱন কাৰাদণ্ডৰে দণ্ডিত কৰিছিল যদিও ১৫ আগষ্টত গুজৰাট চৰকাৰে আটাইকেইগৰাকী ধৰ্ষণকাৰীকে মুক্তি দিছিল।
যোৱা ১৫ আগষ্ট অৰ্থাৎ স্বাধীনতা দিৱসত গুজৰাট চৰকাৰে পূৰ্বৰ ৰেমিছন নীতিৰ আধাৰত দোষীক মুকলি কৰি দিয়াৰ পিছত দেশজুৰি ব্যাপক ক্ষোভৰ সৃষ্টি হৈছিল। বিশেষকৈ ধৰ্ষণকাৰী অপৰাধীসকলক কাৰাগাৰৰ পৰা মুকলি কৰি দিয়াৰ পিছত এক হিন্দুত্ববাদী সংগঠনে নায়কৰ দৰে আদৰণি জনোৱাক লৈ তীব্ৰ প্ৰতিক্ৰিয়াৰ সৃষ্টি হৈছিল।
ৰেমিছন নীতিৰ অধীনত গুজৰাট চৰকাৰে ১১ গৰাকী দোষীক মুকলি কৰাৰ পদক্ষেপ গ্ৰহণ কৰাৰ পিছত কেন্দ্ৰয়ো এই মুক্তিৰ গতি দ্ৰুত কৰি দুসপ্তাহৰ ভিতৰতে দোষীৰ মুক্তিৰ পথ মুকলি কৰি তুলিছিল। গুজৰাট চৰকাৰৰ এই সিদ্ধান্তই সমগ্ৰ দেশজুৰি তীব্ৰ চাঞ্চল্যৰ সৃষ্টি কৰাৰ পিছতেই শীৰ্ষ আদালতৰ দ্বাৰস্থ হৈছিল কেইবাগৰাকীও মহিলা কৰ্মী।
এতিয়া বিলকিছ বানোৱে নিজেই দোষীৰ এই মুক্তিৰ বিৰোধিতা কৰি উচ্চতম ন্যায়ালয়ত এক আবেদন দাখিল কৰিছে। এই আবেদনত বানোৱে দোষীৰ মুক্তিৰ ক্ষেত্ৰত গুজৰাটৰ পৰিৱৰ্তে মহাৰাষ্ট্ৰইহে সিদ্ধান্ত ল’ব লাগে বুলি উল্লেখ কৰিছে।
