বিশ্বনাথ জিলাৰ অন্তৰ্গত বেদেতীৰ এগৰাকী যুৱতীক সোমবাৰে নিশা বিশ্বনাথ জিলা আৰক্ষীৰ এটা দলে অৰুণাচলৰ চীন সিমান্তৰ অতি দুৰ্গম অঞ্চল টাকচিঙৰ পৰা উদ্ধাৰ কৰি আনে।
উল্লেখযোগ্য যে ১৭ বছৰীয়া আদিবাসী সম্প্ৰদায়ৰ এই যুৱতী গৰাকীক আজিৰ পৰা প্ৰায় ৬/৭ বছৰ পূৰ্বে বেদেতীৰে নিজৰ মোমায়েক বাবুল লোহাৰে লখিমপুৰলৈ নি কোনো লোকৰ হাতত বিক্ৰী কৰি আহিছিল।
পিছত সেই লোকজনে যুৱতীগৰাকীক এজন অৰুণাচলী লোকক বিক্ৰী কৰে, যাৰ ফলত অৰুণাচল-চীন সীমান্তৰ টাকচিঙৰ অৰুণাচলী লোকৰ ঘৰত যোৱা ৬-৭ বছৰে বনকৰা ছোৱালীৰ জীবন অতিবাহীত কৰিবলৈ বাধ্য হৈছিল।
এনেতে আজি কিছুদিন পূৰ্বে কৰ্মসূত্ৰে অৰুণাচলৰ উক্ত অঞ্চললৈ যোৱা জনৈক ৰাজীব ভূঞা নামৰ এজন লোকে ফেচবুকত এটা পোষ্ট দিয়াত এই সমগ্ৰ ঘটনাটো পোহৰলৈ আহে। আৰু কেইজনমান সাংবাদিক আৰু বিহালী আছা, আটছাৰ সহযোগত যুৱতী গৰাকীৰ পৰিয়ালৰ লোকে তেওঁৰ সন্ধান উলিয়াবলৈ বিহালী থানাত এখন এজাহাৰ দাখিল কৰে।
ইয়াৰ পিছতে বিশ্বনাথৰ আৰক্ষী অধীক্ষক ৰাকেশ ৰোশ্বনৰ তত্বাৱধানত বিহালী থানাৰ এটা অভিযান চলাই অবশেষত সোমবাৰে নিশা অৰুণাচলৰ উক্ত স্থানৰ পৰা যুৱতী গৰাকীক উদ্ধাৰ কৰিবলৈ সক্ষম হয়।
আনহাতে উক্ত ঘটনাৰ সৈতে জড়িত যুৱতীগৰাকীৰ মোমায়েক বাবুল লোহাৰক আৰক্ষীয়ে গ্ৰেপ্তাৰ কৰিছে বুলি জানিব পৰা গৈছে।