বিশ্বনাথ জিলাক কণ্টেনমেণ্ট জনৰ পৰা মুক্ত কৰিবনে? নতুন এছঅ’ পি ঘোষণাৰ আগে আগে এই প্ৰসঙ্গক লৈ উৎকণ্ঠিত হৈ পৰিছে বিশ্বনাথবাসী।
ক’ৰণা যথেষ্ঠ কম হোৱাৰ পিছত এতিয়া সাধাৰণ জনতাৰ জীৱন-জীৱিকাক লৈ এতিয়া সৰ্বত্ৰ চৰ্চা চলিছে। আনকি চচিয়েল মিডিয়াত বৃদ্ধি পাইছে এই সংক্ৰান্তীয় ট্ৰলৰ সংখ্যা।
তাৰ মাজতে কন্টেইনমেন্টজন প্ৰত্যাহাৰৰ আহ্বান জনালে বিশ্বনাথ জিলা কংগ্ৰেছৰ সভাপতি দিলীপ কুমাৰ বৰুৱাই। তেওঁ এই ক্ষেত্ৰত অসম চৰকাৰক ভগৱানে সুমতি দিয়ক বুলি উল্লেখ কৰি কোভিড ১৯ মহামাৰী সংক্ৰমণ প্ৰতিৰোধ কৰাৰ ক্ষেত্ৰত চৰকাৰে লোৱা সিদ্ধান্তত দুখীয়া- নিচলালোকৰ জীৱন নিৰ্বাহৰ উপায়ৰ বিষয়ে কোনো ধৰণৰ নিৰ্দেশনা নথকাত তেওঁলোকৰ জীৱনৰ প্ৰতি ভাবুকি আনিছে বুলি মন্তব্য কৰে।
চৰকাৰে জাৰি কৰা এচ অ’ পিৰ জৰিয়তে লগোৱা প্ৰতিবন্ধকতাৰ বাবে ভিক্ষাৰীয়ে ভিক্ষা খুজিব নোৱাৰা পৰিস্থিতি হৈছে বুলি উল্লেখ কৰি বিশ্বনাথত কোভিড সংক্ৰমণৰ হাৰ বহুত কম হোৱাৰ পিছতো লখিমপুৰ আৰু শোণিতপুৰ জিলাৰ লগত তুলনা কৰি বিশ্বনাথ জিলাখনক কন্টেইনমেন্ট কৰি ৰখাটো কোনো যুক্তি নাই মন্তব্য কৰে বৰুৱাই।
জিলাখনক কন্টেইনমেন্ট কৰি সকলো দোকান-পোহাৰ বন্ধ কৰি ৰাখক কিন্তু খাদ্য আৰু অন্য অত্যাৱশ্যকীয় সামগ্রী মানুহৰ ঘৰে-ঘৰে দিয়াৰ ব্যৱস্থা কৰক বুলিও বৰুৱাই কয়।
ইয়াৰোপৰি, কোভিড সংক্ৰমণ প্ৰতিৰোধৰ কাৰণে দিয়া বন্ধৰ ফলত ক্ষতিগ্ৰস্ত হোৱা দুখীয়া আৰু মধ্যবিত্ত লোক সকলক আৰ্থিক সাহায্য, ঋণ আৰু অন্যান্য সুবিধা প্ৰদান কৰি সকাহ দিয়াৰ ব্যৱস্থা কৰিবলৈ চৰকাৰক আহ্বান জনায়।
নতুন এচ অ’ পিৰ প্ৰসংগ উত্থাপন কৰি বিশ্বনাথ জিলাত সংক্ৰমণ কম হোৱাত জিলাখনক কন্টেইনমেন্ট মুক্ত কৰিবলৈ চৰকাৰক আহ্বান জনায়।
আজি আয়োজন কৰা সংবাদমেলত এই কথা সদৰি কৰে বিশ্বনাথ জিলা কংগ্ৰেছৰ সভাপতি দিলীপ বৰুৱাই।
লগতে অসম প্ৰদেশ কংগ্ৰেছৰ নৱ নিযুক্ত সভাপতি ভূপেন বৰা, কাৰ্য্যকৰী সভাপতি ত্ৰয় ক্ৰমে ৰাণা গোস্বামী, কমলাক্ষ দে পুৰকায়স্থ আৰু জাকিৰ হুছেইনলৈ বিশ্বনাথ জিলা কংগ্ৰেছৰ তৰফৰ পৰা অভিনন্দন জ্ঞাপন কৰে ।
