‘গান্ধীক হত্যা কৰা নাথুৰামে এতিয়া দেশ চলাইছে। বাপুজিৰ আদৰ্শক হত্যা কৰিছে নাথুৰামহ’তে’। কৃষক মুক্তি সংগ্ৰাম সমিতিৰ গান্ধীবস্তিস্থিত মুখ্য কাৰ্য্যালয়ত আজি এক সংবাদমেল সম্বোধন কৰি এই গুৰুত্বপূৰ্ণ মন্তব্য কৰে কৃষক নেতা অখিল গগৈয়ে।
তেওঁ কয়, ‘কেইদিনমান পূৰ্বে আৰ এছ এছ প্ৰধানে শিলচৰত নাগৰিকত্ব সংশোধনী বিধেয়কৰ হৈ ওকালতি কৰি গৈছে। নাগৰিকত্ব বিধেয়ক প্ৰতিৰোধ কৰাটো অসম্ভৱ হ’ব। অসমৰ সকলো জনসাধাৰণে এই বিধেয়কৰ বিৰোধিতা কৰিব লাগে, সকলো শ্ৰেণীৰ লোক সজাগ হ’ব লাগে আৰু ঐক্যবদ্ধ হ’ব লাগে’।
গান্ধীয়ে কেতিয়াও ধৰ্মৰ পৃষ্ঠপোষকতা কৰা নাছিল বুলি উল্লেখ কৰি তেওঁ কয়, ‘গান্ধীজীৰ আদৰ্শ হত্যা কৰি বিজেপি-আৰ এছ এছে এতিয়া মৌলবাদী প্ৰথা আৰম্ভ কৰিছে। গণতন্ত্ৰ বা সমাজতন্ত্ৰত বিশ্বাস কৰা সকলে এই বিধেয়কৰ বিৰোধিতা কৰিব লাগে’।
যোৱাবাৰতকৈ কঠিন ৰূপত নাগৰিকত্ব সংশোধনী বিধেয়ক আহিব বুলিও উল্লেখ কৰে কৃষক নেতা গৰাকীয়ে।
তেওঁ লগতে কয়, ‘উত্তৰ-পূবৰ কিছুমান ৰাজ্যক বিধেয়কখনৰ পৰা আঁতৰাই ৰখা হ’ব। বিশেষ ৰাজ্যৰ মৰ্যাদা পোৱা ৰাজ্য বিলাক আৰু ষষ্ঠ অনুসূচীৰ অন্তৰ্ভুক্ত ৰাজ্য সমূহক সম্ভৱতঃ এই বিধেয়কৰ পৰা আঁতৰাই ৰাখিব। তেতিয়া অসম ভয়ংকৰ বিপদৰ সন্মুখীন হ’ব’।
অসমত এতিয়া ২০ লাখ হিন্দু বাংলাদেশী আছে আৰু এই বিধেয়কখন গৃহীত হ’লে নতুনকৈ ১ কোটি ৭০ লাখ হিন্দু বাংলাদেশী ভাৰতলৈ আহিব বুলিও তাৎপৰ্যপূৰ্ণ মন্তব্য কৰে। এই তথ্য ব্যুৰো অব বাংলাদেশ ষ্টেটিষ্টিকছত আছে বুলি গগৈয়ে কয়।
আনহাতে নাগৰিকত্ব সংশোধনী বিধেয়কে অসমৰ মুখ্য মন্ত্ৰীৰ চকীখন বাংলাদেশীক দি দিব বুলিও সংবাদমেলত উল্লেখ কৰে গগৈয়ে।
তেওঁ লগতে কয়, ‘এন আৰ চিৰ বৈধতাক অস্বীকাৰ কৰাটো উচিত নহ’ব। হিন্দু-মুছলমান উভয় বিদেশীকে অসমৰ পৰা বহিস্কাৰ কৰিব লাগিব’।
ইফালে কৃষক মুক্তি সংগ্ৰাম সমিতিয়ে ১১ অক্টোবৰৰ পৰা নাগৰিকত্ব সংশোধনী বিধেয়কৰ বিৰুদ্ধে অসমৰ গাঁও, চৰ-চাপৰি, পাহাৰ, ভৈয়াম আদি সকলোতে সজাগতা অভিযান চলাব।
অক্টোবৰ মাহৰ শেষৰ ফালে সকলো জাতি-জনগোষ্ঠী, বাম পন্থী, সংখ্যালঘু সংগঠনৰ নেতাৰ উপস্থিতিত বিধেয়কৰ বিৰুদ্ধে গুৱাহাটীত কেন্দ্ৰীয় জাতীয় অভিবৰ্তন অনুষ্ঠিত কৰাৰ কথাও গগৈয়ে উল্লেখ কৰে।
‘নাগৰিকত্ব সংশোধনী বিধেয়কৰ বিৰোধিতা কৰা জাতীয় সংগঠনে বিজেপিৰ নেতাৰ সৈতে আলাপ আলোচনাত ব্যস্ত আছে। তেওঁলোকে কেবৰ বিৰুদ্ধে যিমান সংগ্ৰাম বা অভিযান চলাব লাগিছিল কোনেও চলোৱা দেখা নাই। তেওঁলোকো একত্ৰিত হৈ এই জাতিধ্বংসী বিধেয়কৰ বিৰুদ্ধে যুঁজ দিব লাগে’ বুলিও মন্তব্য কৰে অখিল গগৈয়ে।