বিজেপি আৰু আৰ এছ এছে নাগৰিকত্ব সংশোধনী বিধেয়ক আনি অসম চুক্তি আৰু এন আৰ চিক দলিয়াই পেলাব বিচাৰিছে বুলি মন্তব্য কৰিছে প্ৰাক্তন মুখ্য মন্ত্ৰী তৰুণ গগৈয়ে।
গগৈয়ে আজি নিউ মিনিষ্টাৰ কলনিত থকা তেওঁৰ আবাসত এখন সংবাদমেল সম্বোধন কৰে।
“কেব” আনিলে অসমৰ ভাষা, কলা-সংস্কৃতি শেষ হৈ যাব বুলি শংকা প্ৰকাশ কৰি গগৈয়ে বিজেপিয়ে এই কামটোকে কৰিবলৈ উঠি-পৰি লাগিছে বুলি দাবী কৰে। তেওঁৰ মন্তব্য, “বিজেপিয়ে জাতি-মাটি-ভেটি বিক্ৰী কৰিবলৈ ওলাইছে”।
“বিজেপিৰ ৰাজ্যিক নেতৃত্বই মোদী-অমিত শ্বাহক “হয় হুজুৰ” কৰি অসমীয়া জাতিৰ ধ্বংসযজ্ঞ পাতিছে। অগপ নেতা অতুল বৰা, প্ৰফুল্ল মহন্তই ইয়াত ঘিউ ঢালিছে। মুখেৰে তেওঁলোকে বিৰোধ কৰি আছে বিলখনৰ। অগপই ভাষা-সংস্কৃতি ৰক্ষাৰ কথা কয় যদিও এতিয়া স্থিতি নৰম দেখা গৈছে”, গগৈয়ে কয়।
আছু, অসম সাহিত্য সভা আৰু কৃষক মুক্তিৰ দৰে দল-সংগঠনবোৰৰো পদক্ষেপ বাঞ্ছনীয় ধৰণৰ নহয় বুলি অভিযোগ কৰে। এই দল-সংগঠনবোৰে আগতে বিৰোধ কৰিছিল যদিও এতিয়া নিমাত বুলি কৈ গগৈৰ মন্তব্য, “আগতে আমাক গালি পাৰিছিল যিকোনো কথাত। এতিয়া বুজাবুজি হ’ব পাৰে বুলি অলপ সন্দেহ আছে। লেনদেন হৈছে বুলি নকওঁ, কাৰণ মোৰ হাতত প্ৰমাণ নাই”।
বিজেপি আৰু এছ এছৰ এক সংস্কৃতি, এক জাতি, এক ধৰ্ম আৰু এক দলৰ মনোভাব গণতন্ত্ৰৰ বাবে ক্ষতিকাৰক আখ্যা প্ৰাক্তন মুখ্য মন্ত্ৰীজনৰ।
হিন্দু বাংলাদেশীসকল অত্যাচাৰৰ বলি হৈ ভাৰতলৈ অহা বুলি বিজেপিয়ে চলাই অহা প্ৰচাৰ সন্দৰ্ভত মন্তব্য দি গগৈৰ মন্তব্য, “মোৰ দিনত এজনো অত্যাচাৰৰ বলি হৈ অহা আবেদন নাছিল, মহন্তৰ দিনতো অহা নাছিল। ১৯৮৬-ৰ পৰা ২০১৬-লৈকে এজনো শৰণাৰ্থী অত্যাচাৰৰ বলি হৈ অহা নাই। এওঁলোকে এতিয়া শৰণাৰ্থীক নিমন্ত্ৰণ কৰিছে”।
প্ৰাক্তন সতীৰ্থ আৰু এতিয়াৰ বিজেপি মন্ত্ৰী হিমন্তক উভতি ধৰি গগৈয়ে কয়, “এন আৰ চিখন ৰিজেক্ট কৰিবলৈ হিমন্ত বিশ্ব শৰ্মা কোন? কেন্দ্ৰীয় চৰকাৰে এইখন ৰিজেক্ট কৰিব পাৰে। কিন্তু ৰিজেক্ট কৰাও ইমান সহজ নহয়। যদি “কেব” আনিব বিচাৰিছিলেই ইমান হাজাৰ কোটি টকা খৰচ কৰি এইখন কিয় প্ৰস্তুত কৰিলে? আমি এন আৰ চি ৰিজেক্ট নকৰো, কিন্তু পুনৰীক্ষণ বিচাৰো।”
“হিমন্তই ছিণ্ডিকেটো চিনি নাপায়, সাৰদাকো চিনি নাপায়, প্ৰদ্যুতকো চিনি নাপায়, কেইদিনমানৰ পাছত ক’ব তৰুণ গগৈকো চিনি নাপাওঁ। বিজেপি চৰকাৰ যদি দুই নম্বৰী, হিমন্ত তিনি নম্বৰী।” গগৈৰ কটাক্ষ।
মোদীৰ আমেৰিকা ভ্ৰমণৰ সময়ৰ “হাউডি মোদী” অনুষ্ঠানটোকো কটাক্ষ কৰি গগৈয়ে কয়, “দুয়োজনে ভাল নাটক কৰিলে। মোদীয়ে অমিতাভ বচ্চনৰ দৰেই অভিনয় কৰিলে, ট্ৰাম্পতো অভিনয়ত এখোপ চৰা, ভালদৰে সাৱটা-সাৱটি ধৰি ভাল অভিনয় কৰিলে। ট্ৰাম্প কম মানুহ নহয়। পাকিস্তানৰ লগতো আলোচনা কৰিলে মোদীক লগ কৰাৰ পিছদিনাই। তেওঁ পাকিস্তানে সন্ত্ৰাসবাদ কৰিছে বুলি কেতিয়াও পোনপটীয়াকৈ কোৱা নাই।”
ৰাজ্যৰ সাম্প্ৰতিক অৱস্থাৰ কথা ক’বলৈ গৈ গগৈয়ে কয়, “অসমত ল’ৰা ৰজাৰ শাসন চলি আছে। অসমত আইন-শৃংখলা চলাই নাই, কোনো নিয়ন্ত্ৰণ নাই। তেওঁলোক কেৱল কমিশ্যনত ব্যস্ত। আৰক্ষী বিষয়াক ছিণ্ডিকেট কৰিবলৈ লগাই দিছে। যোৰহাট কাণ্ডৰ মূল অভিযুক্তক চাৰ্জছীটত সাক্ষী সজাই দিলে তেওঁ বিজেপি নেতা আছিল বাবে।”
ৰাজ্যত উপ-নিৰ্বাচনৰ বাবে নিৰ্বাচনী অধিসূচনা জাৰি হোৱাৰ পাছতো কালি চৰকাৰে দুখনকৈ আঁচনি ঘোষণা আৰু মুকলি কৰাকো সমালোচনা কৰে গগৈয়ে।