২০১৬ চনৰ পূৰ্বে বহু সপোন দেখুৱাই শাসনলৈ অহা বিজেপিয়ে পুনৰ পূৰ্বৰ দৰে সপোনভৰা প্ৰতিশ্ৰুতিৰে ১০ টা বিশেষ সংকল্পৰে প্ৰকাশ কৰি উলিয়ালে নিৰ্বাচনী ইস্তাহাৰ।
য’ত উল্লেখ নাই অসমৰ মূল সমস্যা হিচাপে পৰিগণিত হোৱা ছয় জনগোষ্ঠীৰ জনজাতিকৰণৰ প্ৰসংগৰ লগতে অসমৰ “হৃদপিণ্ড” অসম চুক্তিৰ ৬ নং দফা ৰূপায়ণৰ প্ৰসংগ।
ইপিনে, কেন্দ্ৰত ৭ বছৰ থাকিও বানপানী সমস্যা সমাধান কৰিব নোৱাৰা বিজেপি চৰকাৰে এইবাৰ পুনৰ সংকল্প ল’লে যে অসমৰ জনগণক বানৰ বিভীষিকাৰ পৰা মুক্ত কৰা হ’ব আৰু শদিয়াৰ পৰা ধুবুৰীলৈ ব্ৰহ্মপুত্ৰ খনন কৰা হ’ব।
ইপিনে, নিৰ্বাচনৰ পূৰ্বে হিতাধিকাৰী সৃষ্টিৰ ৰাজনীতি কৰি বিজেপিৰ সংকল্প “৩০ লাখ পৰিয়ালক সামৰি ৮৩০ টকাৰ পৰিৱৰ্তে ৩০০০ টকালৈ বৃদ্ধি কৰা হ’ব।‘’
ইপিনে, বিজেপিৰ শাসনকালত এক “বুমেৰাঙ”ত পৰিণত হোৱা NRC পুনৰ শৃংখলাকৃতৰূপত সংশোধনৰ সংকল্প ল’লে বিজেপিয়ে।
আনহাতে, ২০১৬ চনত ২৫ লাখ যুৱকক সংস্থাপন দিম বুলি প্ৰতিশ্ৰুতি দি শাসনলৈ আহি মাত্ৰ ৮০০০০ সংস্থাপন দিয়া বিজেপিয়ে এইবাৰ পুনৰ দিলে ২০২২ চনৰ ৩১ মাৰ্চৰ ভিতৰত ১ লাখ চাকৰি আৰু ৫ বছৰত মুঠ ২ লাখ চাকৰিৰ প্ৰতিশ্ৰুতি। লগতে ব্যক্তিগত খণ্ডত ৮ লাখ চাকৰি দিয়াৰ প্ৰতিশ্ৰুতি।
ইয়াৰোপৰি দোহাৰিলে নামঘৰ সুদৃঢ়কৰণ আৰু সত্ৰৰ অধিকাৰ সুৰক্ষাৰ বাবে “টাস্ক ফৰ্চ” গঠন আৰু ২.৫ লাখ টকাৰ আৰ্থিক সাহায্যৰ প্ৰতিশ্ৰুতি।
অষ্টম শ্ৰেণীৰ পৰা সকলো ছাত্ৰ-ছাত্ৰীক চাইকেল প্ৰদানৰো সংকল্প সদৰী কৰে বিজেপিয়ে। লগতে ভূমিহীন লোকক ভূমিৰ অধিকাৰ, ৰাজনৈতিক অধিকাৰ সুৰক্ষাৰ বিষয়েও উল্লেখ কৰে ১০ সংকল্পৰ ভিতৰত।
ইপিনে, “কা” আন্দোলন বা প্ৰসংগই নিৰ্বাচনৰ ফলাফলত কোনো প্ৰভাৱ নপৰে বুলি দাবী কৰি থকা বিজেপিয়ে পৰাজয়ৰ আশংকাত “কা” বলৱৎ সন্দৰ্ভত এটাও সংকল্প ১০ সংকল্পৰ ভিতৰত অন্তৰ্ভুক্ত নকৰিলে।
অৱশ্যে, অন্যান্য প্ৰতিশ্ৰুতিৰ লগতে ৫ বছৰে নোৱাৰা ৬ জনগোষ্ঠীক জনজাতিকৰণৰ সমস্যা সমাধান কৰিব নোৱাৰাৰ পাছতো ইস্তাহাৰত পুনৰ উল্লেখ কৰিছে জনজাতিকৰণৰ প্ৰতিশ্ৰুতি।
