ত্ৰিপুৰাৰ বাধাৰঘাট বিধানসভা সমষ্টিৰ উপ নিৰ্বাচনত শুকুৰবাৰে বিজেপি প্ৰাৰ্থী মিনি মজুমদাৰে জয়লাভ কৰিছে।
মিনি মজুমদাৰে প্ৰতিদ্বন্দ্বি চি পি আই(এম)ৰ প্ৰাৰ্থী বুলতি বিশ্বক ৫২৫৯ টা ভোটৰ ব্যৱধানত পৰাজিত কৰি বিজয় সুনিশ্চিত কৰে।
নিৰ্বাচনী বিষয়াৰ তথ্য অনুসৰি বিজেপি প্ৰাৰ্থী মিনি মজুমদাৰে মুঠ ২০,৪৮৭ টা ভোট লাভ কৰাৰ বিপৰীতে তেওঁৰ নিকটতম চি পি আই(এম)ৰ প্ৰতিদ্বন্দ্বি গৰাকীয়ে লাভ কৰে ১৫,২১২ টা ভোট।
আনহাতে, কংগ্ৰেছৰ প্ৰাৰ্থী ৰতন চন্দ্ৰ দাসে ৯,১০৫ টা ভোট আৰু এছ য়ু চি আই(চি)ৰ প্ৰাৰ্থী মৃদুল কান্তি সৰকাৰে লাভ কৰে মাত্ৰ ৪৭০ টা ভোট।
তদুপৰি, ৬৬৭ টা গৰাকী ভোটাৰে নোটাত ভোট দান কৰে বুলি জানিব পৰা গৈছে।
বিগত ২৩ ছেপ্টেম্বৰত বিধানসভা সমষ্টিটোত অনুষ্ঠিত হোৱা উপ নিৰ্বাচনত মুঠ ৫৭,৯০৬ গৰাকী ভোটাৰে ভোট দান কৰিছিল।
উপ নিৰ্বাচনত বিজয়ী হৈ বিজেপি প্ৰাৰ্থী গৰাকীয়ে ভবিষ্যতে তেওঁ সমষ্টিটোৰ ৰাইজৰ প্ৰত্যাশা পুৰণৰ বাবে কাম কৰি যাব বুলি মন্তব্য কৰে।
‘‘সমষ্টি বাসীয়ে মোৰ ওপৰত বিশ্বাস ৰাখিলে। মই সদায় তেওঁলোকৰ ভালৰ বাবে কাম কৰি যাম’’, মিনিয়ে কয়।
ত্ৰিপুৰাৰ বাধাৰঘাট বিধানসভা সমষ্টিটো বিজেপিৰ বিধায়ক দিলীপ সৰকাৰৰ ১ এপ্ৰিলত মৃত্যুৰ পাছৰে পৰা খালী হৈ আছিল।
উল্লেখযোগ্য যে, অসমৰো চাৰিখন বিধানসভা আসনৰ বাবে ২১ অক্টোবৰত উপ নিৰ্বাচন অনুষ্ঠিত হ’ব।
অসমত উপ নিৰ্বাচন অনুষ্ঠিত হ’বলগীয়া বিধানসভা সমষ্টি চাৰিটা হ’ল- ৰঙাপাৰা, সোণাৰী, জনিয়া আৰু ৰাতাবাৰী।
