দেওবাৰে দিল্লীৰ ৰামলীলা ময়দানত কংগ্ৰেছে ‘ভোট চোৰ, গাদ্দী ছোড়’ শীৰ্ষক এক বৃহৎ প্ৰতিবাদী কাৰ্যসূচী ৰূপায়ণ কৰে। এই সমাৱেশত দেশৰ বিভিন্ন প্ৰান্তৰ পৰা দলীয় নেতা-কৰ্মীসকলে অংশগ্ৰহণ কৰি বিজেপিৰ বিৰুদ্ধে অবৈধভাৱে চৰকাৰ গঠন কৰাৰ অভিযোগ উত্থাপন কৰে।
সমাৱেশত ভাষণ দি কংগ্ৰেছ নেত্ৰী প্ৰিয়ংকা গান্ধীয়ে বেলট পেপাৰৰ জৰিয়তে নিৰ্বাচন অনুষ্ঠিত কৰাৰ দাবী উত্থাপন কৰে। তেওঁ কয়, বেলট পেপাৰত নিৰ্বাচন অনুষ্ঠিত হ’লে বিজেপি জয়ী হ’ব নোৱাৰে বুলি দলটোৱে জানে।
এই প্ৰতিবাদৰ পাছতে বিজেপিয়ে তৎক্ষণাৎ প্ৰত্যাক্ৰমণ আৰম্ভ কৰে। বিজেপিৰ ৰাষ্ট্ৰীয় মুখপাত্ৰ সুধাংশু ত্ৰিবেদীয়ে এক সংবাদমেলত দাবী কৰে যে সামাজিক সাধ্যমত প্ৰচাৰিত কেইবাটাও ভিডিঅ’ত ৰামলীলা ময়দানত কংগ্ৰেছৰ একাংশ কৰ্মীয়ে ‘মোদী তেৰী কবৰ খুদেগী’ ধ্বনি দিয়া দেখা গৈছে। এই ধৰণৰ শ্ল’গানক গৰিহণা দি তেওঁ কয় যে ই প্ৰধানমন্ত্ৰী নৰেন্দ্ৰ মোদীৰ প্ৰতি হিংসাত্মক মনোভাৱ প্ৰতিফলিত কৰে।
ত্ৰিবেদীয়ে লগতে অভিযোগ কৰে যে কংগ্ৰেছ দল মুছলিম লীগ-মাওবাদী এজেণ্ডা অনুসৰণ কৰি এক অৰাজকতাৰ মঞ্চত পৰিণত হৈছে। তেওঁ দাবী কৰে যে কংগ্ৰেছে অতীততো কেইবাবাৰো প্ৰধানমন্ত্ৰী মোদী আৰু তেওঁৰ পৰিয়ালক অপমান কৰিছে।
ইয়াৰ লগতে বিজেপি মুখপাত্ৰগৰাকীয়ে এক ঐতিহাসিক তুলনা আগবঢ়াই কয় যে ৰাহুল গান্ধীৰ নেতৃত্বত কংগ্ৰেছ দলৰ ভৱিষ্যত ‘দ্য লাষ্ট মোগল’ গ্ৰন্থত বৰ্ণিত মোগল সাম্ৰাজ্যৰ দৰে হ’ব। তেওঁৰ মতে, বাবৰ, হুমায়ুন, আকবৰ, জাহাংগীৰ, শ্বাহজাহান আৰু ঔৰংজেৱ এই ছজন শাসকৰ পাছতে মোগল সাম্ৰাজ্যৰ পতন হৈছিল।
একেদৰে কংগ্ৰেছ দলত ক্ৰমে মতিলাল নেহৰু, জৱাহৰলাল নেহৰু, ইন্দিৰা গান্ধী, ৰাজীৱ গান্ধী আৰু ছোনিয়া গান্ধীয়ে নেতৃত্ব দিছিল বুলি উল্লেখ কৰি ত্ৰিবেদীয়ে কয় যে বৰ্তমান ষষ্ঠ প্ৰজন্মৰ নেতা ৰাহুল গান্ধী। “ইয়াৰ পাছত কংগ্ৰেছ দলেও একেই ভাগ্যৰ সন্মুখীন হ’ব,” বুলি তেওঁ মন্তব্য কৰে।
