“মুম্বাইৰ পৰা বলিউডক উঠাই অনাৰ চক্ৰান্ত কৰিছে বিজেপিয়ে। বলিউডক বদনাম কৰিবলৈ ষড়যন্ত্ৰ কৰিছে বিজেপিয়ে।”— পুনৰ এইদৰে চাঞ্চল্যকৰ ভাষ্য প্ৰদান কৰিছে এনচিপিৰ জ্যেষ্ঠ নেতা তথা মহাৰাষ্ট্ৰৰ মন্ত্ৰী নৱাব মালিকে।
এখন সংবাদমেলত তেওঁ কয় যে মুম্বাই ক্ৰুজ ড্ৰাগছৰ বিষয়টো বিজেপিৰ চক্ৰান্তৰ বাদে আন একো নহয়।
এইক্ষেত্ৰত তেওঁ উত্তৰ প্ৰদেশৰ মুখ্যমন্ত্ৰী যোগী আদিত্যনাথকো সাঙুৰি লয়। মালিকে জনায় যে যোগীয়ে উত্তৰপ্ৰদেশৰ নয়দাত এখন ফিল্ম চিটি স্থাপন কৰাৰ পৰিকল্পনা কৰিছে। এই অনুসৰি যোগীয়ে বলিউডৰ কেইবাজনো তাৰকাৰ স’তে বৈঠকতো বহিছে।
মুম্বাইৰ পৰা বলিউডক আঁতৰাই নিবলৈকে যোগী আদিত্যনাথ তথা বিজেপিয়ে এইসমূহ চক্ৰান্ত কৰাৰ দাবী কৰে মালিকে।
উল্লেখযোগ্য যে মুম্বাইৰ এনচিবি অফিচাৰ সমীৰ ৱাংখেৰেৰ প্ৰতি শেহতীয়াকৈ চাঞ্চল্যকৰ অভিযোগ প্ৰদান কৰি চৰ্চাত আছে নৱাব মালিক।
সংবাদমেলখনত তেওঁ স্পষ্ট কৰি দিয়ে যে ৱাংখেৰেৰ প্ৰতি তেওঁৰ যুঁজ ব্যক্তিগত নহয়।
গ্ৰেপ্তাৰৰ ২৬ দিন পাছত শ্বাহৰুখ তনয় আৰিয়ানৰ জামিন মঞ্জুৰ হোৱাৰ পাছতে বলিউড সম্পৰ্কত আগবঢ়োৱা মালিকৰ এই ভাষ্যই চাঞ্চল্যৰ সৃষ্টি কৰিছে।
