বিগত কিছুদিন ধৰি নগাঁও লোকসভা সমষ্টিত বিজেপিৰ প্ৰাৰ্থী ঘোষণাক লৈ বিভিন্ন জল্পনা-কল্পনা চলি থকাৰ মাজতে সোমবাৰে মাজনিশা বিজেপিয়ে আনুষ্ঠানিকভাৱে প্ৰকাশ কৰা তালিকাত বিধায়ক ৰূপক শৰ্মাৰ নাম সন্নিৱিষ্ট হৈছে ।
নগাঁও বিধানসভা সমষ্টিৰ বিধায়ক ৰূপক শৰ্মাৰ নাম লোকসভা সমষ্টিৰ বাবে চূড়ান্ত হোৱাৰ খবৰ ইতিমধ্যে সংবাদ মাধ্যমত প্ৰকাশ পাই আহিছে যদিও দলটোৱে আনুষ্ঠানিকভাৱে প্ৰাৰ্থীৰ নাম ঘোষণা কৰা নাছিল।
নগাওঁ সমষ্টিত বিজেপি প্ৰাৰ্থীৰ নাম ঘোষণা নকৰাৰ বাবে বিভিন্ন মহলত নতুন চৰ্চাই স্থান পাইছিল আৰু আনকি বৰ্তমানৰ সাংসদ ৰাজেন গোঁহাইক পুনৰ প্ৰাৰ্থিত্ব দিয়াৰ সম্ভাৱনাও প্ৰকাশ পাইছিল।
উল্লেখযোগ্য যে যৌন কেলেংকাৰিৰ এটা গোচৰ চলি থকাৰ বাবে সাংসদ গোহাঁয়ে নিজেই প্রতিদ্বন্দ্বিতা নকৰাৰ কথাও ঘোষণা কৰিছিল। কিন্তু সোমবাৰে সাংসদ গোঁহাইৰ গোচৰটোত উচ্চ ন্যায়ালয়ে গোঁহাইক সকাহ দিয়াৰ পৰিপ্ৰেক্ষিতত প্ৰাৰ্থিত্বৰ বাবে ৰাজেন গোঁহাইৰ নাম পুনৰ চৰ্চালৈ আহিছিল। আনকি, সোমবাৰে গোঁহায়ে মনোনয়ন পত্ৰ সংগ্ৰহ কৰি এই চৰ্চাক অধিক গতি প্ৰদান কৰিছিল।
অসমত দ্বিতীয় পৰ্যায়ত অৰ্থাৎ অহা ১৮ এপ্ৰিলত নিৰ্বাচন অনুষ্ঠিত হ’বলগীয়া নগাঁও সমষ্টিত বিজেপিয়ে বিধায়ক ৰূপক শৰ্মাকে প্ৰাৰ্থিত্ব প্ৰদান কৰি সকলো জল্পনা-কল্পনাৰ ওৰ পেলালে।
উল্লেখযোগ্য যে সমষ্টিটোত কংগ্ৰেছে ইতিমধ্যে প্ৰাক্তন মন্ত্ৰী তথা দলৰ এগৰাকী জ্যেষ্ঠ নেতা প্ৰদ্যুৎ বৰদলৈক প্ৰাৰ্থিত্ব প্ৰদান কৰিছে। এতিয়া বিজেপিৰ প্ৰাৰ্থী ঘোষণাৰ লগে লগে সমষ্টিটোত নিৰ্বাচনী প্ৰচাৰৰ যুঁজখন আকৰ্ষণীয় হৈ উঠিব বুলি আশা কৰা হৈছে।