ভাৰতীয় জনতা পাৰ্টিৰ অন্যতম গুৰুত্বপূৰ্ণ নেতা বুলি বিশ্বাস কৰা অসমৰ মুখ্যমন্ত্ৰী হিমন্ত বিশ্ব শৰ্মাৰ নামেই সলাই দিলে কৰ্ণাতক বিজেপিয়ে।
কৰ্ণাতকৰ আগুন্তুক বিধান সভাৰ নিৰ্বাচনৰ ষ্টাৰ কেম্পেইনাৰ সকলৰ নামৰ তালিকাত ভাৰতীয় জনতা পাৰ্টিয়ে ভুলকৈ লিখিলে হিমন্ত বিশ্ব শৰ্মাৰ নাম।
১০ মে’ত কৰ্ণাটকত অনুষ্ঠিত হ’বলগীয়া নিৰ্বাচনৰ পূৰ্বে বিজেপিয়ে বুধবাৰে এই তালিকা প্ৰকাশ কৰে য’ত ষ্টাৰ কেম্পেইনাৰ সকলৰ নাম সন্নিবিষ্ট কৰা হয়।
এই তালিকাত প্ৰধানমন্ত্ৰী নৰেন্দ্ৰ মোডী, কেন্দ্ৰীয় প্ৰতিৰক্ষা মন্ত্ৰী ৰাজনাথ সিং আৰু কেন্দ্ৰীয় গৃহমন্ত্ৰী অমিত শ্বাহকে ধৰি মুঠ ৪০ জনৰ নাম সন্নিবিষ্ট কৰা হৈছে।
মন কৰিবলগীয়া যে অসমৰ মুখ্যমন্ত্ৰীৰ নাম সংবাদ মাধ্যমৰ উপৰিও ৰাষ্ট্ৰীয় নেতাসকলে সঘনাই ভুলকৈ উচ্চাৰণ কৰি আহিছে। স্মৰ্তব্য যে বিজেপিৰ কেন্দ্ৰীয় কাৰ্যালয়ে অসমৰ মুখ্যমন্ত্ৰীগৰাকীৰ নাম সঠিকভাৱে উচ্চাৰণ কৰাত ব্যৰ্থ হয়। তাৰ পৰিৱৰ্তে তেওঁৰ নামটো “হেমন্ত বিশ্ব শৰ্মা” বুলি উচ্চাৰণ কৰে বহু নেতাই।
ঠিক যেন তাকেই অনুকৰণ কৰি কৰ্ণাটকৰ ষ্টাৰ কেম্পেইনাৰৰ নামৰ তালিকাত ভুলকৈয়ে লিখা হ’ল অসমৰ মুখ্যমন্ত্ৰী হিমন্ত বিশ্ব শৰ্মাৰ নাম।
তদুপৰি এই তালিকাত বৰ্তমানৰ কৰ্ণাটকৰ মুখ্যমন্ত্ৰী বাসৱৰাজ বোম্মাই আৰু প্ৰাক্তন মুখ্যমন্ত্ৰী বি এছ য়েদিয়ুৰাপ্পাৰ নামো ভুলকৈ লিখা হৈছে বুলি বহুতে দাবী কৰিছে।
এতিয়া দেশৰ বাঘা বাঘা নেতা সকলৰ নাম ভুলকৈ লিখা কথাটোৱে প্ৰতিক্ৰিয়াৰ সৃষ্টি কৰিছে সচেতন মহলৰ মাজত।
