“ধৰ্ম ৰক্ষাৰ বাবে এটা মৌলিক দল আছে। ধৰ্মৰ ওপৰত বিজেপিৰ কপিৰাইট আছে।”- এই মন্তব্য কৰিছে বিজেপিৰ এগৰাকী সাংসদ তথা প্ৰাক্তন মন্ত্ৰী ৰাজ্যবৰ্ধন সিং ৰাথোড়ে।
জয়পুৰৰ দলৰ ৰাজ্যিক মুখ্য কাৰ্যালয়ত এক সংবাদমেল সম্বোধন কৰি সাংসদ তথা বিজেপি নেতা গৰাকীয়ে বিজেপিক ধৰ্মৰ একচ্ছত্ৰী অধিকাৰী হিচাপে প্ৰক্ষেপ কৰিছে।
সংবাদ মেলত ৰাথোড়ে লগতে ৰাজস্থানৰ শাসনাধিষ্ঠ কংগ্ৰেছ দল তথা দলটোৰ শীৰ্ষ নেতা ৰাহুল গান্ধীৰ বিৰুদ্ধেও আক্ৰমণাত্মক হৈ উঠে। কংগ্ৰেছৰ ‘ভাৰত জোড়ো যাত্ৰা’- ক “ৰাহুল গান্ধীৰ পুনৰ মুকলি” যাত্ৰা আখ্যা দিয়ে বিজেপি সাংসদগৰাকীয়ে।
ৰাথোড়ৰ মতে এই ‘ৰাহুল গান্ধীৰ পুনৰ মুকলি’ যাত্ৰাত হিন্দু বিৰোধী, ভাৰত বিৰোধী লোকসকলে অংশগ্ৰহণ কৰিছে। এইদৰে ৰাহুল গান্ধীৰ পুনৰ মুকলিৰ নামত ৫০০ কোটি টকা ব্যয় কৰা হৈছে বুলিও দাবী কৰে ৰাথোড়ে।
কংগ্ৰেছে বৰ্তমানৰ বিজেপি নেতৃত্বাধীন কেন্দ্ৰীয় চৰকাৰে বিভাজনৰ ৰাজনীতি কৰাৰ অভিযোগ তুলি এই ৰাজনীতি উফৰোৱাৰ লক্ষ্যৰে ভাৰত জোড়ো যাত্ৰা আৰম্ভ কৰা বুলি ঘোষণা কৰিলেও বিজেপি নেতাগৰাকীয়ে পিছে নেহৰু-গান্ধী পৰিয়ালেহে দেশখনক বিভাজিত কৰিছে বুলি অভিযোগ কৰিছে।
ৰাথোড়ে লগতে দাবী কৰে যে কংগ্ৰেছে ডাঙৰ ডাঙৰ বক্তব্য দিয়ে, কিন্তু তেওঁলোকৰ কাম সৰু। ইয়াৰ পৰিৱৰ্তে ভাৰতীয় জনতা পাৰ্টি আৰু ৰাষ্ট্ৰীয় স্বয়ংসেৱক সংঘই ৰাজস্থানৰ সামগ্ৰিক উন্নয়নৰ বাবে কাম কৰি আছে বুলিও সংবাদ মেলত দাবী কৰে ৰাজ্যবৰ্ধন ৰাথোড়ে।
কংগ্ৰেছে বিধানসভা নিৰ্বাচনৰ পূৰ্বে নিবনুৱা ভাট্টা, কৃষি ঋণ ৰেহাই আৰু অন্যান্য বিষয়ত দিয়া প্ৰতিশ্ৰুতি পূৰণ কৰাত ব্যৰ্থ হৈছে বুলি অভিযোগ কৰি ৰাথোড়ে লগতে কয়, “কংগ্ৰেছে ইস্তাহাৰত অবৈধ খননৰ বিৰুদ্ধে কঠোৰ আইন প্ৰণয়ন কৰাৰ প্ৰতিশ্ৰুতি দিছিল।”
কিন্তু ৰাজস্থানত অবৈধ খননৰ বিৰুদ্ধে কোনো ব্যৱস্থা গ্ৰহণ কৰা হোৱা নাই বুলি দাবী কৰি সাংসদগৰাকীয়ে দলৰ বাবে ধন সংগ্ৰহ কৰিবলৈ বাধ্য হোৱাৰ বাবেই কংগ্ৰেছৰ জ্যেষ্ঠ বিষয়াসকলে খনিৰ চাৰিওফালে ঘূৰি ফুৰিছে বুলি উপহাস কৰে।
