আগন্তুক অসম বিধানসভা নিৰ্বাচনৰ বাবে ৮৮টা সমষ্টিৰ বাবে প্ৰাৰ্থী ঘোষণা কৰিছে। বিজেপিৰ এই মনোনীত প্ৰাৰ্থীসকলৰ এক উল্লেখযোগ্য সংখ্যক প্ৰাৰ্থী পূৰ্বতে বিৰোধী বা আঞ্চলিক দলৰ নেতা।
তালিকাখন বিশ্লেষণ কৰি দেখা গৈছে যে কংগ্ৰেছ, অগপ আৰু সৰু সৰু আঞ্চলিক বা জনজাতীয় সংগঠনৰ পৰা কমেও ৩০ জন প্ৰাৰ্থী অৰ্থাৎ প্ৰায় ৩৫ শতাংশই বিজেপিত স্থান লাভ কৰিছে।
ইয়াৰ ভিতৰত সৰ্বাধিক সংখ্যক ভাৰতীয় জাতীয় কংগ্ৰেছৰ প্ৰাক্তন সদস্য। প্ৰায় ১৯ জন প্ৰাৰ্থীয়ে বিজেপিলৈ গৈ প্ৰাৰ্থিত্ব লাভ কৰিছে।
ইয়াৰ ভিতৰত বিশিষ্ট মুখ হৈছে মুখ্যমন্ত্ৰী হিমন্ত বিশ্ব শৰ্মাৰ লগতে জয়ন্ত মল্ল বৰুৱা, পিয়ুজ হাজৰিকা, অজন্তা নেওগ, ৰূপজ্যোতি কুৰ্মী, ভূপেন বৰা, প্ৰদ্যুত বৰদলৈ আদি জ্যেষ্ঠ নেতা।
এনে নেতাৰ অন্তৰ্ভুক্তিয়ে নিৰ্বাচনৰ পূৰ্বে কংগ্ৰেছৰ নেতাক একত্ৰিত কৰি নিৰ্বাচনী বৈতৰণী পাৰ হোৱাৰ বিজেপিৰ কৌশলকে তুলি ধৰিছে।
তদুপৰি, এই তালিকাৰ কমেও ছয়জন প্ৰাৰ্থীৰ শিপা বিজেপিৰ মিত্ৰদল তথা অসমৰ ৰাজনীতিৰ মূল আঞ্চলিক শক্তি অসম গণ পৰিষদ (অগপ)ত।
এইক্ষেত্ৰত উল্লেখযোগ্য নামসমূহ হ’ল চন্দ্ৰ মোহন পাটোৱাৰী, পদ্ম হাজৰিকা আৰু নব কুমাৰ দলে।
বিজেপিৰ তালিকাত সৰু আঞ্চলিক আৰু জনজাতীয় সংগঠনৰ পৰা ওলাই অহা পাঁচজন নেতাকো প্ৰাৰ্থী কৰা হৈছে।
ইয়াৰ ভিতৰত পূৰ্বতে বডোলেণ্ড পিপলছ ফ্ৰণ্টৰ সৈতে জড়িত বিশ্বজিৎ দৈমাৰী আৰু মিছিং স্বায়ত্তশাসিত পৰিষদত জনজাতীয় অধিকাৰৰ নেতৃত্বৰ পৰা ৰাজনৈতিক যাত্ৰা আৰম্ভ কৰা ৰানোজ পেগু।
আন কিছুমানৰ ভিতৰত আছে টাকাম মিছিং পোৰিন কেবাং (টিএমপিকে)ৰ সৈতে জড়িত ভূবন পেগু, তিৱা জাতীয় ঐক্য মঞ্চৰ সৈতে জড়িত ৰাম কান্ত দেউৰী আৰু ৰাভা হাছং যৌথ মঞ্চৰ টংকেশ্বৰ ৰাভা।
ৰাজনৈতিক পৰ্যবেক্ষকসকলে লক্ষ্য কৰিছে যে বিজেপিৰ প্ৰাৰ্থী তালিকাখনত মুখ্যমন্ত্ৰী হিমন্ত বিশ্ব শৰ্মাৰ প্ৰভাৱ প্ৰবল। তেওঁ নিজৰ পূৰ্বৰ সতীৰ্থসকলক আনি নিজৰ স্থিতি মজবুত কৰাত উঠিপৰি লাগিছে।
কিন্তু একেসময়তে বিজেপিৰ বহু নিষ্ঠাবান কৰ্মীৰ বাবে এয়া এক হতাশাৰ পৰিস্থিতি। দলীয় আনুগত্যৰ বিপৰীতে আমদানিকৃত নেতাক অগ্ৰাধিকাৰ দিয়াৰ এই প্ৰৱণতাই দলটোত নিষ্ঠা, পৰম্পৰা আৰু ৰাজনৈতিক স্বচ্ছতাক যে বিপন্ন কৰি তুলিছে সেয়া ইতিমধ্যে স্পষ্ট হ’বলৈ আৰম্ভ কৰিছে।
