ক’ৰণা মহামাৰীৰ মাজতে একৈশত অনুষ্ঠিত হবলগীয়া ৰাজ্য বিধানসভা নিৰ্বাচনলৈ ইতিমধ্যে ৰাজনৈতিক দল সংগঠনৰ মাজত কুচ-কাৱাজ পৰিলক্ষিত হৈছে। আঞ্চলিক দল গঠনৰ বাবেও চলিছে যো-জা।
অৱশ্যে শাসক দল বিজেপিয়ে দ্বিতীয় পৰ্যায়ত ৰাজ্যৰ শাসনভাৰ নিজ হাতত ৰখাৰ বাবে সমষ্টিয়ে সমষ্টিয়ে আধাৰশিলা স্থাপনৰ প্ৰতিযোগিতা আৰম্ভ কৰিছে। বিশেষকৈ ক’ৰণাৰ কাৰণে তথ্য প্ৰযুক্তি ব্যৱহাৰ কৰি বিজেপি দলে সভা সমিতিৰ কাম আৰম্ভ কৰিছে।
ষষ্ঠ অনুসূচীৰ পাহাৰীয়া ডিমা হাছাও জিলাৰ একমাত্ৰ জনজাতিৰ বাবে সংৰক্ষিত ১৬ নম্বৰ হাফলং আসন নিজ দখলত ৰখাৰ বাবে বিজেপি দল সাজু হোৱা পৰিলক্ষিত হৈছে। কিন্তু প্ৰাৰ্থী কোন হ’ব ? বৰ্তমান বিধায়ক অৱসৰপ্ৰাপ্ত আইএএছ বিষয়া বীৰভদ্ৰ হাগজেৰক শাৰীৰিক অসুস্থতাৰ কাৰণে দলে টিকট দিয়াটো এতিয়া লৈকে চুড়ান্ত হোৱা নাই ।
কিন্তু নতুন মুখৰ সন্ধানত নামিছে গেৰুৱা দল। অলপতে বিজেপিৰ দখলত থকা উত্তৰ কাছাৰ পাৰ্বত্য স্বায়ত্ব শাসিত পৰিষদৰ সংসদীয় সমিতিৰ বৈঠকত পৰিষদীয় নেতৃত্বৰ পৰা তিনি নেতাৰ নাম অন্তৰ্ভুক্ত কৰি এখন তালিকা প্ৰস্তুত কৰা হৈছে বুলি জানিব পাৰা গৈছে।
য’ত পাৰ্বত্য পৰিষদৰ অধ্যক্ষা ৰাণু লাংথাছা, শিক্ষা বিভাগৰ ইএম নন্দিতা গাৰ্লচা আৰু উদ্যোগ বিভাগৰ ইএম নিপ’লাল হোজাইৰ সন্নিৱিষ্ট হৈছে। ইয়াৰ উপৰিও বিজেপি দলৰ আন এগৰাকী জেষ্ঠ্য নেতা কুলেন্দ্ৰ দাউলাগুপুৰ নামও উত্থাপিত হৈছে। দাউলাগুপু ইয়াৰ আগতে বিজেপি দলৰ পৰা দুবাৰকৈ বিধানসভা আৰু এবাৰ লোকসভাৰ প্ৰাৰ্থিত্ব লাভ কৰিছিল যদিও কিন্তু জিকিব পৰা নাই।
ইপিনে ডিমা হাছাও জিলাত বিৰোধী দল কংগ্রেছ বা অগপ দলৰ তেনে ভিত্তি নাই। আনহাতে পাৰ্বত্য স্বায়ত্ব শাসিত পৰিষদত বিজেপি দল একক সংখ্যাগৰিষ্ঠ দল হোৱাৰ বাবে শাসক দলৰ টিকট ফ্যাক্টৰ হ’ব। কাৰণ ৩০ আসনৰ পাৰ্বত্য পৰিষদত বিজেপিৰ ২৮।
মাথোঁ ২ খন আসন কংগ্রেছৰ দখলত। যাৰ বাবে বিধানসভা নিৰ্বাচনত হাফলংৰ পৰা বিজেপি দলৰ জয় নিশ্চিত বুলি ক’ব পাৰি।
শেহতীয়াকৈ পোৱা তথ্য অনুসৰি হাফলং আসনত ওপৰৰ তালিকাৰ পৰা নন্দিতা গাৰ্লচা দলীয় টিকটৰ ক্ষেত্ৰত আগুৱাই আছে ।
প্ৰকৃতাৰ্থত ১৬ নম্বৰ হাফলং আসন কংগ্রেছৰ দুৰ্গ হিচাপে পৰিচিত আছিল। প্ৰয়াত কংগ্রেছ নেতা গোবিন্দ চন্দ্ৰ লাংঠাচা ১৯৮৩ চনৰ পৰা ৰাজ্যৰ ৰাজনীতিত আছিল। উপ মুখ্য মন্ত্ৰীৰ উপৰি গড়কাপ্তানী, স্বাস্থ্য,বন আৰু পাৰ্বত্য এলেকা উন্নয়ন বিভাগৰ মন্ত্ৰী হৈ আছিল। ১৯৯৬ চনত অকল হাফলং আসনত জি চি লাংঠাচাক আঞ্চলিক দলৰ নেতা এএছডিছিৰ সমৰজিত হাফলংবাৰে পৰাজিত কৰিছিল।
ইয়াৰ পাছত ২০০১ চনত হাফলং দখলত সক্ষম হৈছিল। মন্ত্ৰিত্বও লাভ কৰিছিল। তেতিয়াৰ পৰা ২০১৬ লৈকে লাংঠাচা বিধায়ক হৈ আছিল। কিন্তু সেই বছৰ তেওঁৰ কনিষ্ঠ পুত্ৰ নিৰ্মল লাংঠাচাই টিকট পালেও জিকিব পৰা নাই।
অহা দিনতও কংগ্রেছ দলে হাফলং উদ্ধাৰ কৰাৰ কাৰণে অবশ্যে পৰিশ্ৰম কৰিব লাগিব লগতে জিলা জুৰি নতুনকৈ জনসম্পৰ্ক গঢ়ি তুলিব লাগিব।
জিলাৰ ৰাজনৈতিক তথ্য বিজ্ঞ মহলৰ ভাষ্য অনুসৰি ডিমা হাছাও জিলা বিজেপি বা পাৰ্বত্য ৰাজনীতি লৈ অচলাৱস্থা চলি আছে যদিও কিন্তু বিধানসভাত ইয়াৰ প্ৰভাৱ নপৰে। যাৰ বাবে এতিয়ালৈকে বিজেপিৰ বিকল্প ইয়াত পৰিলক্ষিত হোৱা নাই।।
