দুদিন পূৰ্বে বিজেপি ত্যাগ কৰা অৰুণাচলৰ প্ৰাক্তন মুখ্য মন্ত্ৰী গেগং আপঙে তৃণমূল কংগ্ৰেছত যোগাদান কৰিছে। ১৬ জানুৱাৰিত আপঙে সংবাদ মাধ্যমক এই কথা জনায়।
আনহাতে, বিজেপি এৰাৰ পিছতে অৰুণাচল প্ৰদেশৰ ৭ বাৰকৈ মুখ্য মন্ত্ৰী হোৱা আপং দলটোৰ কেন্দ্ৰীয় নেতৃত্বৰ বিৰুদ্ধে সৰৱ হৈ পৰিছে। দলটো এৰা ২৪ ঘণ্টাৰ পিছতে প্ৰাক্তন মুখ্য মন্ত্ৰীজনে ৰাষ্ট্ৰীয় নেতৃত্বক সমালোচনা কৰি কয়, “বিজেপিত এতিয়া নৰেন্দ্ৰ মোদী আৰু অমিত শ্বাহৰ একনায়কত্ব চলিছে। দলটো এতিয়া ক্ষমতালোভীসকলৰ মঞ্চ হৈ পৰিছে।”
মন কৰিব লগীয়া যে অমিত শ্বাহলৈ লিখা নিজৰ পদত্যাগ পত্ৰত বিজেপিয়ে বাজপেয়ীৰ আদৰ্শৰ পৰা বিচ্যুত হোৱা বুলি উল্লেখ কৰিছিল আপঙে।
ইয়াৰোপৰি তেওঁ পদত্যাগ পত্ৰখনত দলীয় সভাপতি হিচাপে আৰু প্ৰধান মন্ত্ৰী হিচাপে নৰেন্দ্ৰ মোদীয়ে বাজপেয়ীয়ে কৈ যোৱা ৰাজধৰ্ম পালন কৰিব বুলি আশা প্ৰকাশ কৰা বুলি লিখিছিল।
নাগৰিকত্ব সংশোধনী বিধেয়কখনৰো স্পষ্ট বিৰোধিতা কৰে অৰুণাচল প্ৰদেশৰ ৰাজনীতিৰ ভীষ্মস্বৰূপ নেতাজনে। তেওঁ কয়, এই বিধেয়কখনে গোটেই উত্তৰ-পূবৰ মানুহৰ শংকা উদ্ৰেক কৰিছে। তাৰ পিছতো কেন্দ্ৰীয় চৰকাৰে উত্তৰ-পূবৰ মানুহৰ এই শংকাক গুৰুত্ব নিদিয়া বুলি অভিযোগ কৰে।
