সামান্য বিবাদত তেওঁক আৰক্ষীয়ে আটক কৰি ৰাখিছিল। পিছত আৰক্ষীয়ে তেওঁক মুকলি কৰি দিয়ে। সেই ঘটনাৰ পিছত উত্তৰ প্ৰদেশৰ বিজেপি নেতা প্ৰীতম সিং কিষাণ আৰক্ষীক শিক্ষা দিবলৈ নিৰুদ্দেশ হৈ পৰিছিল।
একেৰাহে ৫৫ দিন নিৰুদ্দেশ হৈ থকাৰ পিছত আৰক্ষীয়ে প্ৰীতমক নিজ ঘৰৰ পৰা উদ্ধাৰ কৰে। ইমানদিন ধৰি আৰক্ষীৰ সৈতে ‘ধেমালি’ কৰাৰ অপৰাধত অৱশেষত ৰঙা ঘৰেই ঠিকনা হ’ল হামিৰপুৰ বিজেপিৰ প্ৰাক্তন সভাপতি প্ৰীতমক। আৰক্ষীক শিক্ষা দিবলৈ নিৰুদ্দেশ হোৱাৰ দৰে নাটক কৰা বুলি স্বীকাৰো কৰিছে অভিযুক্তই।
জানিব পৰা মতে, সামান্য বিবাদৰ বাবেই আৰক্ষীয়ে প্ৰীতমক গ্ৰেপ্তাৰ কৰিছিল। তেওঁৰ অনুজ্ঞাপত্ৰ থকা ৰিভলভাৰটো প্ৰথমে জব্দ কৰা হৈছিল যদিও পিছত ঘূৰাই দিয়া হৈছিল। কিন্তু এৰাতি থানাত ৰাখি থোৱাত অপমানিত হ’ল প্ৰীতম।
আৰক্ষীক এশিকনি দিবলৈ তেওঁ নিৰুদ্দেশ হোৱাৰ পৰিকল্পনা ৰচনা কৰিলে। সেই অনুসৰি ১৮ অক্টোবৰৰ পৰা প্ৰীতমৰ কোনো সন্ধান পোৱা হোৱা নাছিল।
ইপিনে, প্ৰীতমৰ পৰিয়ালে আৰক্ষীৰ বিৰুদ্ধে সৰৱ হয়। ২৮ নৱেম্বৰত ভাতৃ বীৰে এলাহাবাদ উচ্চ ন্যায়ালয়ৰ কাষ চাপিছিল। প্ৰীতমক বিচাৰি উলিওৱাত আৰক্ষীয়ে উদাসীনতা দেখুৱাইছে বুলি অভিযোগ উত্থাপন কৰে। কেৱল সেয়াই নহয়, আৰক্ষীয়ে প্ৰীতমক অবৈধভাৱে আটক কৰি ৰখাৰ অভিযোগো উত্থাপন কৰে। যাৰ বাবে আদালতে আৰক্ষীক ধমক দি তৎক্ষণাত তেওঁক বিচাৰিবলৈ নিৰ্দেশ দিয়ে।
ইয়াৰ পিছতে আদালতৰ ৰোষৰ সন্মুখীন হৈ আৰক্ষীয়ে ব্যৱস্থা গ্ৰহণ কৰে। তালাচী অভিযানৰ অন্তত ১২ ডিচেম্বৰত লক্ষ্ণৌৰ নিজা ঘৰত প্ৰীতমক উদ্ধাৰ কৰে।
এই ঘটনাৰ পিছতে অভিযুক্তক গ্ৰেপ্তাৰ কৰি আদালতত হাজিৰ কৰা হয়। সমগ্ৰ ঘটনাৰ শুনানি গ্ৰহণ কৰি আদালতে অভিযুক্তক আৰক্ষীৰ জিম্মাত ৰখাৰ নিৰ্দেশ দিয়ে। অৱশ্যে নিৰাপত্তাজনিত কাৰণত বিজেপি নেতাগৰাকীক বৃদ্ধাশ্ৰমত পৰ্যবেক্ষণত ৰখা হৈছে।
