শিৱসাগৰত চলিছে জুৱাৰ অবাধ বেহা। জুৱাৰ এই কু-চক্ৰত জড়িত খোদ বিজেপি নেতাও। জুৱাকেন্দ্ৰিক কাজিয়াৰ পৰিণতিত এগৰাকী বিজেপি নেতা চিকিৎসালয়তো ভৰ্তি হ’বলগীয়া হৈছে।
যোৱা নিশা সংঘটিত হৈছে ঘটনা। প্ৰকাশিত বাতৰি অনুসৰি, বুধবাৰে নিশা জুৱাখেলৰ পিছতে জুৱাথলীতে সৃষ্টি হোৱা কাজিয়াত লিপ্ত হৈ আঘাত পোৱা বিজেপি নেতা এগৰাকীক চিকিৎসালয়ত ভৰ্তি কৰোৱা হয়।
আহত বিজেপি নেতাগৰাকী বিজেপিৰ অনুসূচিত জাতি মৰ্চাৰ সম্পাদক জিতু হাজৰিকা বুলি জানিব পৰা গৈছে।
সূত্ৰ অনুসৰি, জুৱাখেলৰ পিছতে সেই স্থানত থকা লোকসকলৰ মাজত এক উত্তপ্ত পৰিস্থিতিৰ সৃষ্টি হয় আৰু এই বিবাদৰ পিছতে সূত্ৰপাত হোৱা কাজিয়াত বিজেপি নেতাগৰাকী আঘাতপ্ৰাপ্ত হয়।
আঘাতপ্ৰাপ্ত জিতু হাজৰিকাও জুৱাৰ এই কু-চক্ৰৰ অংশ আছিল বুলি জানিব পৰা গৈছে। ঘটনাৰ পিছতে আহত হাজৰিকাক চিকিৎসালয়ত ভৰ্তি কৰোৱা হয়।
ইফালে স্থানীয় আৰক্ষীয়ে তথ্য লাভ কৰাৰ লগে লগে ঘটনাস্থলীত উপস্থিত হয় আৰু ঘটনাৰ সৈতে জড়িত কেইবাগৰাকীও ব্যক্তিক গ্ৰেপ্তাৰ কৰে।
