মুখ্যমন্ত্ৰী হিমন্ত বিশ্ব শৰ্মাই বিজেপি নেতা আৰু দলৰ কৰ্মকৰ্তাসকলক তেওঁলোকৰ ব্যক্তিগত নিৰাপত্তাৰক্ষী (পিএছঅ’) ত্যাগ কৰিবলৈ কৰা আবেদনে কোনো ইতিবাচক সঁহাৰি লাভ কৰাত ব্যৰ্থ হৈছে কিয়নো এতিয়ালৈ মাত্ৰ ৩ জন নেতাইহে তেওঁলোকৰ পিএছঅ’ ত্যাগ কৰিছে।
এইক্ষেত্ৰত বিজেপিৰ নেতা-বিধায়কসকলেই মুখ্যমন্ত্ৰীগৰাকীৰ আবেদনক কোনো গুৰুত্ব নিদিয়া দেখা গৈছে।
ৰাজ্যখনত ৯০০ৰো অধিক ব্যক্তিয়ে, ইয়াৰে বেছিভাগ ৰাজনীতিবিদে অসম আৰক্ষীয়ে প্ৰদান কৰা নিৰাপত্তাৰক্ষী লৈ আছে।
লগতে পঢ়ক: যোৰহাট আৰক্ষীৰ হাতত গ্ৰেপ্তাৰ দুজন বন্দুক সৰবৰাহকাৰী
মুখ্যমন্ত্ৰী শৰ্মাই বিধানসভাত এক লিখিত উত্তৰত জনায় যে সাধাৰণতে পিএছঅ’ (ব্যক্তিগত নিৰাপত্তা বিষয়া) বুলি জনাজাত ১৬২৮ জনতকৈও অধিক আৰক্ষী কৰ্মী ৯৪১জন নেতা-বিধায়কৰ সৈতে সংযুক্ত হৈ আছে।
এই পিএছঅ’বোৰৰ উপৰিও, বাহনত “এছকৰ্ট” হিচাপে ৫৬০ জন, “পাইলট/লীড চিকিউৰিটি” হিচাপে ১৫০ জন আৰু “হাউছ গাৰ্ড” হিচাপে ১১৯৬ জন আৰক্ষী কৰ্মী নিয়োজিত হৈ আছে।
মুখ্যমন্ত্ৰী শৰ্মাই লগতে কয় যে তেওঁৰ আবেদনৰ পিছত লোকসভাৰ সাংসদ ৰাজদীপ ৰয় আৰু বিজেপি বিধায়ক ৰূপজ্যোতি কুৰ্মী তথা পৰমানন্দ ৰাজবংশীয়ে তেওঁলোকৰ পিএছঅ’ ত্যাগ কৰিছে।
লগতে পঢ়ক: তামুলপুৰত উপস্থিত প্ৰথম মহিলা এভাৰেষ্ট বিজয়ী বাচেন্দ্ৰী পাল
উল্লেখ্য যে যোৱা বছৰৰ ডিচেম্বৰত মুখ্যমন্ত্ৰী শৰ্মাই বিজেপি নেতা আৰু দলৰ কৰ্মকৰ্তাসকলক তেওঁলোকৰ পিএছঅ’ ত্যাগ কৰিবলৈ আহ্বান জনাই কৈছিল যে “এয়া কংগ্ৰেছ দলৰহে সংস্কৃতি’’।
