সমগ্ৰ অসমত নাগৰিকত্ব (সংশোধনী) আইন বিৰোধী আন্দোলন চলি থকা সময়তে ৰাজ্যৰ বিজেপি চৰকাৰখনে আইনখনৰ সমৰ্থনেৰে নিজৰ শক্তি প্ৰমান কৰিবলৈ চেষ্টা অব্যাহত ৰাখিছে।
‘কা’ৰ সমৰ্থনত ৰাজ্যিক বিজেপিয়ে গুৱাহাটীৰ খানাপাৰা পশু চিকিৎসা মহাবিদ্যালয় খেল পথাৰত ৪ জানুৱাৰিত এখন জনসভা আয়োজন কৰিছে।
বিজেপিৰ জনসভাত অংশগ্ৰহণ কৰাৰ বাবে ৪ জানুৱাৰিত গুৱাহাটীত উপস্থিত হ’ব বিজেপিৰ ৰাষ্ট্ৰীয় কাৰ্য্যকৰী সভাপতি জে পি নড্ডা।
বিজেপিৰ ৰাষ্ট্ৰীয় কাৰ্য্যকৰী সভাপতি গৰাকীয়ে জনসভাক সম্বোধন কৰি নাগৰিকত্ব (সংশোধনী) আইন সম্পৰ্কত ভাষণ প্ৰদান কৰিব।
ইতিমধ্যে ৰাজ্যিক বিজেপিয়ে জনসভাখন সফল কৰি তোলাৰ বাবে উঠি-পৰি লাগিছে।
বিভিন্ন জিলাৰ লগতে বুথ পৰ্যালয়লৈ সকলো বিজেপি কৰ্মী-সমৰ্থক সকলক সভাত উপস্থিত থকাৰ বাবে নিৰ্দেশ দিয়া হৈছে।
জনসভাখনত বিজেপিৰ ৰাষ্ট্ৰীয় কাৰ্য্যকৰী সভাপতি নড্ডাৰ লগতে ৰাজ্যৰ প্ৰায় সকলো বিজেপি নেতা উপস্থিত থকাৰ সম্ভাৱনা আছে।
নাগৰিকত্ব (সংশোধনী) আইনক লৈ ৰাজ্যত প্ৰতিবাদ অব্যাহত থকাৰ মাজতে ৰাজ্যিক বিজেপিয়ে বিভিন্ন স্থানত ‘কা’ৰ সমৰ্থনত শান্তি সমদল অনুষ্ঠিত কৰিছে।