কিছুদিন পূৰ্বে মুম্বাইৰ এখন হোটেলত সাংসদ মোহন দেলকাৰে আত্মহত্যা কৰাৰ ঘটনাৰ চাঞ্চল্য মাৰ নৌযাওঁতেই দিল্লীত উদ্ধাৰ হৈছে এজন বিজেপি সাংসদৰ মৃতদেহ।
আজি ৰাজধানীৰ নৰ্থ এভিনিউ এলেকাত থকা নিজৰ ফ্লেটত উদ্ধাৰ হয় বিজেপিৰ সাংসদ ৰাম স্বৰূপ শৰ্মাৰ মৃতদেহ।
ৰহস্যজনক অৱস্থাত উদ্ধাৰ হোৱা হোৱা শৰ্মাৰ মৃতদেহটো আৰক্ষীয়ে চমজি লৈছে আৰু মৰণোত্তৰ পৰীক্ষাৰ বাবে প্ৰেৰণ কৰিছে।
আৰক্ষীয়ে প্ৰকাশ কৰা মতে সাংসদ শৰ্মাই আত্মহত্যা কৰিছে। অৱশ্যে মৰণোত্তৰ পৰীক্ষাৰ প্ৰতিবেদন পোৱাৰ পিছতহে সাংসদ গৰাকীৰ মৃত্যুৰ প্ৰকৃত কাৰণ জানিব পৰা যাব।
১৯৫৮ চনত হিমাচল প্ৰদেশৰ মাণ্ডিত জন্মগ্ৰহণ কৰা সাংসদ ৰামস্বৰূপ শৰ্মাই ২০১৪ চনত হিমাচলৰ মাণ্ডিৰ পৰাই সংসদলৈ নিৰ্বাচিত হৈছিল।
২০১৯ চনৰ লোকসভা নিৰ্বাচনতো শৰ্মাই একেটা সমষ্টিৰ পৰা বিজেপিৰ সাংসদ হিচাবে নিৰ্বাচিত হৈছিল।তেওঁ বিদেশ দপ্তৰৰ সংসদীয় সমিতিৰ এগৰাকী অন্যতম সদস্য আছিল।
প্ৰাথমিক তদন্তৰ পৰা শৰ্মাই আত্মহত্যা কৰা বুলি ভবা হৈছে যদিও এয়া হত্যাকাণ্ড বুলিও বহুতে সন্দেহ কৰিছে।
ইপিনে সাংসদগৰাকীৰ মৃত্যুৰ খবৰ পোৱাৰ পিছতে আজি অনুষ্ঠিত হ’বলগীয়া বিজেপিৰ সংসদীয় সমিতিৰ বৈঠক স্থগিত ৰখাৰ সিদ্ধান্ত লোৱা হয়।