বলীউডৰ অভিনেতা আমিৰ খানৰ ওপৰত ভীষণ খং উঠিছে বিজেপিৰ সাংসদ সুব্ৰমণিয়ম স্বামীৰ।
সেই বাবেই অভিনেতা গৰাকীক সমালোচনাৰ বানেৰে থকা-সৰকা কৰিলে ৰাজনীতিক গৰাকীয়ে। অভিনেতা আমিৰ খানৰ ওপৰত সুব্ৰমণিয়ম স্বামীৰ খং উঠাৰ কাৰণ হ’ল শেহতীয়াকৈ আমিৰ খানে তুৰস্কৰ ৰাষ্ট্ৰপতি ৰিচেপ তায়েপ এৰ্ডোগানক সাক্ষাৎ কৰি আহিছে।
যি গৰাকী এৰ্ডোগানে কাশ্মীৰ প্ৰসংগক লৈ ভাৰত বিৰোধী মন্তব্য কৰি আহিছে আৰু সেইজন ৰাষ্ট্ৰপতিকে আমিৰ খানে সাক্ষাৎ কৰি মহা ভুল কৰা বুলি সুব্ৰমণিয়ম স্বামীয়ে মন্তব্য কৰিছে।
স্বামীয়ে এই বুলি প্ৰশ্ন উত্থাপন কৰিছে যে অনৱৰতে ভাৰতৰ বিৰুদ্ধে কথা কৈ অহা তুৰস্কৰ ৰাষ্ট্ৰপতিক আমিৰ খানে সাক্ষাৎ কৰিব নালাগিছিল।
আমিৰ খানৰ বিৰুদ্ধে খঙত ফাটি পৰা সুব্ৰমণিয়ম স্বামীয়ে তুৰস্কৰ পৰা উভতি অহা বাবে আমিৰ খানে দুসপ্তাহৰ কোৱাৰেণ্টাইনত থাকিব লাগিব বুলিও কৈছে।
উল্লেখ্য অভিনেতা আমিৰ খানে শেহতীয়াকৈ তেওঁৰ নতুন ছবি ‘লাল সিং চাড্ডা’ৰ শ্বুটিঙৰ বাবে তুৰস্কলৈ গৈছিল আৰু তুৰস্কৰ ৰাষ্ট্ৰপতি ৰিচেপ তায়েপ এৰ্ডোগানৰ পত্নী এমাইল এৰ্ডোগানৰ আমন্ত্ৰণ মৰ্মে ৰাষ্ট্ৰপতি দম্পতিক সাক্ষাৎ কৰিছিল।
এই কথাতেই ক্ষুণ্ণ হৈ পৰিছে বিজেপিৰ সাংসদ সুব্ৰমণিয়ম স্বামী।
