লোকসভাৰ সাধাৰণ নিৰ্বাচনৰ ফলাফলৰ শেহতীয়া অগ্ৰগতিয়ে অসমত বিজেপিৰ অভূতপূৰ্ব উত্থানৰ ইংগিত দাঙি ধৰিলে। কিন্তু বিজেপি চৰকাৰৰ বিৰুদ্ধে নিৰৱিচ্ছিন্ন আন্দোলন, প্ৰতিবাদ, ধৰ্ণা আৰু জাতীয়তাবাদৰ উত্থানৰ যি ঢৌ দেখা গৈছিল নিৰ্বাচনত তাৰ কোনো প্ৰতিফলন নঘটিল। বৰঞ্চ পূৰ্বৰ তুলনাত বিজেপিয়ে অসমৰ জনসাধাৰণক অধিক আকৰ্ষিত কৰিবলৈ সক্ষম হোৱাৰ বাস্তৱ ছবি এখনহে দেখা পোৱা গ’ল।
বিজেপিয়ে গৃহীত কৰিব খোজা নাগৰিকত্ব সংশোধনী বিধেয়কৰ বিৰুদ্ধে গঢ়ি উঠা প্ৰবল জনমত, বিমুদ্ৰাকৰণ আৰু অবৈধ বাংলাদেশী বিতাৰণৰ দৰে গুৰুত্বপূৰ্ণ বিষয়সমূহেও এইবাৰ নিৰ্বাচনত কোনো প্ৰভাৱ পেলোৱা দেখা নগ’ল। ২৮ টা জনগোষ্ঠীয় সংগঠন, ৭০টা জাতীয় সংগঠনৰ প্ৰতিবাদী আন্দোলনৰ কোনো প্ৰভাৱ নপৰিল। নিৰ্বাচনকেন্দ্ৰিক ৰাজনীতিত বিজেপিয়ে বিৰোধীৰ দুৰ্বলতাৰ ভালদৰেই সুযোগ ল’লে।
দৰাচলতে অসমত কংগ্ৰেছকে ধৰি বিৰোধী দলবোৰৰ সাংগঠনিক ভিত্তি ইমানেই দুৰ্বল হৈ পৰিছে যে জনসাধাৰণক নিজৰ পক্ষত ৰাখিবলৈ কছৰৎ কৰাৰ জনবল তেওঁলোকৰ শূন্য। ইয়াৰ বিপৰীতে বিজেপিৰ সাংগঠনিক স্থিতি শক্তিশালী হৈ পৰিছে। ৰাজ্যখনত দলৰ চৰকাৰ থকাৰ সম্পূৰ্ণ সুযোগ গ্ৰহণ কৰি দলটোৱে তেওঁলোকৰ সংগঠন সম্প্ৰসাৰিত কৰিছে।
বিজেপিৰ সাংগঠনিক স্থিতি শক্তিশালী হোৱাৰ অন্যতম কাৰণ হৈছে ইয়াৰ কেডাৰসকল। আৰ এছ এছৰ পৃষ্ঠপোষকতাত তৃণমূল পৰ্যায়লৈ দলটোক শক্তিশালীভাৱে প্ৰতিষ্ঠা কৰাত কৰ্মীসকল সফল হৈছে। বিজেপিত নেতাৰ তুলনাত কেডাৰ বা কৰ্মীৰ ভূমিকা বহুত বেছি। আনহাতে, কংগ্ৰেছকে ধৰি আন বিৰোধী দলবোৰ বৰ্তমান নেতাকেন্দ্ৰিক হৈ পৰিছে আৰু তৃণমূল পৰ্যায়ত পুতৌজনকভাৱে কৰ্মীৰ অভাৱ স্পষ্ট হৈ পৰিছে।
বিগত তিনিবছৰত বিজেপিয়ে অসমৰ যুৱ প্ৰজন্মক আকৰ্ষিত কৰাৰ সৰ্বাত্মক প্ৰচেষ্টা চলাইছে আৰু এইক্ষেত্ৰত যথেষ্ট সাফল্য লাভ কৰিছে। বিৰোধী কংগ্ৰেছ তথা আন দলসমূহত যুৱ নেতাসকল অপেক্ষিত হোৱাৰ বিপৰীতে বিজেপিয়ে যুৱসকলক অগ্ৰাধিকাৰ দিয়াৰ সুফল নিৰ্বাচনী ফলাফলত প্ৰতিফলিত হৈছে।
নিৰ্বাচনৰ শেহতীয়া ফলাফলৰ ধাৰা অনুসৰি বিজেপি আৰু ইয়াৰ সহযোগীয়ে অসমত ৯খন আসনত জয়লাভ কৰাৰ দিশে আগবাঢ়িছে। সেয়ে হ’লে পূৰ্বৰ ৭খনৰ তুলনাত দুখন আসন বাঢ়িব। ২০১৪’ৰ নিৰ্বাচনত মোদী ঢৌৰ সময়তকৈয়ো এইবাৰ অধিক ভাল ফলাফলৰ কাৰণ অৱশ্যেই বিজেপিৰ ৰাজ্যখনত এটা ‘আণ্ডাৰ কাৰেন্ট’ ঢৌৰ ইংগিত বহন কৰিছে।
অসমৰ জাতীয়তাবাদী সংগঠনসমূহৰ আন্দোলনমুখী প্ৰৱণতাক জনসাধাৰণে প্ৰত্যাখ্যান কৰি বিজেপিৰ ৰাষ্ট্ৰীয়তাবাদ তথা হিন্দুত্ববাদী চিন্তাধাৰাক অসমৰ জনসাধাৰণে সমৰ্থন জনালে নেকি সেয়া লক্ষ্যণীয় হৈ ধৰা দিছে।
