প্ৰকৃততে কি বিচাৰে বিজেপি তথা মোদী চৰকাৰে? গণতান্ত্ৰিক পদ্ধতিৰে জনকল্যাণ নে ক্ষমতাকেন্দ্ৰীক অঁৰিয়াঁঅৰি? বিৰোধীৰ অস্তিত্ব নিবিচাৰে নেকি বিজেপিয়ে? বিজেপিয়ে গণতান্ত্ৰিক পদ্ধতিক বিশ্বাস কৰেনে? চাও আহক এই সন্দৰ্ভত এক বিশেষ প্ৰতিবেদন!
দেওবাৰে হায়দৰাবাদত বিজেপিৰ বহুচৰ্চিত কাৰ্যনিৰ্বাহক বৈঠক হৈ যায়। বৈঠকখনত প্ৰধানমন্ত্ৰী নৰেন্দ্ৰ মোদীয়ে দলৰ কৰ্মীসকলক ভাৰতত বিজেপিৰ পূৰ্বে দীৰ্ঘকাল ধৰি ক্ষমতাত অধিষ্ঠিত হৈ অহা দলসমূহৰ ভুল-ত্ৰুটিসমূহ অধ্যয়ন কৰিবলৈ আহ্বান কৰে।এই ভুলসমূহৰ পৰা শিক্ষা ল’বলৈ তেওঁ কয়। ইয়াৰ দ্বাৰা মূলতঃ মোদীয়ে কংগ্ৰেছ দললৈকে ইংগিত কৰে।
আনহাতে, গৃহমন্ত্ৰী অমিত শ্বাহে সদম্ভ ঘোষণা কৰা যে অহা ৩০-৪০ বছৰৈলেক দেশত ‘বিজেপিৰ যুগ’ চলিব। শ্বাহে নিজৰ বৈঠকত বিৰোধী দলৰ চৰকাৰ চলি থকা ৰাজ্যসমূহৰ নাম বিশেষভাৱে উল্লেখ কৰে। কয় যে পশ্চিম বংগ, তেলেংগানা, অন্ধ্ৰপ্ৰদেশ, তামিলনাডু, কেৰালা আৰু উৰিষ্যাতো বিজেপিয়ে চৰকাৰ গঠন কৰিব।
শ্বাহে কয় যে বিজেপিয়ে দেশৰ পৰা বংশগত ৰাজনীতি নিপাত কৰিব। এনেদৰে দেশে বিশ্বগুৰুৰ স্থানত উপনিত হ’ব। বিজেপিৰ শীৰ্ষ নেতৃত্বৰ এই বক্তব্যৰ পাছতে তীব্ৰভাৱে ৰাজনৈতিক বিতৰ্কৰ সূত্ৰপাত ঘটিছে। অমিত শ্বাহে বংগৰ তৃণমূল কংগ্ৰেছক লক্ষ্য কৰি লোৱা বাবে ইয়াৰ প্ৰত্যুত্তৰ দিছে দলটোৱে। তৃণমূল কংগ্ৰেছে কয় যে সাধাৰণ ৰাইজে ইতিমধ্যে যোৱা বৰ্ষত গেৰুৱা দলটোক প্ৰত্যা্খ্যান কৰিছে।
উল্লেখযোগ্য যে যিসমূহ ৰাজ্যত বিৰোধী দলৰ চৰকাৰ আছে, সেইসমূহে মোদী চৰকাৰৰ নীতিসমূহক তীব্ৰভাৱে প্ৰত্যাহ্বান জনাই আহিছে। পশ্চিম বংগৰ মুখ্যমন্ত্ৰী মমতা বেনাৰ্জীয়ে মোদী চৰকাৰৰ প্ৰতিটো জনবিৰোধী নীতিক মুকলি প্ৰতিবাদ কৰি আহিছে।
বিৰোধী শক্তিক প্ৰাণ দিবলৈ মমতা বেনাৰ্জীয়ে তুমুল চেষ্টা অব্যাহত ৰাখিছে। ২০২৪ চনৰ লোকসভা নিৰ্বাচনৰ বাবে টঙালী বান্ধিছে মমতাই। এইসমূহৰ বাবেই মোদী চৰকাৰৰ চকুৰ কূটা দাঁতৰ শূল হৈ পৰিছে পশ্চিম বংগৰ মুখ্যমন্ত্ৰীগৰাকী। যিকোনে প্ৰকাৰে বিজেপিক বংগৰ ক্ষমতা লাগে।
ইয়াৰ কাৰণ হৈছে বংগ দেশৰ ভিতৰতে এখন উল্লেখযোগ্য ঠাই। বিজেপি যদি ইয়াত শাসনত উপনীত হয়, তেন্তে হিন্দুত্ববাদৰ বাবেও হৈ পৰিব পীঠস্বৰূপ! মমতাৰ সমান্তৰালভাৱে তেলেংগানাৰ মুখ্যমন্ত্ৰী কেচিআৰেও মোদী চৰকাৰৰ বিৰোধী হিচাপে চৰ্চিত হৈ আহিছে। দেশজুৰি জনপ্ৰিয়তা লাভ কৰিছে কেচিআৰৰ বক্তব্যই।
যিকোনো প্ৰকাৰে বিজেপিক তেলেংগানাও লাগে। দেশৰ অন্যতম নতুন এই ৰাজ্যখনত যদি বিজেপিয়ে ক্ষমতালৈ আহে, তেন্তে দক্ষিণ ভাৰতত নতুন এক অধ্যায়ৰ মুকলি হ’ব। এই আশাতে বন্দী হৈ আছে বিজেপিৰ নেতৃবৰ্গ। উৰিষ্যাত আছে নবীন পাটনায়কৰ জেডিইউ চৰকাৰ।
তুলনামূলকভাৱে নবীন পাটনায়ক দেশজুৰি চৰ্চিত নহ’লেও এতিয়ালৈকে মোদী চৰকাৰৰ স’তে হাত মিলোৱা নাই। সেইবাবেই পাটনায়কক উফৰাই উৰিষ্যাৰ ক্ষমতা লাগে বিজেপিক। উৰিষ্যাত হিন্দুসকলৰ পবিত্ৰ তীৰ্থস্বৰূপ। সেইবাবেই বিজেপিৰ শেহতীয়া লক্ষ্য হৈ পৰিছে এই ৰাজ্যখন।
আনহাতে, কেৰেলা, অন্ধ্ৰপ্ৰদেশ, তামিলনাডুৰ দৰে দক্ষিণ ভাৰতৰ ৰাজ্যসমূহত বিজেপি প্ৰায় অস্তিত্বহীন! দীৰ্ঘদিন ধৰি এইকেইখন ৰাজ্যত শক্তিশালী আঞ্চলিক দল আৰু বাওঁপন্থী চৰকাৰ চলি আহিছে। কিন্তু এতিয়া মোদীক এই ৰাজ্যকেইখনো লাগে। যিকোনো প্ৰকাৰে দক্ষিণ ভাৰতত বিজেপিয়ে ক্ষমতালৈ আহিব বিচাৰে।
অমিত শ্বাহে দেওবাৰে কৈছে যে অহা ৩০-৪০ বছৰৰ বাবে দেশে কেৱল বিজেপিৰ শাসনত থাকিব। কিন্তু তাৰ পাছত কি হ’ব? কেৱল এটা দলেই একনায়কত্ববাদৰ দৰে কেইবাবছৰো শাসনত থকাটো গণতন্ত্ৰৰ বাবে ভাবুকিস্বৰূপ। কিন্তু বিজেপিয়ে ভাৰতক গণতান্ত্ৰিক পদ্ধতিৰে আগবাঢ়ি যোৱাটো বিচাৰে নে?
ইতিমধ্যে ৰিজৰ্ট পলিটিকচৰ দৰে লেতেৰা কৌশলেৰে বিজেপিয়ে মহাৰাষ্ট্ৰ দখল কৰিলে। ইয়াৰ পূৰ্বেও মধ্যপ্ৰদেশ, হাৰিয়ানাত এনেধৰণৰ ঘোঁৰাৰ দৰে বিধায়ক ক্ৰয় কৰা দেখা গৈছিল দলটোক। এতিয়া কি শ্বাহে কোৱাৰ দৰে তামিলনাডু, পশ্চিমবংগ, কেৰেলা আদি ৰাজ্যতো মহাৰাষ্ট্ৰসদৃশ ৰাজনৈতিক সংকটৰ সূচনা কৰা হ’ব নেকি? ঘোঁৰাৰ দৰত ক্ৰয় কৰা হ’ব নেকি বিধায়কসকলক?