শাসনাধিষ্ঠ বিজেপি চৰকাৰৰ বিৰুদ্ধে আকৌ এবাৰ কঠোৰ সমালোচনাত মুখৰ হৈ পৰিছে বংগৰ মুখ্যমন্ত্ৰী তথা তৃণমূল কংগ্ৰেছৰ মুৰব্বী মমতা বেনাৰ্জী।
কেন্দ্ৰৰ বিজেপি নেতৃত্বাধীন চৰকাৰখনক তীব্ৰ আক্ৰমণ কৰি বেনাৰ্জীয়ে আজি বিজেপিৰ শাসনক এডল্ফ হিটলাৰ, জোচেফ ষ্টেলিন বা বেনিটো মুছলিনিতকৈও ভয়াৱহ বুলি অভিহিত কৰে।
তদুপৰি বিজেপি চৰকাৰে স্বতন্ত্ৰ কেন্দ্ৰীয় সংস্থাসমূহ ব্যৱহাৰ কৰি ৰাজ্যৰ বিষয়ত হস্তক্ষেপ কৰাৰ অভিযোগ উত্থাপন কৰে মমতা বেনাৰ্জীয়ে।
সোমবাৰে এক সংবাদমেল সম্বোধন কৰি মমতা বেনাৰ্জীয়ে দেশত গণতন্ত্ৰৰ সুৰক্ষাৰ বাবে কেন্দ্ৰীয় সংস্থাসমূহৰ পূৰ্ণ স্বতন্ত্ৰতাৰ আহ্বান জনায়।
“বিজেপি চৰকাৰে কেন্দ্ৰীয় সংস্থাসমূহ ব্যৱহাৰ কৰি ৰাজ্যৰ বিষয়ত হস্তক্ষেপ কৰি ভাৰতৰ ফেডাৰেল গাঁথনিলৈ ভাবুকি কঢ়িয়াই আনিছে। এই সংস্থাসমূহক স্বতন্ত্ৰতা দিয়া উচিত।”— বেনাৰ্জীয়ে কয়।
তেওঁ লগতে কয়, “গেৰুৱা দলৰ শাসন এডল্ফ হিটলাৰ, জোচেফ ষ্টেলিন বা বেনিটো মুছলিনিতকৈ ভয়ানক।”
শেহতীয়াকৈ পেট্ৰ’ল আৰু ডিজেলৰ ওপৰত আবকাৰী শুল্ক হ্ৰাস কৰাৰ ক্ষেত্ৰত কেন্দ্ৰীয় চৰকাৰে গ্ৰহণ কৰা সিদ্ধান্তকো সমালোচনা কৰে তৃণমূল কংগ্ৰেছৰ মুৰব্বী গৰাকীয়ে।
চৰকাৰৰ এই পদক্ষেপক “নিৰ্বাচনী ষ্টান্ট” বুলি অভিহিত কৰি মমতা বেনাৰ্জীয়ে দাবী কৰে যে দৰিদ্ৰসীমাৰ তলত থকা কেৱল কম সংখ্যক লোকেহে এই সুবিধা লাভ কৰিবলৈ সক্ষম হ’ব।
“বিজেপিয়ে যিকোনো নিৰ্বাচনৰ পূৰ্বে এনে কৰে। বিপিএল শ্ৰেণীৰ কেৱল এটা সৰু অংশ উজ্জ্বলা যোজনাৰ অধীনত আছে। দৰিদ্ৰ লোকসকলে কেনেকৈ ৮০০ টকা ব্যয়েৰে ঘৰুৱা গেছ ক্ৰয় কৰিব?” বুলি প্ৰশ্ন উত্থাপন কৰে বেনাৰ্জীয়ে।
উল্লেখ্য যে সম্প্ৰতি ৰাষ্ট্ৰীয় ৰাজনীতিত শক্তিশালীভাৱে আত্মপ্ৰকাশ কৰিছে মমতা নেতৃত্বাধীন তৃণমূল কংগ্ৰেছে। আগন্তুক লোকসভা নিৰ্বাচনৰ বাবেও প্ৰধানমন্ত্ৰী পদৰ মুখ হিচাপে চৰ্চিত হৈছে বংগ নেত্ৰী গৰাকী।
