খং কমিছে হোজাই সমষ্টিৰ বিদ্ৰোহী বিধায়ক শিলাদিত্য দেৱৰ।
আজিৰ পৰা দুসপ্তাহ পূৰ্বে সংবাদমেল পাতি দলীয় সতীৰ্থ নেতাৰ বিৰুদ্ধে ক্ষোভ উজৰা শিলাদিত্যই দলৰ পৰা অৱসৰ লোৱাৰ কথা ঘোষণা কৰিছিল।
আনকি শিলাদিত্যৰ মুখত নাম উচ্চাৰিত নহ’লেও কান্ধত মোনা লোৱা নেতা বুলি শব্দটো বাৰেপতি উচ্চাৰিত হৈছিল। সকলোৱে বিজেপিৰ সাংগঠনিক সম্পাদক ফণীন্দ্ৰ নাথ শৰ্মাক সেই মোনা লোৱা নেতাজন বুলি ধৰি লৈছিল।
কিন্তু ১৪ জুলাই পাৰ হোৱাৰ পাছত যেন এতিয়া ক্ৰমান্বয়ে খং কমি আহিছে বিদ্ৰোহী বিধায়ক শিলাদিত্যৰ।
আজি হেঙেৰাবাৰীস্থিত ৰাজ্যিক বিজেপিৰ কাৰ্যালয়ত সভাপতি ৰঞ্জিত দাস, সাংগঠনিক সম্পাদক ফণীন্দ্ৰ নাথ শৰ্মা আৰু শিলাদিত্যৰ মাজত অনুষ্ঠিত হয় এক বৈঠক।
উক্ত বৈঠকৰ অন্তত শিলাদিত্যদেবৰ সংবাদ মাধ্যমৰ আগত ভাষ্য “যিখিনি আলোচনা কৰিলো, এতিয়া মোৰ খং নাই। দলৰ আৰু কৰ্মীৰ স্বাৰ্থত আজিৰ আলোচনা হৈছে।”
ইপিনে আলোচনাৰ সময়ত শিলাদিত্যই ৰখা ভাষ্য ভালৰ বাবে কৰা বুলি দাবী কৰি তেওঁ কয় “মই যিখিনি কথা ৰাখিছো বিজেপিৰ ভালৰ কাৰণে হ’ব। মোৰ খং আছিল। আৱেগিকভাৱে কিছু কথা পূৰ্বতে কৈছিলো। সেই কথাখিনিয়ে আজি সভাপতিৰ আগত ৰাখিলো। মই কথা খুলি ক’বলৈ সংকোচ নকৰো। পেটত যি আছে মুখতো সেই একেই।”
ইয়াৰোপৰি, দলৰ সভাপতি হিচাপে ৰঞ্জিত দাসৰ মানি চলিব বুলি সদৰী কৰি শিলাদিত্যই কয় “তেওঁৰ লগত বহু আগৰ পৰা কাম কৰি আহিছো। গতিকে তেওঁৰ যিকোনো কথাই সন্মান জনাওঁ।”
ইপিনে, দুসপ্তাহ পূৰ্বে খং আৰু ক্ৰোধত দলৰ পৰা অৱসৰৰ কথা ঘোষণা কৰা শিলাদিত্যৰ খং কমাৰ পাছত মন্তব্য “ত্যাগ বেলেগ বস্তু। দল ত্যাগৰ কথা কোৱা নাছিলো। দলৰ কাৰণে ত্যাগ কৰি যাম বুলি কৈছিলো।”
