লোকসভা নিৰ্বাচনৰ তৃতীয় পৰ্য্যায়ৰ ভোটগ্ৰহণত আজি ভোটাধিকাৰ সাব্যস্ত কৰে অসম ৰাজ্যিক বিজেপিৰ সভাপতি ৰঞ্জিত দাসে। ৰাতিপুৱাই দাসে সপৰিয়ালে বৰপেটা ৰ’ডৰ গোপীনাথ বৰদলৈ মেম’ৰিয়েল হাইস্কুলৰ ভোটকেন্দ্ৰত ভোটদান কৰে।
ভোটাধিকাৰ সাব্যস্ত কৰি বিজেপিৰ সভাপতিগৰাকীয়ে অসমত বিজেপি নেতৃত্বাধীন মিত্ৰজোঁটে দহখন আসন দখল কৰিবলৈ সক্ষম হ’ব বুলি দৃঢ়তাৰ কয়। কোকৰাঝাৰ লোকসভা সমষ্টিৰ বাবে ভোটাধিকাৰ সাব্যস্ত কৰে ৰঞ্জিত দাসে।
কোকৰাঝাৰ সমষ্টিৰ প্ৰসংগ উল্লেখ কৰি দাসে কয় যে এইবাৰ সমীকৰণ সম্পুৰ্ণ পৃথক কোকৰাঝাৰ সমষ্টিত নিৰ্দলীয়, কংগ্ৰেছ, চি পি আই এম সকলোৱে প্ৰাৰ্থী দিছে আনহাতে ইয়াত থকা অগপ, বিজেপি আৰু বি পি এফৰ ভোটখিনিৰ কোনোধৰণৰ বিভাজন নহয় গতিকে প্ৰমীলা ৰাণী ব্ৰহ্ম যথেষ্ট শক্তিশালী প্ৰাৰ্থী আৰু তেওঁৰ বিজয় নিশ্চিত।
আনহাতে, কোকৰাঝাৰ লোকসভা সমষ্টিৰ বৰ্তমানৰ সাংসদ নৱ কুমাৰ শৰণীয়াই তামুলপুৰত নিজৰ ভোটাধিকাৰ সাব্যস্ত কৰি কয় তেওঁ বড়ো জনসাধাৰণৰ স্বাভিমানৰ বাবে সদায় কাম কৰি যাব। লেতেৰা ৰাজনীতি কৰাৰ বাবে ৰাজনীতিলৈ অহা নাই বুলিও মন্তব্য কৰে শৰণীয়াই।
