আগন্তুক বিটিচি নিৰ্বাচনত বিপিএফ আৰু বিজেপিয়ে অকলে অকলে নিৰ্বাচনত প্ৰতিদ্বিন্দ্বিতা কৰা কথাটো প্ৰায় স্পষ্ট কৰি দিছে।
শনিবাৰে ওদালগুৰি জিলাৰ টংলাত অনুষ্ঠিত হোৱা এখন দলীয় কৰ্মকৰ্তাৰ বৈঠকত বিজেপিৰ মঙলদৈ লোকসভা সমষ্টিৰ সাংসদ দিলীপ শইকীয়া, অসম চৰকাৰৰ মন্ত্ৰী ভবেশ কলিত আৰু অন্যান্য নেতৃতবৃন্দৰ উপস্থিতিত আগন্তুক বিটিচি নিৰ্বচন সম্পৰ্কত আলোচনা কৰা হয়।
বৈঠকৰ অন্তত সংবাদ মাধ্যমৰ সৈতে হোৱা মুখামুখিত মঙলদৈ লোকসভা সমষ্টিৰ সাংসদ দিলীপ শইকীয়াই বিটিচি নিৰ্বাচনত বিপিএফৰ সৈতে মিত্ৰতা সন্দৰ্ভত ওলোৱা সকলো ধৰণৰ উৰা-বাতৰি খণ্ডন কৰে।
”আমি আমাৰ দলীয় কৰ্মকৰ্তা আৰু ভোটাৰ সকলক এইটো নিশ্চিত কৰাব বিচাৰো যে বিজেপিয়ে কোনোধৰণৰ মিত্ৰতাত নাই আমি আগন্তুক নিৰ্বাচনত অকলে প্ৰতিদ্বিন্দ্বিতা কৰিম,” দিলীপ শইকীয়াই কয়।
উল্লেখযোগ্য যে, বৰ্তমান দিছপুৰত বিপিএফ দলৰ ১২ গৰাকী বিধায়কে বিজেপি চৰকাৰৰ সৈতে মিত্ৰতা কৰি আছে।
বিপিএফ দলে ২০০৩ চনত বিটিচি গঠন হোৱাৰে পৰা বিটিচিৰ ক্ষমতা দখল কৰি আছে।
