হিন্দু বাংলাদেশীক সংস্থাপনেৰে জাতিৰ অস্তিত্ব ৰক্ষা কৰিবলৈ ওলোৱাটোহে অপপ্ৰচাৰ : সমুজ্জ্বল ভট্টাচাৰ্য
২৪ জানুৱাৰিত গুৱাহাটীত বিজেপিৰ নিৰ্বাচিত পঞ্চায়ত প্ৰতিনিধিসকলক সম্বৰ্ধনা জনোৱাৰ উদ্দেশ্যে আয়োজন কৰা এখন সভাত মুখ্য মন্ত্ৰী সোণোৱালে ভাষণ দি একাংশ জাতীয় দল-সংগঠনে নাগৰিকত্ব সংশোধনী বিধেয়কৰ বিৰুদ্ধে অপপ্ৰচাৰ চলোৱাত ব্যস্ত আছে বুলি কৰা মন্তব্যক উভতি ধৰিছে সদৌ অসম ছাত্ৰ সন্থাৰ মুখ্য উপদেষ্টা সমুজ্জ্বল কুমাৰ ভট্টাচাৰ্যই।
আছুৰ উপদেষ্টাগৰাকীয়ে সোণোৱালক প্ৰত্যুত্তৰত কয় যে আই এম ডি টি আইন বাতিল হোৱাৰ আজি ১৪ বছৰ পাছতো অসমৰ পৰিস্থিতি উন্নত হোৱাৰ বিপৰীতে অধিক অৱনতিহে হ’ল। এই বাস্তৱ সত্যৰ বিপৰীতে বিজেপিয়ে ১৯৭১ৰ পিছত অহা হিন্দু বাংলাদেশীক সংস্থাপন দি জাতিৰ অস্তিত্ব ৰক্ষা কৰিবলৈ ওলোৱা কাৰ্যতোহে প্ৰকৃততে অপপ্ৰচাৰ ।
ইফালে উক্ত সভাতেই মুখ্য মন্ত্ৰী সোণোৱালে অসম চুক্তিৰ ৬নং দফা কাৰ্যকৰী কৰাৰ বাবে কেন্দ্ৰীয় চৰকাৰে গঠন কৰি দিয়া উচ্চস্তৰীয় সমিতিক ছাত্ৰ সন্থাই সহযোগ নকৰাটো দুৰ্ভাগ্যজনক বুলি কৰা মন্তব্যৰ উত্তৰত ভট্টাচাৰ্যই কয় যে অসম চুক্তি অনুসৰি ১৯৭১ৰ পিছত অহা বাংলাদেশী নাগৰিকখিনিক চিনাক্ত কৰি বহিষ্কাৰ কৰিবই লাগিব।
তেওঁ লগতে কয় যে অসম চুক্তিৰ ৬নং দফাৰ জৰিয়তে খিলঞ্জীয়াৰ বাবে আসন সংৰক্ষণ, ভূমিৰ অধিকাৰ, শিক্ষাৰ অধিকাৰ, চাকৰিৰ ক্ষেত্ৰত সংৰক্ষণ আদি প্ৰদানৰ ব্যৱস্থা কৰিবই লাগিব। খিলঞ্জীয়াক ৰক্ষা কৱচ প্ৰদান কৰাৰ ক্ষেত্ৰত ছাত্ৰ সন্থাই ইতিমধ্যে ভালেখিনি কাম আগবঢ়াই থোৱা বুলিও সমুজ্জ্বল ভট্টাচাৰ্যই মুখ্য মন্ত্ৰী সোণোৱালক উভতি ধৰে।
অসম চুক্তিক আখৰে আখৰে পালন কৰাৰ প্ৰতিশ্ৰুতিৰে শাসনভাৰ দখল কৰা বিজেপি চৰকাৰখনে চাৰে চাৰি বছৰত এই ক্ষেত্ৰত কোনো ব্যৱস্থা গ্ৰহণ নকৰা বুলিও তাৎপৰ্যমূলক মন্তব্য কৰে আছুৰ মুখ্য উদেষ্টাগৰাকীয়ে।