নাগৰিকত্ব সংশোধনী বিধেয়কৰ অপব্যাখ্যা খোদ মুখ্য মন্ত্ৰীৰ; ‘বিধেয়ক’ক বুলিলে ‘বিধায়ক’

সমগ্ৰ অসমৰ জনতাৰ শংকা জড়িত থকা নাগৰিকত্ব সংশোধনী বিধেয়ক, ২০১৬ সন্দৰ্ভত ৰাজ্যখনৰ স্বয়ং মুখ্য মন্ত্ৰীজনেই অপব্যাখ্যাৰে মানুহক বিভ্ৰান্ত কৰাৰ ষড়যন্ত্ৰত লিপ্ত হৈছে। চাৰিওফালে হৈ থকা প্ৰতিবাদ, আন্দোলন, ক’লা পতাকা প্ৰদৰ্শনত দিশহাৰা হোৱা মুখ্য মন্ত্ৰীজনে শেষত বিধেয়কখন সন্দৰ্ভত অপব্যাখ্যাৰে মানুহক বুজনি দিবলৈ চেষ্টা কৰা দেখা গ’ল।

মুখ্য মন্ত্ৰীজনে ২০ জানুৱাৰিত নিজৰ ফেইচবুকৰ টাইমলাইনত আপল’ড কৰা এটা ভিডিঅ’যোগে অসমীয়া মানুহক এই বিধেয়কখন ক্ষতিকৰ নহয় বুলি বুজনি দিবৰ চেষ্টা কৰিছে।

এই ভিডিঅ’টো যোগে মুখ্য মন্ত্ৰীয়ে বিধেয়কখনৰ আনবোৰ গুৰুতৰ দিশ উল্লেখ নকৰি, কেৱল স্বাভাৱিক নাগৰিকত্বৰ সময় ১২ বছৰৰ ঠাইত ৭ বছৰ কৰিব খোজা হৈছে বুলি ব্যাখ্যা দিয়ে।

আনহাতে মুখ্য মন্ত্ৰীজনে কয় “বিদেশীয়ে নাগৰিকত্ব পাবৰ বাবে আৱেদন কৰোঁতে, তেওঁলোক যে তাত (সংশ্লিষ্ট দেশকেইখনত) ধৰ্মীয় নিৰ্য্যাতনৰ বলি হৈ আহিছে, তাৰো প্ৰমাণ দাখিল কৰিব লাগিব।” যিটো এটা গোকাট মিছা কথা।

প্ৰকৃত কথাটো হ’ল বিধেয়কখনৰ মতে এওঁলোকক বিদেশী বুলি গণ্যই কৰা নহ’ব। তাৰোপৰি বিধেয়কখনত ধৰ্মীয় নিৰ্য্যাতনৰ বলি হোৱাকহে নাগৰিকত্ব দিয়া হ’ব বুলি কোৱা নাই।

দৃষ্টিকটু অংগিভিংগিৰে কোৱা কথাখিনিত হাস্যকৰভাৱে মুখ্য মন্ত্ৰীজনে ‘বিধেয়ক’ শব্দটো বহুকেইবাৰ ‘বিধায়ক’ বুলি উল্লেখ কৰে।

মানুহৰ ক্ৰোধ উদগিৰণ কৰা এই ফেইচবুক পোষ্টটোত মুখ্য মন্ত্ৰীজনে শ শ কটু সমালোচনাত্মক ‘ৰিপ্লাই’ পায়। বেছিভাগ য়ুজাৰেই মুখ্য মন্ত্ৰীজনক তেওঁৰ পদমৰ্য্যাদাৰ সৈতে খাপ নোখোৱা ভাষা ব্যৱহাৰ কৰি প্ৰত্যুত্তৰ দিয়ে।

“ভকতে আৰ্শীৱাদ দিয়া সুৰ এৰি বেলেগ ৰাজ্যৰ মুখ্যমন্ৰীৰ দৰে জাতিৰ স্বাৰ্থত আপোনিও ৰাইজৰ লগত থিয় দিব বুলি এতিয়াও আশাবাদী|” এজন য়ুজাৰৰ ৰিপ্লাই।

আন এজন য়ুজাৰে কয়, “অন্ততঃ অবিজেপিৰ কথাবোৰ কৰ্ণপাতেই নকৰিলেও আপোনাৰ সন্মুখতে কোৱা সত্ৰাধিকাৰ পীতাম্বৰ দেৱগোস্বামী দেউৰ আবেদনও অৰণ্য-ৰোদন হবলৈ নিদিয়ে যেন!”

‘মই অসমীয়া’ নামৰ এজনে কৈছে, “মহোদয় একেটা বিষয়ৰ ওপৰত এইকেইদিন সঘনাই ফেচবুক পষ্টে প্ৰমান কৰিছে আপুনি হিনমান্যতাত ভূগিছে ।”

মন কৰিব লগীয়া যে যোৱা প্ৰায় এটা সপ্তাহত সোণোৱালৰ এই একাউণ্টটোত (Sarbananda Sonowal) সঘনাই পোষ্ট কৰা হৈছে। এইবোৰৰ বেছিভাগেই নাগৰিকত্ব সংশোধনী বিধেয়কৰ বিৰোধিতাত মূৰ দাঙি উঠা আন্দোনল আৰু বিজেপি বিৰোধী ঢৌক প্ৰশমিত কৰাৰ উদ্দেশ্যে দিয়া।

কিন্তু বিড়ম্বনাৰ কথাটো হ’ল, প্ৰায়বোৰ য়ুজাৰেই মুখ্য মন্ত্ৰীক ওলোটাই কটু কথা শুনোৱা দেখা গৈছে।

(তলত ভিডিঅ’টোৰ লিংক দিয়া হ’ল)

https://www.facebook.com/SarbanandaSonowal/videos/362697824548419/