‘’কুম্ভকৰ্ণক ৬ মাহ সময় লাগিছিল শোৱাৰ পৰা উঠিবলৈ, তেওঁক ৩৩ বছৰ লাগিল অসম চুক্তি বুজি পাবলৈ।‘’ অসম চুক্তিৰ সন্দৰ্ভত মন্ত্ৰী হিমন্ত বিশ্ব শৰ্মাই কৰা মন্তৱ্যৰ প্ৰতিক্ৰিয়া প্ৰসংগত এইদৰে কয় প্ৰাক্তন মুখ্য মন্ত্ৰী তথা জ্যেষ্ঠ অগপ নেতা প্ৰফুল্ল কুমাৰ মহন্তই।
শুকুৰবাৰে গুৱাহাটীৰ হোটেল ৰাজধানী ৰিজেঞ্চিত এখন সংবাদমেল অনুষ্ঠিত কৰি প্ৰাক্তন মুখ্য মন্ত্ৰী প্ৰফুল্ল কুমাৰ মহন্তই হিমন্ত বিশ্ব শৰ্মাই কিছুমান তুলুঙা মন্তব্য কৰি আছে বুলিও মন্তব্য কৰে।
বিজেপি নেতৃত্বাধীন ৰাজ্য চৰকাৰৰ জ্যেষ্ঠ মন্ত্ৰী হিমন্ত বিশ্ব শৰ্মাই অসম চুক্তিখন ৫১’ৰ পৰিৱৰ্তে ৭১’ৰ কৰাৰ বাবেই ৮৫৫ জন শ্বহীদ হ’বলগীয়া হ’ল বুলি কৰা মন্তৱ্যৰ প্ৰতিক্ৰিয়া প্ৰকাশ কৰে প্ৰাক্তন মুখ্য মন্ত্ৰী মহন্তই।
মন্ত্ৰী হিমন্ত বিশ্ব শৰ্মাক কটাক্ষ কৰি মহন্তই কয়, ‘’অসম চুক্তি স্বাক্ষৰ হোৱাৰ ৩৩ বছৰ পাছত হিমন্ত বিশ্বই ৫১’- ৭১’ৰ কথা বুজি পালে। তেওঁ নিজে অসম চুক্তি দপ্তৰৰ মন্ত্ৰী আছিল। তেওঁৰ এই কথা বুজোতেই ইমান সময় লাগিল, বিলখন তেওঁ কেনেকৈ বুজি পাব?’’
সংবাদমেলত মহন্তই জানিবলৈ দিয়ে যে ২০১৫’ ৰ পৰাই অসম আন্দোলন সংগ্ৰামী মঞ্চই বিধেয়কখনৰ বিৰোধিতা কৰিছিল। ইয়াৰ পাছতহে বিধেয়কখনৰ বিষয়ে অসমৰ ৰাইজ জ্ঞাত হৈছিল।
আনহাতে, ক্ষমতাৰ লোভত চৰকাৰখনে জাতি-মাটি-ভেটি নিলামত দিবলৈ বিচাৰিছে বুলি উল্লেখ কৰি বিজেপিৰ সিদ্ধান্ত জাতিধ্বংসী সিদ্ধান্ত বুলি মন্তব্য কৰাৰ লগতে অসমৰ ৰাইজে ইয়াৰ সমুচিত উত্তৰ দিব বুলি ব্যক্ত কৰে মহন্তই।
তদুপৰি, বিজেপিয়ে ধৰ্মীয় ৰঙ দিয়াৰ চেষ্টা চলাই সমাজৰ ক্ষতি কৰিব বুলি অভিযোগ কৰি মহন্তই কয়,‘’বিজেপিৰ মন্ত্ৰী বিধায়কে ধৰ্মীয় বিছিন্নতাবাদক উচটনি দিছে। তেওঁলোকে গীতা-ভাগৱত চুই শপত লোৱা নাই, তেওঁলোকে সংবিধান চুই শপত খাইছে। গতিকে চাই চিতি মন্তব্য কৰিব লাগে।‘’
মহন্তই লগতে এনেধৰণে সাম্প্ৰদায়িক মন্তব্য কৰি থাকিলে সমাজত বিষবাস্প বিয়পিব বুলি মন্তব্য কৰি ধৰ্ম নিৰপেক্ষতাক বাধা দিয়াৰ কোনো পদক্ষেপেই মানি লোৱা নহ’ব বুলিও স্পষ্ট কৰি দিয়ে। তেওঁ ইয়াৰ বিৰুদ্ধে ৰাজ্যপালক ব্যৱস্থা গ্ৰহণৰ বাবেও আহ্বান জনায়।
ইপিনে, মহন্তই ৰাজ্যসভাত বিধেয়কখনৰ বিৰোধিতা কৰাৰ বাবে শাৰদ যাদৱ, যশৱন্ত সিন্হা আৰু চন্দ্ৰবাবু নাইডুক লগ ধৰি আহ্বান জনোৱাৰ কথা সদৰী কৰে। তেওঁ লগতে অসম আন্দোলন সংগ্ৰামী মঞ্চই বিধেয়কখন গৃহীত কৰাৰ ক্ষেত্ৰত সৰ্বতোপ্ৰকাৰে বাধা দিব বুলি জানিব দিয়ে।
আনহাতে, নিৰ্যাতনৰ বলি হৈ অহা হিন্দু সন্দৰ্ভত মহন্তই বিজেপি চৰকাৰক প্ৰশ্ন কৰে, ‘’কিমান লোক ধৰ্মীয় নিৰ্য্যাতনৰ বলি হৈ ভাৰতলৈ আহিছে? কিমানজনে ভাৰতলৈ আহিব বিচাৰিছে হিচাপ আছে নে তেওঁলোকৰ হাতত?’’
তাৎপৰ্যপূৰ্ণভাৱে মহন্তই মন্তব্য কৰে যে হিন্দুৰ যদি নিৰ্য্যাতন হৈছে ভাৰত চৰকাৰে ৰাষ্ট্ৰসংঘৰ কাষ চাপিব লাগে। কিন্তু তাকে নকৰি বিজেপি চৰকাৰে বিদেশীক অসমলৈ আনিব বিচাৰিছে।
