উত্তৰপ্ৰদেশ বিধানসভা নিৰ্বাচন চমু চাপি অহাৰ লগে লগে পুনৰ সাম্প্ৰদায়িক ভাষ্য প্ৰদান কৰাত উঠিপৰি লাগিছে মুখ্যমন্ত্ৰী যোগী আদিত্যনাথ। শেহতীয়াকৈ অযোধ্যাত দীপাৱলী উপলক্ষে দিয়া এটা বক্তব্যক লৈ ব্যাপক চৰ্চা চলিছে।
যোগীয়ে কয় যে তেওঁৰ চৰকাৰে জনসাধাৰণৰ টকাসমূহ মন্দিৰৰ উন্নয়নৰ কাম খৰচ কৰে। কিন্তু পূৰ্বৰ চৰকাৰসমূহে জনসাধাৰণৰ টকা মুছলমানসকলৰ কবৰস্থানৰ বাবেহে খৰচ কৰিছিল।
কোনো দলৰ নাম উল্লেখ নকৰিলেও যোগীয়ে মূলতঃ সমাজবাদী পাৰ্টিলৈকে এনেদৰে লক্ষ্য কৰি লৈছে। যোগীয়ে কয় যে তেওঁৰ চৰকাৰে মন্দিৰৰ কথা চিন্তা কৰে, ধৰ্মৰ কথা চিন্তা কৰে আৰু সেয়ে টকাসমূহো উক্ত কামত খৰচ কৰে।
তদুপৰি তেওঁ জনায় যে উত্তৰপ্ৰদেশৰ ৫০০ টা মন্দিৰ তথা ধৰ্মীয় স্থানৰ উন্নয়নৰ বাবে কেইবাটাও প্ৰকল্প আৰম্ভণি কৰা হৈছে। তাৰ মাজৰ ৩০০ টা প্ৰকল্পৰ কাম ইতিমধ্যেই শেষ হৈছে। ইয়াৰ বাবে খৰচ কৰা হৈছে ৬৬১ কোটি টকা।
উল্লেখযোগ্য যে যোগী চৰকাৰৰ দিনত উত্তৰপ্ৰদেশৰ ব্যাপক উন্নয়ন হোৱা বুলি বিজেপিয়ে দাবী কৰি আহিছে। কিন্তু বাস্তৱিকতে তাৰ উলোটা ছৱি এখনহে পৰিস্ফূট হয়। বিশেষকৈ ক’ভিডৰ দ্বিতীয় ঢৌৰ সময়ত গংগাৰ পাৰত অজস্ৰ মৃতদেহ পৰি থকাটোৱে সচেতন লোকসকলক শিহৰিত কৰি তুলিছিল। দলিতসকলৰ সুৰক্ষাৰ পৰা নাৰী সুৰক্ষালৈকে কোনোটোতেই যোগী চৰকাৰে প্ৰাধান্য দিয়া নাই।
শেহতীয়াকৈ বাংগালোৰস্থিত এটা সংস্থা পাব্লিক এফেয়াৰ্ছ চেণ্টাৰে এখনি ইনডেক্স প্ৰকাশ কৰিছে। পাব্লিক এফেয়াৰ্ছ ইনডেক্স ২০২১ নামৰ উক্ত ইনডেক্সখনৰ দ্বাৰা চলিত বৰ্ষত দেশৰ ৰাজ্যসমূহৰ উন্নয়ন আৰু চৰকাৰৰ জনমুখীতাক পৰীক্ষা কৰি চোৱা হৈছে।
তদুপৰি চলিত বৰ্ষত চৰকাৰসমূহে ক’ভিড-১৯ নিয়ন্ত্ৰণ কৰাৰ ওপৰতো ইয়াত গুৰুত্ব দিয়া হৈছে। সংস্থাটোৱে জনোৱামতে, ইনডেক্সখন প্ৰস্তুত কৰিবলৈ আহৰণ কৰা সকলো তথ্য কেন্দ্ৰীয় চৰকাৰৰ পৰা লোৱা হৈছে।সেই অনুসৰি দেশৰ বৃহৎ ৰাজ্যসমূহৰ এখন তালিকা প্ৰস্তুত কৰা হৈছে।
তালিকাখনত প্ৰথমস্থানত বাওঁপন্থী শাসিত ৰাজ্য কেৰালা শীৰ্ষত আছে। তাৰ বিপৰীতে উত্তৰপ্ৰদেশ আছে অন্তিম স্থানত।
ইয়াৰ উপৰিও শেহতীয়াকৈ লখিমপুৰ খেৰী সংঘৰ্ষৰ পাছত উত্তৰপ্ৰদেশত কংগ্ৰেছৰ প্ৰিয়ংকা গান্ধীয়ে প্ৰবল জনসমাদৰ লাভ কৰা দেখা গৈছে। কংগ্ৰেছৰ উপৰিও অখিলেশ যাদৱৰ সমাজবাদী পাৰ্টিয়েও জনসাধাৰণৰ আস্থা লাভ কৰা দেখা গৈছে। তেনে পৰিস্থিতিত যোগী আদিত্যনাথৰ এনেধৰণৰ সাম্প্ৰদায়িক ব্যাপক তাৎপৰ্য বহন কৰিছে।