চমু চাপিছে লোকসভা নিৰ্বাচন। ২০২৪ ৰ নিৰ্বাচনলৈ সাজু হৈছে শাসক-বিৰোধী উভয়েই। ইতিমধ্যে ৰাষ্ট্ৰীয় কাৰ্যনিৰ্বাহক সভাত প্ৰধানমন্ত্ৰী মোদীয়ে নিৰ্বাচনলৈ মাত্ৰ ৪০০ দিন বাকী আছে বুলি হিচাপ-নিকাচ আৰম্ভ কৰিছেই। পিছে মোদীৰ এই হিচাপত ভেটা দি এক সাৱধানবাণী শুনাইছে সমাজবাদী পাৰ্টীৰ নেতা অখিলেশ যাদৱে।
মোদীৰ মন্তব্যৰ প্ৰতিক্ৰিয়া প্ৰকাশ কৰি অখিলেশ যাদৱে আজি কয় যে শাসকীয় বিজেপি দলে এতিয়া দিন গণনা কৰিবলৈ আৰম্ভ কৰিছে। মাজত আৰু ৩৯৯ টা দিন আছে আৰু ইয়াতকৈ এটা দিনো বিজেপি ক্ষমতাত নাথাকিব বুলি হুংকাৰ দিছে যাদৱে।
ভাৰত ৰাষ্ট্ৰ সমিতিৰ প্ৰথমখন ৰাজহুৱা সভাত বক্তব্য ৰাখি যাদৱে কয় যে ৩৯৯ দিনৰ পিছত বিজেপি ক্ষমতাৰ পৰা আঁতৰি যাব আৰু ৪০০ সংখ্যক দিনত নতুন চৰকাৰ গঠন হ’ব।
তেওঁ কয় যে শাসকীয় বিজেপিয়ে জাতিটোক পিছলৈ ঠেলি আহিছে আৰু সকলো প্ৰগতিশীল নেতাই একত্ৰিত হৈ দেশৰ উন্নয়নৰ বাবে কাম কৰাৰ সময় আহি পৰিছে।
ঐতিহাসিক খাম্মামৰ ভূমিত তেলেংগানাৰ মুখ্যমন্ত্ৰী তথা ভাৰত ৰাষ্ট্ৰ সমিতিৰ সভাপতি কে চন্দ্ৰশেখৰ ৰাৱে বিশাল জনসমাগম গোটাই সমগ্ৰ দেশলৈ বাৰ্তা প্ৰেৰণ কৰিছে বুলিও মন্তব্য কৰে অখিলেশ যাদৱে।
উত্তৰ প্ৰদেশে আন ৰাজ্যৰ সৈতে একেলগ হৈ শাসকীয় বিজেপিক নাকচ কৰিব বুলি উল্লেখ কৰি তেওঁ কয়, “আজি যেতিয়া আমি ইমান বৃহৎ সমাৱেশৰ সন্মুখত সমবেত হৈছো, মই ক’ব পাৰো যে যদি তেলেংগানাত বিজেপিক প্ৰতিহত কৰা হৈছে, তেন্তে উত্তৰ প্ৰদেশো বহু পিছ পৰি থকা নাই।”
উল্লেখ্য যে খম্মামত অনুষ্ঠিত হোৱা ভাৰত ৰাষ্ট্ৰ সমিতিৰ প্ৰথমখন ৰাজহুৱা সভাত দলটোৰ সভাপতি কে চন্দ্ৰশেখৰ ৰাওৰ লগতে দিল্লীৰ মুখ্যমন্ত্ৰী অৰবিন্দ কেজৰিৱাল, পঞ্জাৱৰ মুখ্যমন্ত্ৰী ভগৱন্ত মান, কেৰেলাৰ মুখ্যমন্ত্ৰী পিনাৰায়ী বিজয়ন, চিপিআইৰ সাধাৰণ সম্পাদক ডি ৰাজাও উপস্থিত থাকে।
