আজমলক অসমৰ মুখ্য মন্ত্ৰী হ’বলৈ নিদিয়ে বিজেপি কৰ্মীয়ে

বিত্ত মন্ত্ৰী হিমন্ত বিশ্ব শৰ্মাই বুধবাৰে অসমৰ নাগৰিকত্ব (সংশোধন) আইন ২০১৯-বিৰোধী আন্দোলনক চোকা সমালোচনা কৰি কৈছে যে দেহত শেষ বিন্দু তেজ থকালৈকে বিজেপি কৰ্মীসকলে আজমলৰ দৰে লোকক ৰাজ্যৰ মুখ্য মন্ত্ৰী হ’বলৈ নিদিয়ে।

ধেমাজিত বিজেপিৰ “ঐক্য সমদল” শীৰ্ষক জনসভাত শৰ্মাই এ আই ইউ ডি এফ নেতাজনৰ নাম উল্লেখেৰে অসমত আন্দোলনটোক নেতৃত্ব দি অহা সদৌ অসম ছাত্ৰ সন্থাক চোকা সমালোচনা কৰে।

ধুবুৰী, বৰপেটাৰ দৰে জিলাত ধৰ্ষণৰ বলি হোৱা শিক্ষয়িত্ৰী আৰু “লাভ জিহাদ”ৰ আক্ৰমণত পৰা ছোৱালীসকলৰ কথা উল্লেখ কৰি তেওঁ এই ঘটনাসমূহত আছুকে ধৰি আন সংগঠনসমূহৰ “নীৰৱতা”ক গৰিহণা দিয়ে।

“এই কথাই প্ৰমাণ কৰে যে তেওঁলোকে আজমলহঁতৰ বিৰুদ্ধে বিৰুদ্ধে যুঁজাৰ সাহস হেৰুৱাই পেলাইছে,” শৰ্মাই কয়।

আন্দোলনকাৰী সংগঠনসমূহক সমালোচনা কৰি শৰ্মাই কয় যে নাগৰিকত্ব আইন আগতেও সংশোধন হৈছিল, কিন্তু প্ৰফুল্ল কুমাৰ মহন্ত আৰু প্ৰয়াত হিতেশ্বৰ শইকীয়াৰ মুখ্য মন্ত্ৰিত্বৰ কালত তেওঁলোকে ইয়াৰ বিৰোধিতা কৰিবলৈ সাহস কৰা নাছিল।

“মহন্তৰ ‘গুপ্তহত্যা’কালক আছুৱে ভয় কৰিছিল আৰু সেয়ে তেতিয়া তেওঁলোকে মাত মতা নাছিল। ১৯৯২ চনত প্ৰয়াত হিতেশ্বৰ শইকীয়াৰ মুখ্য মন্ত্ৰিত্বৰ কালত পুনৰ নাগৰিকত্ব আইন সংশোধন কৰা হৈছিল। কিন্তু আছুকে ধৰি আনসকলে শইকীয়াৰ কঠোৰ পদক্ষেপৰ ভয়ত মাত মতা নাছিল,” তেওঁ কয়।

আইনখনৰ বিৰোধিতা কৰি থকা কংগ্ৰেছকো সমালোচনা কৰি শৰ্মাই কয় যে দলটোৰ বাবেই বৰ্তমান চৰকাৰে আইনখন পাছ কৰিব লগা হৈছে।

“আমি কা ২০১৯ পাছ নকৰিলোহেঁতেন যদিহে পূৰ্বৰ কংগ্ৰেছ চৰকাৰে বাংলাদেশৰ পৰা হোৱা অনুপ্ৰৱেশ বন্ধ কৰিলেহেঁতেন,” তেওঁ কয়।

“নৰেন্দ্ৰ মোদী ভাৰতৰ প্ৰধান মন্ত্ৰী হোৱাৰ পিছত ২০১৪ চনৰ পৰা এজনো বাংলাদেশী অনুপ্ৰৱেশকাৰীক সোমোৱাৰ অনুমতি দিয়া হোৱা নাই।”

শৰ্মাই কয় যে আইনখনক লৈ অপপ্ৰচাৰ চলাই থকা হৈছে আৰু ই কোনো নতুন মানুহকে সীমান্ত পাৰ হোৱাৰ অনুমতি দিয়া নাই।

“কংগ্ৰেছ অনুপ্ৰৱেশ ৰোধত বিফল হোৱাৰ বাবে ১৯৭১ চনৰ পিছত অহা কেৱল ৩.৫ লাখৰ পৰা ৪ লাখ লোকক নাগৰিকত্বৰ বাবে আৱেদনৰ সুযোগ দিয়া হৈছে,” তেওঁ কয়।

ধেমাজিত বৃহৎ সমাৱেশে পুনৰ বিজেপি শাসনলৈ অহাটো নিশ্চিত কৰিলে বুলি শৰ্মাই সভাত মন্তব্য কৰে।

“ইয়াৰ কাৰণ আছে। এই চৰকাৰৰ তলত ২২ লাখ কলেজীয়া ছাত্ৰ-ছাত্ৰীয়ে অসমত বিনামূলীয়া নামভৰ্তিৰ সুযোগ লাভ কৰিছে। ৬৪ লাখ শিক্ষাৰ্থীয়ে বিনামূলীয়া পাঠ্যপুথি পাইছে, ১২ লাখ লোক বৃদ্ধ পেঞ্চনৰ দ্বাৰা উপকৃত হৈছে,” তেওঁ কয়।

বিত্ত মন্ত্ৰীজনে পৰৱৰ্তী বাজেটৰ পৰা বিনামূলীয়া মাহিলী দৰৱ, ঘৰুৱা বিজুলী যোগান, কম দামত চাউল, চেনি আৰু দাইল যোগান ধৰাৰ প্ৰতিশ্ৰুতিও আগবঢ়ায়।

“মই এই প্ৰতিশ্ৰুতিও দিছো যে পৰৱৰ্তী বাজেটৰ পৰা ১ টকা কেজিকৈ চাউলৰ যোগান ধৰা হ’ব,” তেওঁ কয়।