আগুন্তুক সাধাৰণ নিৰ্বাচনত বিজেপিয়ে ৩০০ৰো অধিক আসন লাভ কৰিব আৰু তৃতীয়বাৰৰ বাবে নৰেন্দ্ৰ মোডী দেশৰ প্ৰধানমন্ত্ৰী হ’ব। ডিব্ৰুগড়ৰ এখন সভাত প্ৰদান কৰা ভাষণত এই কথা উল্লেখ কৰিলে গৃহমন্ত্ৰী অমিত শ্বাহে।
লগতে অসমৰ ১৪খন লোকসভাৰ আসনৰ ভিতৰত ১২খন আসন বিজেপিয়েই লাভ কৰিব বুলিও ভৱিষ্যদ্বাণী কৰে অমিত শ্বাহে।
ইয়াৰ উপৰিও শ্বাহে ভাৰতীয় জাতীয় কংগ্ৰেছক সমালোচনা কৰি কয় যে ৰাহুল গান্ধীৰ ভাৰত জোড়ো যাত্ৰাৰ পিছতো শেহতীয়াকৈ মেঘালয়, ত্ৰিপুৰা, আৰু নাগালেণ্ডত অনুষ্ঠিত হোৱা বিধানসভা নিৰ্বাচনত দলটোৱে ভাল প্ৰদৰ্শন কৰিব নোৱাৰিলে।
যুক্তৰাজ্য ভ্ৰমণৰ সময়ত ৰাহুল গান্ধীয়ে কৰা বিতৰ্কিত মন্তব্যৰ কথাও উল্লেখ কৰি শ্বাহে সকীয়াই দিয়ে যে যদি গান্ধীয়ে ভুৱা বক্তব্যৰে দেশ আৰু চৰকাৰক বদনাম কৰি থাকে তেন্তে কংগ্ৰেছ দলটো সমগ্ৰ দেশৰ পৰা বগা–ধোৱাৰ দৰে নোহোৱা হ’ব।
আনহাতে অসমৰ চুবুৰীয়া ৰাজ্যৰ লগত চলি থকা সীমা বিবাদ নিৰ্মূলৰ সম্পৰ্কে কেন্দ্ৰীয় চৰকাৰে ৰাজ্য সমূহৰ লগত আলোচনা কৰি আছে বুলি জানিবলৈ দিয়ে গৃহমন্ত্ৰীগৰাকীয়ে।
শ্বাহে লগতে কয় যে বডোলেণ্ড আৰু কাৰ্বি আংলং অঞ্চল বৰ্তমান শান্তিপূৰ্ণ। অসম ৰাজ্যখন এতিয়া আন্দোলন আৰু সন্ত্রাসবাদৰ সৈতে জড়িত নহয়।
উল্লেখ্য যে বিজেপি নেতৃত্বাধীন ৰাষ্ট্ৰীয় গণতান্ত্ৰিক মিত্ৰজোঁটে ২০১৯ চনৰ সাধাৰণ নিৰ্বাচনত ৫৪৩খন আসনৰ ভিতৰত ৩৫৩খন আসন লাভ কৰি জয়লাভ কৰিছিল।
ইফালে, অহা ১৪ এপ্ৰিলত গুৱাহাটীত প্ৰধানমন্ত্ৰীয নৰেন্দ্ৰ মোডীয়ে সৰুসজাই হ’বলগীয়া বিহুত বিশ্ব অভিলেখ অনুষ্ঠানত অংশগ্ৰহণ কৰিব। শ্বাহে এই অনুষ্ঠানৰ কথা উল্লেখ কৰি কয় যে ৰাজ্যখন এতিয়া শান্তিৰ বাবে পৰিচিত, এতিয়া ৰাজ্য মানুহে আনন্দ আৰু শান্তিৰ মাজেৰে বিহু নাচিব পাৰে।
