বিশ্বনাথত সংখ্যালঘু লোকক মাৰপিট কৰি জেল হাজোতত বিজেপি নেতা তপন হাজৰিকা
বিশ্বনাথ কাণ্ডৰ উত্তেজনা মাৰ নৌযাওতে পুনৰ বিশ্বনাথত বিজেপি নেতাৰ গুণ্ডাৰ আক্ৰমনৰ বলি হল নিৰীহ খাটি খোৱা ধৰ্মীয় সংখালঘু লোক। বিশ্বনাথ কাণ্ডৰ দৰে অনুৰূপ ধৰণে আন এজন ধৰ্মীয় সংখ্যালঘুক ইছলাম ধৰ্মত নিষিদ্ধ খাদ্য বস্তু ভক্ষণ কৰোৱা আৰু ধৰ্মীয় টুপি নিপিদ্ধিবলৈ ভাবুকি প্ৰদান কৰিছে বিজেপি নেতা তপন হাজৰিকাই। হাজৰিকাই সংখ্যালঘু শ্ৰমিকজনৰ পৰা গুণ্ডা কৰ হিচাপে মাটি পেলোৱা প্ৰতিখন গাড়ীৰ পৰা ৫০ টকাকৈ সংগ্ৰহ কৰে।
মঙলবাৰে দুপৰীয়া বিশ্বনাথ চাৰিআঁলিৰ দলগাঁও পানী যোগান আঁচনিৰ কাষত বিহপুৰীয়াৰ ঠিকাদাৰ মনোজ বৰুৱাৰ নেতৃত্বত কেইজনমান ধৰ্মীয় সংখ্যালঘু শ্ৰমিকে জে চি বি আৰু ট্ৰেক্টৰেৰে মাটি পেলোৱা কাম কৰি আছিল।
সেই ঠাইত বিশ্বনাথৰ তপন হাজৰিকা নামৰ এজন বিজেপি নেতাই শ্ৰমত নিয়োগ হৈ থকা ধৰ্মীয় সংখ্যালঘু কৰ্মচাৰীসকলক বেয়াকৈ মাৰধৰ কৰি প্ৰাণে মৰাৰ ভাবুকি প্ৰদান কৰাৰ লগতে সাম্প্ৰদায়িক মন্তব্য কৰে।
বিশ্বনাথ কাণ্ডই সমগ্ৰ ভাৰতত চাঞ্চল্যৰ সৃষ্টি কৰাৰ লগতে দুষ্কৃতিকাৰীয়ে শংকৰ-আজানৰ দেশত ভাতৃঘাটি সংঘৰ্ষৰ বীজ বিয়পাব বিচাৰিছিল। কিন্তু বিশ্বনাথৰ সমূহ জাতীয় দল-সংগঠনকে ধৰি আৰক্ষী প্ৰশাসনে সুন্দৰভাবে পৰিস্থিতি নিয়ন্ত্ৰণ কৰে। সেই ঘটনাৰ চাঞ্চল্য মাৰ নৌজাওতেই পুনৰ বিশ্বনাথত তপন হাজৰিকা নামৰ বিজেপি নেতাজনে ধৰ্মীয় সংখ্যালঘু লোকক মাৰধৰ কৰাৰ লগতে বিভিন্ন সাম্প্ৰদায়িক মন্তব্য দি ভাবুকি দিয়া কাৰ্য্যই পৰিবেশ অবনতি ঘটাব বুলি শংকা প্ৰকাশ কৰা হৈছে।
ইতিমধ্যে ভূক্তভোগী সকলে সমগ্ৰ ঘটনা সন্দৰ্ভত বিশ্বনাথ আৰক্ষী থানাত এজাহাৰ দাখিল কৰাত বিশ্বনাথ আৰক্ষীয়ে বুধবাৰে বিজেপি নেতাজনক গ্ৰেপ্তাৰ কৰি জেল হাজোতলৈ প্ৰেৰণ কৰে। সম্প্ৰতি জিলা কাৰাগাৰত ন্যায়িক জিম্মাত আছে বিশ্বনাথৰ বিধায়কৰ সোহাঁত স্বৰূপ তপন হাজৰিকা।