উজনিত অসমত এতিয়াও বানপানীৰ তাণ্ডৱ অব্যাহত আছে। ব্ৰহ্মপুত্ৰৰ বাঢ়নী পানীত যোৰহাট জিলাৰ টীয়কৰ জাঁজীমুখ সহ বৃহৎ এলেকা আজিও পানীৰ তলতে আছে।
ঘৰ-দুৱাৰ, সা-সম্পত্তিকে ধৰি শ শ বিঘা কৃষিভূমি এতিয়া পানীৰ তলত। বানপানীৰ বাবে মানুহ আৰু পশুধন একেলগতে ওখ স্থানত সহবাস কৰিবলগীয়া হৈছে।
চৰকাৰে কভিড-১৯ৰ যুঁজৰ সমান্তৰালকৈ এইসকল বানাক্ৰান্তক খাদ্য সামগ্ৰীকে ধৰি বিভিন্ন সাহায্য প্ৰদানৰ ব্যৱস্থা গ্ৰহণ কৰাৰ লগতে বিজেপি দলৰ বিভিন্ন সদস্যয়ো এই দুৰ্যোগৰ সময়ত আৰ্তসকলৰ মাজত থিয় হৈ সহায়ৰ হাত আগবঢ়াইছে।
আজি যোৰহাট জিলা বিজেপিৰ উদ্যোগত তথা জিলা কৃষি বিভাগ আৰু ৰাইজৰ সহযোগত টীয়কৰ ৰজাবাৰী অঞ্চলত প্ৰায় ১০ বিঘা মাটিত ধানৰ বীজ সিঁচা হৈছে যাতে পৰৱৰ্ত্তী সময়ত বানত সৰ্বস্বান্ত হোৱা কৃষকসকলৰ মাজত বিতৰণৰ কৰিব পৰা যায় ।
বি জে পি জিলা সভাপতি কামাখ্যা মোহন দাস, প্ৰাক্তন ৱাৰ্ড কমিচনাৰ ৰফিক উজ জামানৰ লগতে জিলা তথা মণ্ডল পৰ্য্যায়ৰ কেইবাজনো দলীয় বিষয়ববীয়াৰ উপস্থিতত আনুষ্ঠানিকভাৱে থলুৱা জাহিঙীয়া ধানৰ বীজ সিচা হয় আৰু এই বীজৰ কঠিয়াই অনাগত দিনত বানাক্ৰান্ত কৃষকসকলক উপকৃত কৰিব বুলি আশা প্ৰকাশ কৰিছে সকলোৱে।
দলীয় কামকাজৰ সমান্তৰালকৈ আৰ্তসকলৰ বাবে বিজেপি দলে লোৱা এই পদক্ষেপক এতিয়া আদৰণি জনাইছে অঞ্চলটোৰ ৰাইজে।