‘অষ্টলক্ষ্মী’ উত্তৰ-পূবৰ ভূগোল আৰু পৰিচয়ৰ ৰাজনীতিৰ জ্ঞান এতিয়াও হোৱা নাই বিজেপিৰ

প্ৰধান মন্ত্ৰী নৰেন্দ্ৰ মোদীয়ে দোহাৰি অহা ‘অষ্টলক্ষ্মী’ উত্তৰ-পূবৰ ভূগোল আৰু পৰিচয়ৰ ৰাজনীতিৰ জ্ঞানৰ পৰা এতিয়াও বহু দূৰত ৰৈছে বিজেপি!

“পৰিচয়”ৰ সংবেদনশীল ৰাজনীতি ক্ষেত্ৰ উত্তৰ-পূবত নাগৰিকত্ব বিধেয়ক জাপি দিব খোজাৰ নিমিলা অংকৰ পিছতো শিক্ষা নোলোৱা গেৰুৱা দলটোৰ সাধাৰণ নিৰ্বাচনৰ প্ৰাৰ্থী তালিকাই পুনৰ উদঙাই দিছে দলটোৰ জ্ঞানৰ নমুনা।

দলটোৱে শিলচৰ সমষ্টিৰ প্ৰাৰ্থীৰূপে ঘোষণা কৰিছে ডাঃ ৰাজদীপ ৰয় “বেংগলী”ক! আৰু খোদ কেন্দ্ৰীয় গৃহ ৰাজ্য মন্ত্ৰী কিৰেন ৰিজিজুক অৰুণাচল ৱে’স্তৰ পৰিৱৰ্তে প্ৰকাশ কৰিছে অৰুণাচল ইস্তৰ প্ৰাৰ্থীৰূপে—যাক লৈ টুইটযোগে স্পষ্টীকৰণ পৰ্য্যন্ত দিব লগা হৈছে সাংসদজনে!

আনহাতে কোনো লোকৰ নামত জাতি যোগ দি গেৰুৱা দলে ঘটোৱা সভ্য পৃথিৱীয়ে উৎকট “বৰ্ণবিদ্বেষ” বুলি গণ্য কৰিব পৰা এই গুৰুতৰ ঘটনাৱেও সৃষ্টি কৰিছে বিৰূপ প্ৰতিক্ৰিয়াৰ।

ডাঃ ৰাজদীপ ৰয় অসম বিজেপিৰ এজন মুখপাত্ৰ, অস্থিৰোগ বিশেষজ্ঞৰূপে তেওঁৰ আছে আন এক পৰিচয়। ১৯৯৬ আৰু ২০০১ চনত দুবাৰকৈ শিলচৰক অসম বিধান সভাত প্ৰতিনিধিত্ব কৰা বিজেপিৰে প্ৰাক্তন বিধায়ক বিমলাংশু ৰয়ৰ তেওঁ পুত্ৰ।

দলীয় সূত্ৰই ইয়াক “সামান্য টাইপিং এৰ’ৰ”ৰূপে গা এৰা দিব খুজিলেও, ঘটনাটোৰ সংবেদনশীলতা স্বীকাৰ কৰি চ’চিয়েল মিডিয়াতো বিভিন্নজনে ইয়াৰ গৰিহণা দিছে।

“মই বাঙালী। কিন্তু মোৰ নামকে বিকৃত কৰি কোনোবাই বাঙালী বুলিলে মই কিয় আঘাত নাপাম? তাতে এইটো সামান্য কথা নহয়, এইখন ভাৰত শাসন কৰা এটা দলে দেশৰ সাধাৰণ নিৰ্বাচনৰ বাবে ঘোষণা কৰা প্ৰাৰ্থী তালিকা! আপুনি কোনো তালিকাত আপোনাৰ নামৰ লগত জাতি লগাই প্ৰকাশ কৰিলে ভাল পাব নেকি?” নৰ্থ ইষ্ট নাও-ত মন্তব্য এজন “বেংগলী” ভদ্ৰলোকৰ।

টাইপিং এৰ’ৰৰূপে ইয়াক বহুলোকে মানি ল’ব খোজা নাই। “এইটো কেনেকৈ টাইপৰ ভুল হ’ব। ইয়াত বানানৰ ভুলটো হোৱা নাই। তেওঁৰ নামৰ সৈতে শুদ্ধকৈ সম্পূৰ্ণ এটা শব্দ লগাই দিয়া হৈছে,” লোকজনৰ মন্তব্য।

এই সন্দৰ্ভত ডাঃ ৰয়ৰ সৈতে যোগাযোগ কৰাত নৰ্থ ইষ্ট নাও-ক তেওঁ জনায়, “নাই নাই মই ‘বেংগলী’ নিলিখো। কেনেকে হৈছে এইটো নাজানো। শুধৰণিৰ বাবে দলক মই জনাইছো।”