গোলাঘাট জিলাত পোহৰলৈ আহিছে এক বৃহাৎ সুৰা চুৰি কাণ্ড। এই সুৰা চুৰিৰ ঘটনাত জড়িত থকাৰ অভিযোগত ভাৰতীয় জনতা যুৱ মৰ্চাৰ বিলাসীপাৰা জিলা সমিতিৰ সাধাৰণ সম্পাদক ৰাকেশ নাগক আৰক্ষীয়ে গ্ৰেপ্তাৰ কৰিছে। ধৃত নেতাগৰাকীৰ পৰা বৃহৎ পৰিমাণৰ অবৈধ বিলাতী সুৰা উদ্ধাৰ কৰা হৈছে। এই ঘটনাই গোলাঘাট জিলাৰ পূৰ্বৰ সুৰা চুৰিৰ কাণ্ডৰ সৈতে সম্পৰ্কিত বুলি আৰক্ষীয়ে তথ্য লাভ কৰাৰ কথা সদৰী কৰিছে।
শেহতীয়াকৈ গোলাঘাটৰ এখন বিলাতী সুৰাৰ বিপনীৰ পৰা কেইবা লক্ষাধিক টকাৰ সুৰা চুৰিৰ ঘটনা সংঘটিত হৈছিল। ঘটনাৰ পিছত গোলাঘাট আৰক্ষী থানাত এজাহাৰ দাখিল কৰা হয়। এই এজাহাৰৰ ভিত্তিত তদন্ত আৰম্ভ কৰি আৰক্ষীয়ে গুৱাহাটীৰ পৰা ৰাজেশ দাস নামৰ এজনক গ্ৰেপ্তাৰ কৰে। ৰাজেশৰ স্বীকাৰোক্তিৰ ভিত্তিত চাপৰ আৰক্ষীয়ে বিজেপি নেতা অৰুণ কুমাৰ নাগৰ মালিকানাধীন নাগ ৱাইন শ্ব’পত অভিযান চলায়।
অভিযানৰ সময়ত আৰক্ষীয়ে তথ্যৰ ভিত্তিত চাপৰৰ বহলপুৰত অৱস্থিত ৰাজদ্বীপ বিলাতী সুৰা বিপনীৰ পৰা অবৈধ সুৰা অন্যত্ৰ সৰবৰাহৰ সময়ত ৰাকেশ নাগক হাতে-লোটে ধৰে। আৰক্ষীয়ে সুৰা সৰবৰাহৰ বাবে ব্যৱহৃত AS 01 QC 8732 নম্বৰৰ বলেৰ’ পিকআপ বাহনখন জব্দ কৰাৰ লগতে শতাধিক অবৈধ বিলাতী সুৰাৰ কাৰ্টন উদ্ধাৰ কৰে। ইয়াৰ লগতে বাহনৰ চালক মানজাত আলীকো আটক কৰা হয় বুলি সদৰী কৰিছে।
জানিব পৰা মতে, ৰাকেশ নাগৰ পিতৃ অৰুণ কুমাৰ নাগ চাপৰ পৌৰসভাৰ বিজেপিৰ উপ-পৌৰপতি। অভিযোগ উত্থাপিত হৈছে যে ৰাকেশ নাগে পিতৃৰ পদ-পদৱীৰ ক্ষমতাৰ অপব্যৱহাৰ কৰি দীৰ্ঘদিন ধৰি পশ্চিম অসমত অবৈধ আৰু চোৰাং সুৰাৰ ৰমৰমীয়া বেহা চলাই আহিছে। এই ঘটনা পোহৰলৈ অহাৰ পিছত ভাৰতীয় জনতা যুৱ মৰ্চাৰ বিলাসীপাৰা জিলা সমিতিয়ে তাৎক্ষণিকভাৱে ৰাকেশ নাগক সাধাৰণ সম্পাদকৰ পদৰ পৰা নিলম্বন কৰে। জিলা সমিতিয়ে এক বিবৃতিত জানিবলৈ দিয়ে যে ৰাকেশ নাগে দলৰ দায়িত্বত থাকি আইনবিৰোধী কামত জড়িত হোৱাৰ কাৰণে তেওঁক তাৎক্ষণিকভাৱে নিলম্বন কৰা হৈছে।
