নাগৰিকত্ব সংশোধনী আইনৰ বিৰুদ্ধে ৰাজ্যজুৰি আন্দোলন হৈ থকাৰ মাজতে বিজেপি আৰু ইয়াৰ ভাতৃ সংগঠন এবিভিপিৰ একাংশ কর্মীয়েও এই আইনৰ বিৰোধিতা কৰি পদত্যাগ কৰিছিল।
তেনে সময়তে বিজেপি এবিভিপিৰ একাংশ লোক কংগ্ৰেছৰ সৈতে চামিল হোৱা পৰিলক্ষিত হৈছে।
শুকুৰবাৰে গুৱাহাটীৰ ৰাজীৱ ভৱনত প্ৰদেশ কংগ্ৰেছৰ সভাপতি ৰিপুন বৰা, ভাৰতীয় জাতীয় কংগ্ৰেছৰ সাধাৰণ সম্পাদক হৰিশ ৰাৱাট আৰু প্ৰাক্তন মুখ্য মন্ত্ৰী তৰুণ গগৈৰ উপস্থিতিত দলটোত যোগদান কৰে শতাধিক লোকে।
ইয়াৰে সৰহসংখ্যক বিজেপি, এবিভিপি আৰু ঐক্য সেনা অসমৰ পৰা পদত্যাগ কৰি যোগদান কৰা লোক।
জাগীৰোড মহাবিদ্যালয়ৰ এবিভিপি কলেজ শাখাই আজি আনুষ্ঠানিকভাৱে কংগ্ৰেছত যোগদান কৰাৰ লগতে সদস্য ভৰ্তি পত্ৰও গ্ৰহণ কৰে।
‘’আমি কা কোনোপধ্যে মানি নলওঁ। আমি বিদেশী নতুনকৈ আনিব নিবিচাৰো। সেয়েহে এবিভিপি এৰি আজি কংগ্ৰেছত যোগদান কৰিছো।‘’ যোগদান কৰা এগৰাকী ছাত্ৰীয়ে এইদৰে কয়।
ইপিনে, বিজেপিৰ সংখ্যালঘু মৰ্চাৰ পৰা পদত্যাগ কৰি ১০ গৰাকী সদস্যইয়ো আনুষ্ঠানিকভাৱে কংগ্ৰেছত যোগদান কৰে। ইয়াৰ ভিতৰত হাফিজ ৰাফিকুল আহমেদ, অমৰেন্দ্ৰ চৌধুৰী, চফিউজ ৰহমান অন্যতম।
আনহাতে, ঐক্য সেনা অসমৰ এজন আগশাৰীৰ নেতা বিপ্লৱ তালুকদাৰকে ধৰি ৩০ গৰাকী সদস্যই প্ৰদেশ কংগ্ৰেছত যোগদান কৰে।
ইপিনে, প্ৰাক্তন বায়ু সেনা বিষয়া বিকাশ কুমাৰ দাস আৰু মঙ্গলদৈ অসামৰিক চিকিৎসালয়ৰ চিকিৎসক ভায়’লিনা কাশ্যপেও আজি কংগ্ৰেছত যোগদান কৰে।
তাৎপয্যপূৰ্ণভাৱে, মহানগৰীৰ নুনমাটিৰ এগৰাকী দশম শ্ৰেণীৰ ছাত্ৰ কৌশিক কাশ্যপেও কংগ্ৰেছৰ নীতি-আদৰ্শৰ প্ৰতি আকৃষ্ট হৈ দলটোত যোগদান কৰে।
‘’চাৰিওফালে কাৰ বিৰুদ্ধে যি আন্দোলন চলি আছে সেয়ে মই কংগ্ৰেছত যোগদান কৰিছো। বিজেপিৰ লাঞ্চনা, বঞ্চনা, প্ৰতাৰণাৰ বলি হৈছে অসমৰ ৰাইজ। সেয়েহে মই ১০০ বছৰতকৈয়ো পুৰণি সৰ্বভাৰতীয় ৰাজনৈতিক দলত যোগদান কৰিলো। মোদীৰ মিঠা কথা, হিমন্তৰ জাতিভেদ কৰা কথা আৰু নচলে।‘’ কৌশিকে এইদৰে কয়।
ইয়াৰোপৰি আপৰ দুগৰাকী সদস্য ক্ৰমে নিয়াজ আহমেদ আৰু ৰূপক সুত্ৰধৰো আজি কংগ্ৰেছ দলৰ সৈতে চামিল হয়।