বিজেপিৰ বেয়া দিন আৰম্ভ হৈছে আৰু আগন্তুক নিৰ্বাচনত দলটোৰ পতন নিশ্চিত বুলি মন্তব্য কৰিছে সাংসদ তথা কংগ্ৰেছ নেতা গৌৰৱ গগৈয়ে। শিৱসাগৰত উপস্থিত হৈ এক সংবাদমেল সম্বোধন কৰি তেওঁ বিজেপি চৰকাৰ আৰু মুখ্যমন্ত্ৰী ডঃ হিমন্ত বিশ্ব শৰ্মাক তীব্ৰ সমালোচনা কৰে। তেওঁ কয় যে যোৱা ৭-৮ মাহৰ পৰা বিজেপিৰ ভিতৰচ’ৰাত চলা বিভিন্ন অনিয়ম আৰু দুৰ্নীতিৰ তথ্য পোহৰলৈ আহিবলৈ ধৰিছে। গগৈৰ মতে বিজেপিৰ মাজত থকা গৰু চোৰ আৰু চাউল চোৰৰ মুখা এতিয়া খোল খাইছে। আনকি জাতি-মাটি-ভেটিৰ কথা কোৱা চৰকাৰখনৰ নিজৰ বিধায়কেহে এতিয়া নাগৰিকত্বৰ প্ৰমাণ দিব পৰা নাই বুলি তেওঁ কটাক্ষ কৰে।
নিৰ্বাচনৰ পূৰ্বে ভোটাৰ তালিকা সংশোধনক লৈ বিজেপিয়ে ষড়যন্ত্ৰ কৰা বুলি গৌৰৱ গগৈয়ে গুৰুতৰ অভিযোগ উত্থাপন কৰে। তেওঁ কয় যে মুখ্যমন্ত্ৰী আৰু মন্ত্ৰী অশোক সিংহলে বহিঃৰাজ্যৰ পৰা ভোটাৰ আনি অসমৰ প্ৰকৃত থলুৱা ভোটাৰৰ নাম কৰ্তন কৰাৰ পৰিকল্পনা কৰিছে। অসমৰ সচেতন ভোটাৰৰ অধিকাৰ খৰ্ব কৰিবলৈ কৰা এই কাৰ্যক তেওঁ গণতন্ত্ৰৰ বাবে ভাবুকি বুলি অভিহিত কৰে। এই বিষয়ত নিৰ্বাচন আয়োগে নিজাববীয়াকৈ গোচৰ ৰুজু কৰিব লাগিছিল বুলি উল্লেখ কৰি তেওঁ নিৰ্বাচন আয়োগৰ নিষ্ক্ৰিয়তাক লৈ উদ্বেগ প্ৰকাশ কৰে। তেওঁ প্ৰশ্ন কৰে যে যদি বিজেপি ইমানেই জনপ্ৰিয় তেন্তে কিয় তেওঁলোকে বহিঃৰাজ্যৰ ভোটাৰৰ সহায় ল’বলগীয়া হৈছে।
বিৰোধী মিত্ৰতাৰ সন্দৰ্ভত গৌৰৱ গগৈয়ে কয় যে অসমৰ জনসাধাৰণে বিৰোধী দলবোৰ এক হোৱাটো বিচাৰে। অখিল গগৈৰ নেতৃত্বাধীন ৰাইজৰ দলৰ সৈতে আসন বুজাবুজিৰ বিষয়ত তেওঁ কয় যে কংগ্ৰেছৰ মাজত প্ৰাৰ্থীৰ অভাৱ নাই যদিও মিত্ৰতাৰ স্বাৰ্থত তেওঁলোকে কেইবাখনো আসন ত্যাগ কৰিবলৈ সাজু আছে। তেওঁ দৃঢ়তাৰে কয় যে বিৰোধীৰ মাজত ১০০ শতাংশ মিত্ৰতা হ’ব। ইয়াৰ বিপৰীতে বিজেপি আৰু অগপৰ মাজতহে আসন ভাগ-বাটোৱাৰাক লৈ তীব্ৰ সংঘাত চলি থকা বুলি তেওঁ দাবী কৰে। আনকি এই মিত্ৰতা নিৰ্বাচনলৈকে টিকিব নে নাই তাক লৈও তেওঁ সন্দেহ প্ৰকাশ কৰে।
মুখ্যমন্ত্ৰী হিমন্ত বিশ্ব শৰ্মাক লক্ষ্য কৰি গগৈয়ে কয় যে আগন্তুক নিৰ্বাচনত বিজেপিৰ পতনৰ মূল কাৰণ হ’ব মুখ্যমন্ত্ৰীগৰাকী নিজে। তেওঁৰ মতে মুখ্যমন্ত্ৰীৰ কথা-বতৰা দিনক দিনে পাতল হৈ গৈছে আৰু তেওঁৰ বিবেক-বুদ্ধিয়ে সঠিকভাৱে কাম কৰা নাই। আগন্তুক নিৰ্বাচনটো কোনো ৰাজনৈতিক দলৰ মাজত নহয়, বৰঞ্চ মুখ্যমন্ত্ৰী আৰু অসমৰ সাধাৰণ ৰাইজৰ মাজতহে হ’ব বুলি তেওঁ মন্তব্য কৰে। তেওঁ আৰু কয় যে অমিত শ্বাহৰ বাবেই সৰ্বানন্দ সোণোৱালে পুনৰ মুখ্যমন্ত্ৰীৰ পদ নাপালে। এইবাৰ অসমৰ ৰাইজে বিজেপিৰ শাসন ওফৰাই পেলাব আৰু নিৰ্বাচনৰ পিছত হিমন্ত বিশ্ব শৰ্মাৰ মুখ্যমন্ত্ৰীৰ চকী সুৰক্ষিত নহয় বুলিও তেওঁ ভৱিষ্যদ্বাণী কৰে।
অসম প্ৰদেশ কংগ্ৰেছৰ এই বিশেষ অভিযান ‘ৰাইজৰ পদূলিত ৰাইজৰ কংগ্ৰেছ’ৰ জৰিয়তে তেওঁলোকে জনসাধাৰণৰ সমস্যাৰ বুজ লৈছে আৰু নিৰ্বাচনী ইস্তাহাৰৰ বাবে মতামত সংগ্ৰহ কৰিছে। শিৱসাগৰৰ এই সংবাদমেলত গৌৰৱ গগৈৰ সৈতে ৰ’জলীনা তিৰ্কী, অজয় গগৈ আৰু শুভ্ৰমিত্ৰ গগৈকে ধৰি দলটোৰ কেইবাজনো জ্যেষ্ঠ নেতা উপস্থিত থাকে। তেওঁলোকে একমুখে দাবী কৰে যে আগন্তুক বিধানসভা নিৰ্বাচনে অসমৰ লগতে দেশবাসীক এক নতুন ৰাজনৈতিক পৰিৱৰ্তনৰ বাৰ্তা দিব।
আগন্তুক নিৰ্বাচনত নিজৰ ভোটাধিকাৰ সাব্যস্ত কৰিবলৈ আৰু বিজেপিৰ ভুৱা প্ৰতিশ্ৰুতিৰ বিৰুদ্ধে থিয় হ’বলৈ তেওঁ ৰাইজক আহ্বান জনায়। বিশেষকৈ থলুৱা ৰাইজক তেওঁলোকৰ ভোটৰ সুৰক্ষা নিশ্চিত কৰিবলৈ তেওঁ অনুৰোধ কৰে। গগৈৰ মতে এইবাৰ নিৰ্বাচনত ৰাইজে মামা-মামীৰ ৰাজনীতিৰ পৰা অসমক মুক্ত কৰিব আৰু কংগ্ৰেছ নেতৃত্বাধীন মিত্ৰজোঁটক আশীৰ্বাদ দিব।
