বিধানসভাৰ উপ-নিৰ্বাচনৰ প্ৰাৰ্থীৰ তালিকা ঘোষণাৰ পিছতে বিজেপিত আৰম্ভ হৈছে বিদ্ৰোহ। ধলাই আসনত এজন ‘বহিৰাগত লোক’ক প্ৰাৰ্থিত্ব দিয়াৰ বাবে দলৰ ভিতৰত গভীৰ অসন্তুষ্টিৰ সৃষ্টি হৈছে। স্বজন-তোষণৰ অভিযোগো উত্থাপন হৈছে।
ইয়াৰ মাজতে বিজেপিৰ কাছাৰ জিলাৰ উপ সভাপতি অমিয়কান্তি দাসে বহিৰাগত প্ৰাৰ্থী দিয়াৰ প্ৰতিবাদত দল ত্যাগ কৰাৰ কথা ঘোষণা কৰে। উপ-নিৰ্বাচনত তেওঁ নিৰ্দলীয় প্ৰাৰ্থী হিচাপে যুঁজিব বুলিও কয়।
ধলাই আসনত বিজেপিৰ টিকটৰ অন্যতম প্ৰতিদ্বন্দ্বী আছিল জ্যেষ্ঠ নেতা অমিয়কান্তি দাস। কিন্তু টিকট নাপাই ক্ষোভ প্ৰকাশ কৰিছে। জিলা সভাপতিলৈ পদত্যাগ পত্ৰ প্ৰেৰণ কৰিছে।
পিছত অমিয়কান্তি দাসে ছ’চিয়েল মিডিয়াত লিখিছে, ‘ভাৰতীয় জনতা পাৰ্টিয়ে এতিয়া আদৰ্শত বিশ্বাস নকৰে। তেওঁলোকে এতিয়া স্বাৰ্থত বিশ্বাস কৰে। ধলাই সমষ্টিৰ প্ৰাৰ্থী নিৰ্বাচনত পুনৰ প্ৰমাণিত হ’ল। দলত গণতন্ত্ৰ বুলি এতিয়া একো নাই।‘
সমষ্টিটোত বিজেপিয়ে প্ৰাৰ্থী কৰা নিহাৰঞ্জন দাস স্থানীয় বাসিন্দা নহয় বুলিও তেওঁ দাবী কৰে।
অহা ১৩ নৱেম্বৰত আন ছখন ৰাজ্যৰ লগতে অসমৰ ৫টা বিধানসভা সমষ্টিতো উপ-নিৰ্বাচন অনুষ্ঠিত হ’ব। তাৰে এটা হৈছে ধলাই সমষ্টি। বিজেপিয়ে সেই আসনত নিহাৰঞ্জন দাসক টিকট দিছে। তেওঁ শিলচৰৰ সাংসদ পৰিমল শুক্ল বৈদ্যৰ ঘনিষ্ঠ বুলি জনা যায়। শুক্ল বৈদ্য সাংসদ হোৱাৰ আগতে এই সমষ্টিৰ বিধায়ক আছিল।
