দেশৰ সেনাৰ কামকাজৰ ওপৰত সন্দেহ কৰে কংগ্ৰেছে। দেওবাৰে ভাৰতীয় জনতা পাৰ্টীৰ অসম প্ৰদেশৰ হেঙেৰাবাৰী কাৰ্যালয়ত ভাৰতীয় জনতা পাৰ্টীৰ ৰাষ্ট্ৰীয় সাধাৰণ সম্পাদক ৰাম মাধৱে বিৰোধী দল কংগ্ৰেছক সমালোচনা কৰি এইদৰে কয়।
ইপিনে, বিৰোধী দল হিচাপে কংগ্ৰেছে কাৰ পক্ষত নিৰ্বাচনত অৱতীৰ্ণ হৈছে তাৰ কোনো স্পষ্টতা নাই বুলি সংবাদমেলত সদৰী কৰে ৰাম মাধৱে।
তেওঁ কয়, ‘কংগ্ৰেছে পাকিস্তানৰ পক্ষত নিৰ্বাচন খেলিছে নে ভাৰতৰ জনসাধাৰণৰ পক্ষত নিৰ্বাচনত অৱতীৰ্ণ হৈছে সেইয়া ভাৰতৰ জনসাধাৰণে ধৰিবই পৰা নাই।‘
আনহাতে, বিজেপিৰ বিৰুদ্ধে নিৰ্বাচনত অৱতীৰ্ণ হ’ব পৰাকৈ প্ৰধান বিৰোধী দল কংগ্ৰেছৰ কোনো ইচ্ছু নাই বুলি সংবাদমেলত দাবী কৰে বিজেপিৰ ৰাষ্ট্ৰীয় সাধাৰণ সম্পাদকজনে।
‘তেওঁলোকে কোনো ইচ্ছুবিহীনভাৱেই লোকসভা নিৰ্বাচনত অৱতীৰ্ণ হৈছে,‘-ৰাম মাধৱৰ মন্তব্য।
ইপিনে, কংগ্ৰেছে পৰিয়ালকেন্দ্ৰিক ৰাজনীতি কৰে বুলি উল্লেখ কৰি তেওঁ কয়, ‘কংগ্ৰেছ এটা পৰিয়ালকেন্দ্ৰিক দল কিন্তু বিজেপি পৰিয়াল কেন্দ্ৰিক দল নহয়।‘
তদুপৰি, লোকসভা নিৰ্বাচনৰ পূৰ্বে অসমত কংগ্ৰেছ আৰু এআইয়ুডিএফৰ মাজত গোপন বুজা-বুজি হোৱা বুলি মন্তব্য কৰে ৰাম মাধৱে।
‘বিজেপি আৰু নৰেন্দ্ৰ মোডীৰ সৈতে সন্মুখীন হ’বলৈ সমগ্ৰ দেশতে কোনো বিপক্ষ দলৰ ক্ষমতা আৰু সাহস নাই। সেয়েহে বিপক্ষ দল সমূহে যাৰ লগতেই মিত্ৰতা নকৰক কিয় ইয়াত একো লাভ নহ’ব। তদুপৰি, বিজেপিক পৰাভূত কৰিবলৈয়ো কংগ্ৰেছে প্ৰয়াস কৰি আছে যদিও অন্য ৰাজ্যৰ বিৰোধীৰ দৰেই দশা অসমত কংগ্ৰেছৰো হ’ব,‘-এই দাবী ৰাম মাধৱৰ।
ইপিনে, অসমৰ ৫ জন বৰ্তমানৰ সাংসদৰ নাম প্ৰাৰ্থিত্বৰ তালিকাৰ পৰা বাদ পৰাৰ পাছতেই নগাঁৱৰ সাংসদ ৰাজেন গোহাঁই আৰু তেজপুৰৰ সাংসদ আৰ পি শৰ্মাই মুকলিভাৱে বিদ্ৰোহ কৰিলেও দলটোক আগবঢ়াই নিয়াৰ স্বাৰ্থত এইবাৰ নতুন প্ৰাৰ্থীসমূহক বাচনি কৰা হৈছে বুলিও দলটোৰ ৰাষ্ট্ৰীয় সাধাৰণ সম্পাদক ৰাম মাধৱে সদৰী কৰে।
