কোৱা হয় যে কথাত বটা পায়, কথাত কটা যায়। মুখেৰে এটা কথা নিৰ্গত হোৱাৰ পাছত তাক ৰোধ কৰিব নোৱাৰি। বহুতো লোকে মুখেৰে অনাকাংক্ষিত কথা কোৱাৰ বাবে গৰিহণাৰ পাত্ৰ হৈ আহিছে। এইক্ষেত্ৰত বিজেপিৰ বিতৰ্কিত সাংসদ তেজস্বী সূৰ্য অন্যতম।
সততে বিজেপিৰ যুৱ নেতাসকলৰ ভিতৰত উজ্জল নক্ষত্ৰ বুলি চৰ্চা লাভ কৰি আহিছে ৩১ বৰ্ষীয় তেজস্বীয়ে। সততে বিতৰ্কিত মন্তব্যৰ বাবেও গৰিহণাৰ সন্মুখিন হৈ আহিছে তেওঁ।
শেহতীয়াকৈ তেওঁ মন্তব্য কৰিছিল যে যিসকলে ইতিমধ্যে খ্ৰীষ্টান আৰু ইছলাম ধৰ্মত দীক্ষিত হৈছে, তেওঁলোকে অতি সোনকালে হিন্দু ধৰ্মলৈ ঘূৰি আহিব লাগে। অৰ্থাৎ তেওঁলোকক ঘৰ ৱাপচী কৰাটো এটা প্ৰধান দায়িত্ব।
মঠ-মন্দিৰসমূহেও এইক্ষেত্ৰত বছৰেকীয়াভাৱে ব্যৱস্থা ল’ব লাগে। পাকিস্তানত হিন্দুৰ পৰা মুছলিম হোৱা লোকসকলৰ ক্ষেত্ৰতো এনেধৰণৰ ব্যৱস্থা ল’ব লাগে বুলি তেওঁ কয়।
তেজস্বীয়ে দিয়া মন্তব্যটোৰ ভিডিঅ’টোৱে ভাইৰেল হৈ পৰে। বহু লোকে এনেধৰণৰ সাম্প্ৰদায়িক মন্তব্যৰ বাবে তেওঁক গৰিহণা দিয়ে। অৱশেষত মন্তব্যটো উঠাই ল’বলৈ বাধ্য হৈ পৰে তেওঁ। টুইটাৰযোগে আজি তেজস্বীয়ে এই কথা ঘোষণা কৰে।
তেওঁ কয় যে দুদিন পূৰ্বে উডুপি শ্ৰীকৃষ্ণ মথত এটা ভাষণ প্ৰদান কৰিছিল। তেওঁৰ ভাষণটোৰ বিষয়বস্তু আছিল ভাৰতত হিন্দুৰ পুনৰ জাগ্ৰতকৰণ। কিন্তু ভাষণটোত প্ৰদান কৰা তেওঁৰ কিছু মন্তব্যক লৈ বিতৰ্ক হোৱাত তেওঁ মন্তব্যসমূহ উঠাই লৈছে।
উ্ল্লেখযোগ্য যে তেজস্বী সূৰ্য হৈছে কৰ্ণাটকৰ দক্ষিণ বাংগালোৰৰ সাংসদ। বিজেপি শাসিত ৰাজ্যখন শেহতীয়াকৈ এখন বিধেয়কক লৈ উত্তাল হৈ আছে। বিধেয়কখন হৈছে ধৰ্মান্তৰকৰণ বিৰোধী কৰ্ণাটক ধৰ্মীয় স্বাধিনতাৰ অধিকাৰ বিধেয়ক ২০২১। বিৰোধীৰ প্ৰবল বিৰোধিতাৰ স্বত্বেও কৰ্ণাটকৰ বিধানসভাত বিধেয়কখনে ইতিমধ্যে গৃহিত হৈছে।
আনহাতে, কিয় তেজস্বীয়ে এইদৰে মন্তব্যটো উঠাই লৈছে সেই লৈও চৰ্চা আৰম্ভ হৈছে। ইয়াৰ পূৰ্বে কোনো বিজেপি নেতাই এনেদৰে ৰাজহুৱা মন্তব্যসমূহ এনেদৰে উঠাই লোৱাটো পৰিলক্ষিত হোৱা নাই।
ৰাজনৈতিক বিশ্লেষকসকলৰ মতে, আসন্ন গোৱা বিধানসভা নিৰ্বাচনৰ বাবেই তেজস্বীক এনেদৰে মন্তব্যটো উঠাই ল’বলৈ বিজেপিৰ কেন্দ্ৰীয় সমিতিয়ে জোৰ দিছে। তেজস্বীৰ মন্তব্যটোৱে গোৱাৰ খ্ৰীষ্টানধৰ্মীসকলৰ মনত বিৰূপ প্ৰভাৱ পেলাব বুলি আশংকা কৰিছে বিজেপিয়ে।
