গুৱাহাটী চিকিৎসা মহাবিদ্যালয় হাস্পাতলত তেজৰ ব্যৱসায়ী চক্ৰ উৎখাত
গুৱাহাটী চিকিৎসা মহাবিদ্যালয় হাস্পাতলত বহুদিনৰ পৰাই তেজৰ ব্যৱসায়ী চক্ৰৰ দপ্দপনি চলি থকাৰ বাতৰি প্ৰকাশ পাই আহিছে। কিছুমান লোকে ৰোগীক অত্যধিক দৰত তেজ বিক্ৰী কৰি থকাৰ মাজতে সোমবাৰে ভঙাগড় আৰক্ষীয়ে চিকিৎসা মহাবিদ্যালয়খনত থকা এটা তেজ ব্যৱসায়ী চক্ৰ উৎখাত কৰে।
জানিব পৰা মতে, হাস্পাতালখনত চাৰিজনীয়া ব্যৱসায়ীৰ দল এটাই অত্যধিক ধনৰ বিনিময়ত তেজ বিক্ৰী কৰি থকাৰ অভিযোগ লাভ কৰাৰ পাছতেই ভঙাগড আৰক্ষীয়ে দুজন লোকক গ্ৰেপ্তাৰ কৰে।
আৰক্ষীয়ে গ্ৰেপ্তাৰ কৰা লোক দুজনৰ এজনক গুৱাহাটীৰ বকুল তালুকদাৰ আৰু আনজনক গৌৰীপুৰৰ নিয়াকৎ আলী বুলিচিনাক্ত কৰা হৈছে।
আৰক্ষীয়ে জানিবলৈ দিয়া মতে, ঘটনাটোত জড়িত আন দুজন লোক ঘটনাস্থলীৰ পৰা পলাই যাবলৈ সক্ষম হয়। আৰক্ষীয়ে অপৰাধী দুজনক তেজ বিক্ৰী কৰি থকা সময়ত হাতে লোটে ধৰা পেলাই গ্ৰেপ্তাৰ কৰে।
গুৱাহাটী চিকিৎসা মহাবিদ্যালয়ত তেজৰ ব্যৱসায় চলি থকাৰ অভিযোগ দীৰ্ঘদিনীয়া যদিও তেজ ব্যৱসায়ৰ এই চক্ৰ সম্পূৰ্ণৰূপে উৎখাত কৰিবলৈ আৰক্ষী সক্ষম হোৱা নাই। কিয়নো ইয়াৰ আগেয়েও আৰক্ষীয়ে এনে তেজ ব্যৱসায়ৰ সৈতে জড়িত লোকক গ্ৰেপ্তাৰ কৰিছিল যদিও তাৰপাছতো এই ব্যৱসায় চলি আহিছে।
তেজ ব্যৱসায়ৰ এই চোৰাং ব্যৱসায়ৰ সৈতে এটা বৃহৎ চক্ৰ জড়িত হৈ আছে আৰু ইয়াক সম্পূৰ্ণৰূপে উৎখাত কৰিবলৈ আৰক্ষীয়ে ব্যাপক অভিযানৰ পৰিকল্পনা কৰিব লাগিব।