অসমৰ পৰা য়ুক্ৰেইনত চিকিৎসা বিজ্ঞান অধ্যয়নৰ বাবে নিকুমণি কাকতি নামৰ এগৰাকী ছাত্ৰই সাগৰত গা ধুবলৈ গৈ মৃত্যুক আকোৱালি ল’বলগীয়া হোৱা ঘটনাত ছাত্ৰগৰাকীৰ পিতৃ-মাতৃ তথা পৰিয়ালৰ লোকসকল শোকত ভাগি পৰিছে।
গোৱালপাৰা সৈনিক স্কুলৰ পৰা উত্তীৰ্ণ গুৱাহাটীৰ লালগণেশৰ কৃষ্ণ নগৰৰ বাসিন্দা ছাত্ৰগৰাকীয়ে য়ুক্ৰেইনলৈ পাঁচবছৰীয়া চিকিৎসাবিজ্ঞানৰ পাঠ্যক্ৰম অধ্যয়ন কৰাৰ বাবে গৈছিল। তৃতীয় বৰ্ষৰ পৰীক্ষা সমাপ্ত হোৱাৰ পাছত ছাত্ৰগৰাকীয়ে সমনীয়া আন বন্ধু-বান্ধৱৰ সৈতে সাগৰলৈ গাঁ ধুৱৰ বাবে ওলাই যায় আৰু কৰুণ মৃত্যুক সাৱতিব লগা হয়।
ছাত্ৰগৰাকীৰ পৰিয়ালৰ এগৰাকী সদস্যই সংবাদ মাধ্যমৰ আগত জনোৱা অনুসৰি নিকুমণি য়ুক্ৰেইনৰ চিউমি ষ্টেট য়ুনিভাৰ্ছিটিত অধ্যয়ন কৰি আছিল।
তৃতীয় বৰ্ষৰ পৰীক্ষাত অৱতীৰ্ণ হোৱা নিকুমণি অহা বৃহস্পতিবাৰে ঘৰলৈ অহা কথা আছিল। তেনেসময়তে য়ুক্ৰেইনৰ পৰা ছাত্ৰগৰাকীৰ মৃত্যুৰ বাতৰিয়ে পৰিয়ালৰ লোকসকলৰ শোকস্তব্ধ কৰি তুলিছে।
আনহাতে, বৰ্তমান ছাত্ৰগৰাকীৰ মৃতদেহটো স্বগৃহলৈ ঘুৰাই অনাৰ বাবে জিলা প্ৰশাসনৰ লগত পৰিয়ালৰ লোকে যোগাযোগ অব্যাহত ৰাখিছে। সকলো প্ৰক্ৰিয়া পূৰ্ণ হ’লে তিনি-চাৰি দিনৰ ভিতৰত ছাত্ৰগৰাকীৰ মৃতদেহ ভাৰতত উপস্থিত হোৱা সম্ভাৱনা আছে।