শুকুৰবাৰে কলাক্ষেত্ৰ চৌহদৰ বদলা পদ্ম আতা জন্ম উৎসৱ আৰু সংস্কৃতি সমাৰোহত গুৰু দুজনাৰ নাট, জনগোষ্ঠীয় কৃষ্টি সংস্কৃতিৰে উদ্ভাসিত হৈ উঠে ।
দুপৰীয়া কলাক্ষেত্ৰত অনুষ্ঠিত ‘বৰ অসমৰ জনগোষ্ঠীয় সাংস্কৃতিক মিলন সত্ৰত’ সকলো জনগোষ্ঠীৰ প্ৰতিনিধিয়ে সকলো ধৰণৰ ভিন্নতা নেওচি সাংস্কৃতিক মিলনেৰে বৰ অসমৰ মিলন সেঁতু কটকটীয়া কৰাৰ সংকল্প গ্ৰহণ কৰে। সংস্কৃতি সমাৰোহত ধৰ্মীয়-ৰাজনৈতিক আদি পাৰ্থক্য নেওচি সাংস্কৃতিক আদান প্ৰদানেৰে ঐক্যবদ্ধ সংহতি গঢ়াৰ প্ৰস্তাৱ ৰখা হয়।
মহানগৰীৰ পাঞ্জাবাৰীৰ শ্ৰীমন্ত শংকৰদেৱ কলাক্ষেত্ৰত তিনিদিনীয়া কাৰ্যসূচীৰে বৃহস্পতিবাৰৰ পৰা আয়োজিত শ্ৰী শ্ৰী বদলা পদ্ম আতা পুৰুষৰ ৪৭৩ সংখ্যক জন্ম জয়ন্তী আৰু সত্ৰীয়া সংস্কৃতি সমাৰোহ ২০১৯ দ্বিতীয় দিনৰ কাৰ্যসূচীত আই-মাতৃসকলে দিহা নাম পৰিবেশন কৰে।
পুৱা উষা কীৰ্তনৰ পাছতে পৰিবেশ নিকাকৰণ কাৰ্যসূচী অৰম্ভ হয়। পুৱা ৭ বজাত ভক্ত সকলে পুৱা প্ৰসংগ কৰি মণ্ডপস্থলী পবিত্ৰময় কৰি তোলে। সমাৰোহৰ সৈতে সংগতি ৰাখি আয়োজন কৰা ‘সত্ৰীয়া সংস্কৃতি: পৰম্পৰাৰ সমৃদ্ধি বৰ্তমানৰ আহ্বান’ শীৰ্ষক ৰাষ্ট্ৰীয় আলোচনা চক্ৰও অনুষ্ঠিত হয়।
আলোচনাচক্ৰত অংশগ্ৰহণ কৰি বিশিষ্ট ব্যক্তিসকলে সত্ৰ সংস্কৃতিৰ আলোকত যুৱ সমাজক আলোকিত কৰাৰ পোষকতা কৰাৰ লগতে শিক্ষা ব্যৱস্থাত শংকৰী দৰ্শনৰ উপযুক্ত পাঠ্যক্ৰমৰ অন্তৰ্ভুক্ত কৰাৰো আহ্বান জনায়।
উক্ত আলোচনাচক্ৰৰ শুভাৰম্ভণি কৰে গৱেষক, শিক্ষাবিদ ড০ কন্দৰ্প ডেকাই। আলোচনাচক্ৰৰ তিনিখন সত্ৰত বক্তৱ্য ৰাখে শিক্ষাবিদ গৱেষক ড০ প্ৰদীপজ্যোতি মহন্ত, অসম সাহিত্য সভাৰ প্ৰাক্তন সভাপতি ড০ লক্ষীনন্দন বৰা, অধ্যাপিকা ড০ কৰবী ডেকা হাজৰিকা, নৃত্যাচাৰ্য যতীন গোস্বামী আৰু অধ্যাপক সুনীল কুমাৰ দত্তই। বিয়লি গুৰুজনাৰ বিৰচিত অংকীয়া নাটৰ প্ৰদৰ্শন অনুষ্ঠিত হয়।
আনহাতে, শনিবাৰে আবেলি অনুষ্ঠিত হ’বলগীয়া অন্তিম দিনৰ কাৰ্যসূচীৰ মুকলি সভাত মুখ্য মন্ত্ৰী সৰ্বানন্দ সোণোৱালে অংশগ্ৰহণ কৰিব।
